Les Pages Jèrriaises

Quand j'èrgarde La Crouaix

When I survey the wondrous Cross

Quand j'èrgarde La Crouaix d'Nouotr-é Sauveur.
Symbole dé tant dé cruauté:
Richesses du monde pèrdent lus valeur.
Et tout ordgi n'est qu'vannité.

Jé n'ôs'sais pon, Seigneur Jésû,
Louangi autcheune chose ichîn bas
Tchi n'met l'ombre d'La Crouaix en d'ssus
Dé tout chein tchi condit nouos pas.

Lé sang tchi coule dé Ta bliesseûthe
Dans l'côté, et ès mains et ès pids,
R'lave nouos péchés et nouos asseûthe
D'eune pliaiche pus tard au Paradis.

Si touos les rouoyaumes du monde entchi
M'étaient ouffèrts auve touos lus trésors,
J'dithais " Nânnîn!" car l'amour dé Dgi
Vaut mus qué toutes richesses et l's ors.

À Jésû Christ. Tch'est auve les Anges,
Au Trône à drouaite du Rouai des Rouais:
Chantons sans r'lâche glouaithe et louanges,
Dès à ch't heu et pour tout janmais.

Âmen

 

Vèrsion par George F. Le Feuvre

 

Viyiz étout:

 

Les Pages Jèrriaises