Les Pages Jèrriaises

Notre Vieir Crâset

Pouor vieir Crâset! pouor vieir Crâset!
Té v'la étout meins de côtet,
Pas tout à fait! pas tout à fait;
Car t'uest eunne grande tchuriauezitet.

Tu'as tet utile le temps pâset,
Man vieir Crâset!
A aîskiéthi nos vieirs pathens,
Dans les vieirs temps.

Quand y taies assis sus la jontchièthe,
A l'entou du feu; les uns à yièthe,
D'aoutres à couotre, où à ouvré;
V'la comme y passeais lus temps au sçé.

Où bein à joué eunne game de cartes,
Avec du cidre dans la mogue de carte,
A la lueur du vieir Crâset;
Ne v'la comme lus temps se pâset.

Hélas! achteu qui n'éthait qu'ditet,
J'ein sçait pas vraiment t'chesque nou fthait.
N'ou n'pouorait rein faithe quand y sçait gniet,
Le mus essçait de sçaouvé au yiet.

Si chest q'tu pouvais nos pâslé,
Tu pouorais bein des choses raconté,
De chest jeunes gens alentout du feu,
S'entre faisant les doux yieux (comme achteu).

Chest eunne mode qui jamais c'changea,
Ou'l tet du q'manchement, et tréjous où sça.
Les jeunes gens aiment à lus promné ensembyïe;
Y sont tout à fait bein; tandis qui sont geannes.

Si les bouannes vieilles gens ervenaient,
Pour toutes lus choses y r'gardethaient;
Pas même le Crâset y n'pouorais pas vais,
Car chest eunne lampe à la plièiche sus l'ais.

Man vieir Crâset, t'uest bein ercherchi;
Les siens qui t'veulent, faut qui paie bein chi,
Car chest pour t'eine antitchitet,
Que tu'est si prîezi et acattet.

Quand j'tergarde, man vieir Crâset
Tu m'fais pensé au temps pâset;
A ma grande mèthe, à man grand pèthe,
Auprès du feu, sus la jontchièthe.

Compozet par
A. Mathilde Le Feuvre
(née De Faye)
 

Vèrsion modèrnîsée:

Not' Vièr Crâsset

Pouor vièr Crâsset! pouor vièr Crâsset!
Té v'là étout mîns dé côté,
Pas tout à fait! pas tout à fait;
Car tu'es eune grande tchuthiôsité.

Tu'as 'té utile lé temps pâssé,
Man vièr Crâsset!
À êcliaithi nos vièrs pathents,
Dans les vièrs temps.

Quand i' 'taient assis sus la jontchiéthe,
À l'entou du feu; les iuns à liéthe,
Daut's à couôtre, où à ouvrer;
V'là comme i' pâssaient lus temps au sé.

Ou bein à joué eune gamme de cartes,
Avec du cidre dans la mogue de quarte,
À la lueu du vièr Crâsset;
Ne v'là comme lus temps sé pâssait.

Hélas! achteu qu'i' n'éthaient qu'dité,
Jé n's'sais pas vraîment tch'est qu'nou f'thait.
Nou n'pouôrrait rein faithe quand i' sait niet,
Lé mus es'sait dé s'sauver au liet.

Si ch'est qu'tu pouvais nos pâler,
Tu pouôrrais bein des choses raconter,
Dé ches jannes gens alentou du feu,
S'entre-faîsant les doux yeux (comme achteu).

Ch'est eune mode tchi janmais n'chang'gea,
Ou tait du c'menchement, et tréjous ou s'sa.
Les jannes gens aiment à lus prom'ner ensembl'ye;
I' sont tout à fait bein; tandi qu'i' sont jannes.

Si les bouannes vielles gens èrvénaient,
Pour toutes lus choses y r'gardéthaient;
Pas même lé Crâsset y n'pouôrraient pas vaie,
Car ch'est eune lampe à la pliaiche sus l'ais.

Man vièr Crâsset, tu'es bein èrchèrchi;
Les siens tchi t'veulent, faut qu'i' paie bein chi,
Car ch'est pour tén antitchité,
Que tu'es si prîsi et acaté.

Quand j't'èrgarde, man vièr Crâsset
Tu m'fais penser au temps pâssé;
À ma grande méthe, à man grand péthe,
Auprès du feu, sus la jontchiéthe.

 

Viyiz étout:

 

Les Pages Jèrriaises