Lé problième des poummes à Bram Bilo - Rêponse
Bram Bilo, Écuyi, Chantgni dé St.-Ou
Moussieu, - J'n'ai pas ocouo le pliaisi de vouos connaître bin, car jen'ne vouos ai guèthe veu qué d'un yi, mais jé vouos dithai en véthité qu'ou nouos avèz donnè à touos nous, calculleux du celèbre colimachon de raide fi à r'teurtre dans vot's somme du 2 sous qué Laïesse a perdu en bachouard sans s'en aperchevé. Sam'di passé quand j'ai veu la gazette, votre affaithe n'fit qué résonné tout l'tems dans ma tête, comme une musique sans pouvé l'en ôté, et jé n'y viyais qué bliaze. En r'venant d'la ville ocouo, pus j'touannais et ratouannais chunna en mé, pus j'tais enbrouolli; Mais quand je r'vins siez mé et qué j'ai bu une tassée ou deux de chu bouan thé qu'on acate siez Moussieu Messervy dans Lower Bath Street, du chin qué nou nomme “Katoukella,” qué ma bouanne femme m'avait mins par bonté à tithé tout prêt pour mé, le brouoliard, le crèthe-yous bin, se l'vit p'tit à p'tit, et j'y vit tréjous après, pus clié jusqu'âche que j'visse les deux sous perdus dans l'fond de la paute de quiqu'un ouèque le bouan Laïesse les avait laissis qués comme un so.
Eh bin, nev'chin comme j'les trouvit: Laïesse (jem'dis) en bartouammant les pommes de ses deux panyiers toutes ensemblle, pour après les vendre chinque pour quatre sous, en faisait 12 los de chinque, et fit bin êtou l'idée de son pépèe (pour avé les 2s. 1d.) jusqu'ache que le dguézième lot fut hors, car quand il l'u vendu, ch'tait justement comme s'il avait vendu la deuxième pannenèe sû l'pid de très pour 2 sous, chin qui r'vénait à 20 sous, et 20 pommes de la premièthe pannenèe à deux pour 2 sous, faisant ainchin un ôte de vingt sous. L'tout ensemblle chinquante pommes pour 40 sous. Y'l'i restait ou viyis bin, dguez (10) pommes du premi pannyi (on dait le crèthe) à vendre pour dguez (10) sous, comme pépèe l'avait dit; mais qué fait Laïesse en so, sans s'en douté le mins du monde: I' pense qu'i' fallait faithe ocouo comme il avait qu'menchi, et i' laisse les deaux derniers los rallé, chinque pour quate sous, et i' perd ainchin un sous chaque fais.
Ou viyit dons, Moussieu Bram Bilo, que vouos 2 sous de perte sont allés dans la paute du dirgni ou des deux dirgniers acateurs. Si ou t'nèz à les ravvé ou savèz acheteu qué faithe. J'm'attends dons qu'ou séthèz r'connaissant pour la peine qué j'ai yeu à trouvé vouos 2 sous qu'étaient perdus.
J'sis en attendant,
Votre Ammin Phlip,
du Nor'vouée de l'île de Jerri,
à chins milles de la ville.
Jersey, Janvier 21, 1897
Moussieu Bram, - En réponse à votre problème de Samedi: Quand ou éthais trouvai votre deux sous qui manque, éprouvaits à multiplier £19 19s. 11¾d. par le même et nouos donner la réponse. Un problème vaut l'autre.
Y'eune d'vos Vaisins
Viyiz étout: