Hi! hi! garçons du Bouoley
Hi! hi! garçons du Bouoley, êtes-'ous d'charme anniet? J'ai tèt par sièz vous, et j'en tremblle accouo quand j'pense à tout chein qui disent sûs vot' compte.
Les rouoges et les blieus d'la pâraîsse où-est qu'les râts sont à 7 pennins l'quartchi, chein qui fait j'pense 2/4 pour un rat entier, avec coue et quat' pattes, sé d'mandent où-est qu'est l'caouan à chès dèrnyi, et pourtchi qu'i' n'est pas v'nu s'erpôsé dans l'cliochi l'églyise ioù qué d'pîs la dernièthe êlection, hardi des bieus n'osent pas entré.
Hé, mais garçon ch'est qué l'caouan a ach'teu paeux d'sa pouôre pé - biau qu'ou' n'vaout pas Quat' Sous! - car d'après chein qu'nou z'entend, i' faout qui prenje garde à li.
Y'en a eune cèrtain qui m'cherche dépis armé d'eunne èslingue, et sav'ous pourtchi faithe. Pour l'î teurtre lé co, l'piummé tout caoud, mettre ses belles (?) piummes à sichi et en faithe un ouothiyi pour eunne janne fille tchi s'en va s'mathié à Nouai.
Mais, mân pouôre homme, j'n'ai presque pûs d'piummes et chein qui y'en reste ne f'thaient pas eune couossin pour eun p'tit cat, sans pâslé d'ouothiyi.
Et pîs, d'aillieurs, je n'voudrais pas qué chutte janne fille erpôs'sait sa belle tête et ses ch'vaeux corlès sûs mân piumage. V'là tchi pouôrrait l'empêchi d'dormi et ou' n'éthait pas d'bein.
***
Tandis qué j'sis en pâslement d'piummes j'voudrais bein savé si les pithots tch'avaient 'tèt engraîssis à en busté p'tit d'temps d'vant l'êlection - je n'pense pas qué ch'tait pour les viaux, quèqu' j''l'ai ouï dithe - vèthe, j'voudrais bein savé s'i' l'ont tèt touos vendus. P't'être qui y-en a ieu d'gardès pour des râffléthies.
J'sait bein qu'iun 'tait pendu par lé co à la chaise qui d'vali avaout la falaise sans ch'vaux.
***
J'ai ertèt dans les bouais d'la chapelle des Landes au c'menchement d'la s'maine.
Sav'ous tch'est qu' j'ai ouï? Oh! mais, pouôrretè d'esprit, j'ai fâillyi m'mârri et d'crié: Clou, clou, cloud! ch'est mé. J'en ai entendu des doûzainne tchi dîsaient qué l'caouan d'la Chronique était d'Cart'ret.
J'vos doune ma patholle qué ch'n'est pas vrai, car jamais l'hibou n'a fait la traversèe souotre le Cygne à Cart'ret, ni maîmme à la faithe dé Lessay. J'éthais ieu trop paeux dé m'nié, car mes ailes m'éthais p't-être bein mântchi en l'min.
Mais êcoutèz les r'mèrques qué j'entendit le sé du meeting quand j'tais muchi drièthe iun des biaux portraits dans la p'tite salle du parish hall. Vèthe, j'y-étais et j'ai bein entendu le boss d'mandé à eun maniéthe dé faisaeux d'gâzettes tchi n'viyait pon trop clliait: Le caouan est-i' muchi là?
Eh bein! chein qu'chu rapportaeux là n'a pas mins dans la gâzette parce qu'il 'tait trop bûsard pour lé comprendre, j'men vais vos l'dithe.
Y-en a tchi n'veulemt pas d'nouviau parish hall, parce qu'i' dîsent qué v'là tchi couôt'ait trop chi, pas l'bâtisse, mais l'inscription sûs la prémié pierré. I' veulent dithe qué ch'n'est qu'pour avé cèrtain nom sûs eunne pierre que chounna a tèt proposè.
D'aoutres dîsent qué v'là ch'est fait pour douné pûs d'terrais à lûs anmin l'bouan bergé, et qué Francis s'sait bein content d'agrandi l'cllios dé chi i' veur être le boss et ioù qu'i' n'y-a pas d'aoutre dé row entre l's'êpoux dont la fin est la paix!
Ou' n'mé créthais p't'être pas, mais j'vos assaeuthe qué ch'est la puthe, plienne et entièthe véthitèt!
***
Ecréhos,
Chièr moussieu. - Achteu que j's'is ès Ecréhos et q'mes gens m'ont envié vot' gâzette par le baté à pêque qu'arrivi hier, j'ai l'honneu' d'vos envié mes réclamations par chu baté qui sors demain pour Jèrri, et j'espèthe d'en touchi l'montant dans l'couothant treîs s'maines.
P.S. - J'sis v'nu passé quatre mais es Ecréhos par la faute de vot' maudit "Caouan," et ses déclarations envers mé, car où savèz le monde mé pointaient au dé que j'en eu tellement honte que s'is v'nu ichin pour mé muchi.
Je sîs, moussieu, etc.,
Elias Capuchinne.
Ce 8 Déc. 1908
|
Mai 13. - Pour s'êtes juchit sûs les grand's portes d'la routes qui v'naient d'êtes fraîches paintes en rouoge .....
|
|
19
|
6
|
|
Mai 27 - Pour avé tchulbuté l'portrait de John Wesley qui tait pendu dans l'parleux ....
|
1
|
1
|
0
|
|
Juin 30. - Pour avé rompu unne corde de not' grand-father's clock ......
|
|
15
|
0
|
|
Sept 14. - Pour avé trébutchi le caractèthe de ma grand'mèthe qui marche au bâton ......
|
5
|
0
|
0
|
|
Oct. 6 - Pour avé dit que j'avais ieu unne bike sus l'compte d'un élection .......
|
2
|
2
|
6
|
|
Nov. 13 - Louogement pour s'être abrité sept gnits dans not' poulâhyi .....
|
|
4
|
0
|
|
Nov. 25. - Pour avé crévèt les yiers de not' cate .....
|
|
5
|
0
|
|
---------------------------------
|
|
|
|
|
Total ............
|
9
|
7
|
0
|
Cahouain
Les Chroniques de Jersey 19/12/1908
Viyiz étout: