Y'a chent ans, jé n'tais pas acquo par les c'mins, et d'même s'ou' mé d'mandaîtes tchi sorte éd gâzette qu'la Post 'tait dans chu temps-là jé n'pourrais pas vos en faithe eun bouan français, mais quandmême j'c'menchi à la lièthe y'a presque'séptante ans. Nou'n'la prenait pas tant pour les nouvelles dé l'êtrangi, car y'en avait pas fort, mais pustôt pour vaie tchi qui 'tait mort, ou marié, tchi qu'avait 'tait présenté d'vant l'bouan'houmme juge John Vaudin, et bein seux pour les announces dé vente dé fèrme. Car dans chu temps-là la vie des Jèrriais ch'tait l'fèrmage, et pour mé, qui n'tais qu'mousse, les décès et les mariages né m'disaient rein, cheu n'tait qué l'fèrmage qui m'intêrressait.
Dans chu temps-là i'n' délivraient pas la gâzette à toutes les maisouns et cèrtainement pas dans les founds perdus coumme Egypte à la Trin'té. l' fallait aller la cherchi à la boutique, et siez nous ch'tait l'pus souvent mé qui y'allait. J'm'y pliaisais bein à y'aller, d'jà qu'les séthées d'hiver quand nou n'y viyait chinnterre je m'mettez tchiques fais à penser ès scènes qué mon pèthe m'avait racounté du Chian du Boûalé et d'la Blianche Dame, et j'tais prîns d'frousse. Et y'avait eun bouan but jusqu'à la boutique à Missis Marett ès Crouaix. Si j'avais gardé à la route lé dêtou' éthait allouangni lé c'min d'eun bouan démié-mille, et d'même j'crouaisais les côtis et la falaise pour ergagni la route au Tas d'Géon, et d'valler ès Crouaix. Quand Missis Marett 'tait seule dans la boutique ou' m'gardait là eun bouan quart-d'heure à m'racounter les affaithes dé toute la pâraisse, et l'mounde disaient qué la vraie gâzette ch'en 'tait pas la Post, ch'tait Missis Marett.
Eh bein, Jerri a changi d'pis chu temps-là, et la Post a changi étout. Et coumme dé raisoun, car eunne gâzette dé être pus qu'eun mitheux, ou' dé étout examiner les problyêmes du jour, tâchi d'arriver à eunne décisioun juste, et, la décisioun prînse, la soûat'ner. Mé, ayant vêtchu pus d'chinquante ans hors pays j'n'ai pas peu suivre lé progrès d'la gâzette d'aussi près qué l'ount fait les siens qu'ount passé lus vie ichein, mais j'erchévais la Weekly toutes les s'maines n'importe éyou qué j'fûsse, et d'même jé m'gardais au couothant.
Eh bein, nou-fait, pas tréjous, car y'eut chinq ans, duthant l'otchupâtioun, qué jé n'érchu ni la Weekly ni autcheun mot d'Jèrri. Jé n'savais pas tchi què 'tait dév'nu d'mes gens, et ch'en 'tait qu'après la djèrre qué j'vîns à saver qu'not' fèrme en Egypte avait 'té dêtruite par les Allemands, des méinnes dé s'mées partout dans les clios et la maisoun et les bâtisses en rueinne. Même durant les huit ou neu' mais qué j'tais prisounnyi des Japounais rein n'mé fis pus d'mal au tchoeu qué d'n'aver autcheunne nouvelle dé Jèrri. Chén 'tait qué quand nous, les exiles, jé n'pouvaîmes pus érchever la Post qué j'nos rendîmes coumpte dé coumbein qu'nou' la mantchait. Mais lé v'là, ch'n'est qué quand not bouanheur est r'tiré d'nous qué nous en sait la vraie valeur.
Mais, Djieu merci, not' bouanheur nos fut érdounné, et la Weekly érmînse en cirtchulatioun. Y'a vingt chinq ans, quand j'tais Ambassadeur en Afghanistan, lé rédacteu' d'chu temps-là, lé sieur Arthur Harrison, mé fit grand pliaisi quand i'mé d'mandit d'écrithe eun articlye pour l'éditioun spéciale publiée pour célébrer lé séptente chinquième anniversaithe d'la gâzette. Tchiques années pus tard, quand j'tais à Singapore, Arthur Harrison et sa femme vintent nos visiter et restites tchiques jours avec nous. Et l'rédacteu' d'achteu, lé sieur Mike Bisson et mé j'soummes vaîsîns ichein à la Trin'té, car i' reste tout près au haut d'la ruette.
Tchi fait qu'j'ai ieu eun bouan rapport avec les gens d'la Post pour bein d's'années, même pus qu'i' n'lé savaient, Car les v'là installés dans chutte belle office à la Crouaix d'Bouais, mais lé sieur Rumfitt, qui dêmissiounnit coumme rédacteu à la fin d'l'année, fut bein êtounné quand j'lis dis qu'j'avais griffounné des patates sus l'betchet même ouesqué s'n'office est bâtie. I'n'pouvait hardi m'craithe mais cheun 'tait pas des sornettes que j'lis racountais. Mén ounclye Ph'lip Gallichan fèrmait, y'a soixante et d's'années, à la Fèrme él Geyt à la Crouiax d'Bouais, et ouesqu'l'office d'la Post est achteu ch'tait partie d'la fèrme. J'allais d'temps en temps passer tchiques jours avec li et ma chièthe p'tite tante Vélène et quand i' tait à griffouner ses patates i'm'laissait tréjous m'ner lé ch'va. l'm'endgeulait si l'bidet pilvaûdait trop les patates, mais ch'tait eun bouan vièr corps qué m'n'ounclye Ph'lip, et jé n'y'en voulais pas qui' m'groundisse dé temps en temps car j'savais bein qué ch'tait eune positioun dé grande respounsabilité qué d'êt à la tête au ch'va, et jé m'countais tchique chose!
Jé n'sis pas ieun d'ches-là qui prétendent qué chein qu'il' appellent lé progrès nos fait tréjous du bein, et j'n'aime pas vaie d'la bouanne terre dé fèrme bâtie d'sus. Tchi fait qué quand j'passe par la Crouaix d'Bouais i'm'fait ma' au tcheou d'penser qué dans l'temps j'ai aidgi à griffouner des patates, à traire des vaques et à scier d'l'avaine et du grain d'Espagne sus chu terrain-là. Mais tout d'même, j'n' ai rein countre la Post. Au countraithe, j'sis bein ércounnaissant qué d'pis qué l'sieur Guiton la mîns sus pid oul' est dév'nue eunne vraie traditioun jèrriaise et a 'té not' s'cours dans les mauvais temps et not' jouaie dans les bouans, Ch'est avec le pus grand pliaisi possiblye qué j'la félicite sus ses chent ans et qué j'lis s'ouaitte tout succès dans les nouviaux chent ans qui c'menchent. Ni mé ni vous j'n'avouns pas grand'chance d'être là quand oul' arriv'ra à son deuxiême chent'naire, et ché s'ra à eun tout différent Jèrri qu'oul' éra à faithe fache, mais touas les bouans Jèrriais savent bein qu's'ou' countinue sus la route qué l'sieur Guiton s'mînt à suivre Jèrri pouârra acquo dithe dans chent ans et à tout jamais qu'la Post a gardé la fouai.
Messire Arthur de la Mare
1990
Viyiz étout: