Né v'chîn tchiquechose tchi vouos f'sa rithe à en créver, j'sis seuse. Ecoutez! Man grand-péthe soulait m'raconter ch'la et - qué v'là tchi m'faisait du fanne!

"J'avais douze boutillies d'litcheu dans man ch'lyi et un bouon jour ma bouonnefemme mé dit net' et cliai dé vèrser dêliêment tout avau l'dalot ou bein...!

Et d'mëme, pour aver la paix, j'consentis et m'y v'là c'menchi, sapresti. J'halis l'bouchon d'la preunmié boutelle et vèrsis la boutillie avau l'dalot à l'exception d'eune vèrrée qué j'avalis. Là-d'ssus j'halis l'bouchon et en fis autant à la deuxième boutelle. Du tèrme, j'halis l'bouchon d'la traisième boutelle et vèrsis la litcheu avau l'dalot, sinon eune vèrrée qué j'bus. Ah véthe, mais, auprès ch'la j'halis l'bouchon du quatrième dalot, vèrsis la boutelle dans l'vèrre et l'avalis. J'halis l'bouchon du chînquième dalot, vèrsis l'vèrre dans la boutelle et l'avalis. J'halis la boutelle du bouchon du préchain, j'en bus un dalot et env'yis l'restant dans l'vèrre. J'halis l'dalot du préchain vèrre, vèrsis l'bouchon dans la boutelle et bus l'vèrre. J'halis l'préchain bouchon d'ma gorge et vèrsis l'dalot avau la boutelle. Et pis j'bouchis l'dalot atou l'vèrre, boutillis l'baithe et bus la vèrse. Quand j'eus viédgi tout j'happis la maison d'eune main pour l'empêchi d'crauler et atou l'autre j'comptis les boutelles, bouchons, vèrres et dalots, et y'en avait vingt-neuf tout ensemblye. Pour en être bein seux, j'les r'comptis quand i' r'passîtent et j'en avais septante-neu. Et pis, finnalement, quand la maison èrpassit j'èrcomptis acouo eune fais. J'comptis toutes les maisons, boutelles, bouchons et dalots sinon pour eune boustre d'maison et eune fichue boutelle qué j'avalis.

Jé n'm'èrsouveins d'rein du tout auprès ch'la - jé l'dis franchement - mais il est probablye, ma fé, qué j'n'éthais pon peu en avaler d'autre, pas seulement un p'tit lèrmîn!"