Nos deux houm's vainn'nt siez l'Ecrivain -
Lé pèr' t'nant san fils par la main : ~
"Extchusèz-mé, Mousieu,"
Dit l'pèr', "jé sis v'nu vès
"S'ou prendrêt' man Mathieu
"Pour y-apprendr' tout's les loués."

- "Mais n'est pas houm' dé loué qui l'veux,"
S'fait l'Ecrivain, en boulantt d-z-yeux ;
"Et tch'est qui sait, vot' fils?"
- "Il a apprins à lièr',
"Sait faire des O èt d-z-I,
"Et compt', oui, mus qu'sa mèr!"

- "Vèr i paraît qu'ach't-heu l-z-aviers
"Prétend'nt en connaîtr' pus qu'les viers."
- "Dis-don à l'Ecrivain
"Chain qu'deux fais deux font." - "Trais"...
- "Là, Mousieu, vi-y-uns bain,
"Coum' i d'vinne à yun près!"

L'houm' d'affair' s'touann' sus ses talons,
Sé gratt' la tête èt-pie rêponds: -
"Vot' fils n'est qu'eun chaînoll' -
"Car deux fais deux font six;
"Renvièz-lé à l'Ecoll'
"A compté touos ses I!"

- "J'crai," s'fait l'pèr', "qu'ou voulèz niolé -
"Par vot' mannièr' de caltchulé."
L'houm' dé loué r'plique à chlà,
Ove eune organne appert' :-
"Mé crériez-t-ous si ch'va
"Qué d'compté à ma pert'!!!"