I'tait un vier fèrmyi qu'avait travailli la tèrre toute sa vie, mais en passant ses huiptante ans, il avait décidé dé s'èrtithé, - pâce qu'il avait gangni assez d's'arrêter un moi.
Dans un clyîn d'gi, il'avait chent ans - nou vai bein qu'l'travas n'tue pon - et l'docteu vint l' vaie touos les mais. I'n'li chergit pon nintout pour sa visite, viyant tch'i' tait heutheux d'aver un chent d'années dans sa clientelle. I'li portait des nouvelles, i' r'gardait la tension d'san sang auve la machine qu'nou gonfl'ye. I'pathait qu'l'pus qu'i' vint, l'pus qu'l'bouonhomme erd'vint jeune - et l'docteu en 'tait tout êbédué.
« Si ch'na continnue d'même, Grand'pèthe, ch'est vous tch'allez m'condithe à la chînm'tchiéthe. Tch'est qu'ou faites pour vos rajeuni comme chenna ? »
« Eh bein, docteu, ch'est comme chennechîn. J'mange bein, j'bai bein et pis j'dors bein. »
« Attendez-là un moment, » li fit l'homme d'science, « Ou mangiz bein, i'l'en faut ! Ou dormiz bein, i'l'en faut étout ! Mais pour la bouaisson, dites mé combein. Ou b'vez bein, mais i'faut faithe attention à chent ans ! »
« Bon ! Lé matîn, vérs sept heuthes, jé m'lêve, j'prends eune tassée d'café - auve deux d'gouts d'couongnac pour m'èrcauffer, et chenna m'suffit jusqu'à neuf heuthes. V'là l'heuthe du dêjeuner, et j'mange un morcé - d's ouefs, du lard et deux'trais modgies d'cidre, pis un mio d'pain et deux vèrres d'calva, tchi m'fait continnuer jusqu'à méjeu.
Man dînner est man millieur r'pas. J'en bai un moi mains à ch't heu - rein qu'eune bouteille d'vîn blianc et pis eune tassée d'café bein arrouosé et un p'tit vèrre d'couongnac. Auve chenna, j'peux attendre jusqu'à quatr' heuthes, quand j'mange ma pomme auve du cidre, pis un p'tit vèrre d'vîn. Si tchiquefais nou vint m'vai l'arlevée, j'prannons eune joudgie d'cidre ensembl'ye.
Pis nos v'là arrivés à sept heuthes, docteu. Là, j'n'veux qu'un r'pas ligi, pâce qu'autrément, nou n'peut pon dormi ; juste eune bouonne soupe, un morcé d'fronmage, deux p'tits vèrres d'vîn rouoge pour faithe d'scendre tout chenna. Pis, un p'tit avant dé m'couochi, j'm' fais un flipe - pour cachi la rouoge trie !
V'là ma journée à chent ans, et ou pouvez craithe qu'ou va bein. »
Lé pouorre docteu l'avait êcouté sans li coper court, mais i'n' criyait pon ses ouothelles.
« Tout chu bouaisson-là est bein trop à vot' âge - j'sis tout êpaûmi ! »
À chu moment-là, nous entend un frédas et un pataflias dé l'allée.
« Mais tch'est qu'i' s'passe là? »
« Oh, ch'n'est rein, docteu. J'vais vos explyitchi. J'sis d'accord auve vous, p'têtre qué oui, trop d'bouaisson tue - l'cidre, l'vîn, l'calva - mais - mais, i'y a d's exceptions, pâce qué l'brit qu'ous avez entendu… Bein, ch'est man pèthe tchi rentre - et li, il est tout à fait gâté d'béthe !!!!!
Viyiz étout: