Les Pages Jèrriaises

A des huit heuthes!



A Mousieu l'Editeu.

Et bein n'en v'là t'i ètou! J'vai sus vot' gazette, man chièr Mess Bisson, qu'ou z'avez un correspondant - un Electeu d'la ville - tchi s'pliaint de l'heuthe de la réunion qu'ils avaient Mardi au sé. I s'imagine que ch'teuthe là ne pliaitha pon ès fermiers des vingtaines rurales!

Quéman? Huit heuthes, mais au contraithe, nou n's'en f'tha pas du tout d'mauvais sang, coumme ou z'allez vaie.

Jé v'nons d'fini l'avou; de fait, le blié n'est pas oquo tout rentré, tant s'en faut. Nou z'est en plien temps d'tass'sie et d'batt'tie et d'arrang'gie d'hôgards.

I' fait clié assez pour travaillé jusqu'à deviers un quart de sept ou siez heuthes et d'mie, s'lon l'temps. Nou rentre siez sé. Le temps d'sé laver les mains et d'sapproprié un mio et pis d'prendre une bouanne tassée d'tée à san laizi et tout d'un coup né v'là sept heithes et d'mie qui vos tchaient sus l'co. Changi d'bottes, mettre sa casaque et l'restant, et nou z'a justement l'temps d'être prêts à huit heuthes.

Achteu dites mé don Electeu' coumet qué ch'la nôs f'thait pus d'pliaisi si nou nos d'mandait d'aller à l'Assembliée d'pâraisse à 7 heuthes ou à siez heuthes et d'mie. Faudrait tchitter san travas, à la saison tch'est, en pleine clièrté d'jour, déviers chinq heuthes et d'mie ou siez heuthes! Nou n'fait pas d'itèt en avou, man vieux, ch'est mé qui té l'dit.

Il est vrai que nou n'aime pon à s'quochi trop tard mais nou z'aime oquo bein meins à tchitté san travas dé chu temps ichin.

Et, après tout, nou n'enhanne pon pus d'être à une Assembliée d'pâraisse entre huit heuthes et neuf heuthes et d'mie que d'être à haûté à la carre de l'âtre ou à fumer sa pipe sus la joncthèthe!

J'vos r'merciethai bein, Mess Bisson, d'aver la bonté de dithe chonna à l'Electeu.

Je sis, etc.

Yun des Viers

Nouvelle Chronique de Jersey 20/9/1905
 

Viyiz étout:

 

Les Pages Jèrriaises