- L'autre, le r'gardant, la coue en haut,
Disait: "Man vieux, ch'est chin qu'i faut,
Le lait ach'teu a hauchi d'prix;
La quarte de l'ait s'vend quatre pennys.
Tu'admettras, en viyant chonna,
Qu'nou n'peut nouorri ni tchan ni ca'
Avec de tchi qui couôte de même,
Que che s'sait viande ou lait ou crème.
Pour mai, j'y sis accouôtumè,
Ch'est à la duthe que j'fu êl'vè
J'n'avais du lait qu'assez rarement.
Tchic fais, je n'sai' pas trop comment,
Quand j'tais à m'traîner par es c'mins,
J'viyais, sus l'pas d'lus des vaisins,
Les porteurs, souvent bein pressis,
Qu'en laissaient tchaie (ov de gros d'vis)
Un p'tit cliapet sus l'pas d'la porte,
Et j'nen gouotti jamais d'autre sorte!
Mais la dghèrre est sus l'continent
Et la renchiéthe - même pour un tchan -
'Tait bein inévitabl'ye, ch'est seux,
V'là qui daivthait t'sauter ès yeux."

- "Mais ch'est, tout d'même, bein embêtant
Se faisait l'autre en r'gardant l'temps.
Me v'là, comme un homme en faillitte,
Que j'vai ma nourrituthe réduite;
Les "p'tits dépens" n'sont pas d'man goût
J'aimais à vaie bouanne tabl'ye siez nous!"

- "Tu n'es, lis dit san parchonn'yi,
Qu'un déshonneur à tan pays.
Tan maître est hors sous la mitraille
Et pis, tu voudrais faithe ripaille!"

Elie
1915