The Good Old Days

Merrienne and Ph'lip remember

Moussieu l'Editeu,

Avant-hier au sé, la Merrienne et mé, je n'sais pas pourtchi, j'nos mîmes a pâslé des bouons viers temps. Oulle avait tait visité eune jeune femme mathiée du vaisiné tch'avait donné naissance à un mousse y'a un mais et quand ou r'vint je l'y d'mandit s'oulle avait yeu d'l'iau d'canelle.

'Nânîn' ou raiponnit 'j'ai yeu eune tâsse de tais et eune galette. Toutes ches bouonnes vieilles couôtumes dispathaissent. Dans man temps, quand eune femme tait assez ben pour déscendre, nou la trouvait dans l'grand parleux, avec le mousse dans l'ber, nou la félicitait, épis nous avait un verre d'iau d'canelle pour vos rêcauffé l'estomac.'

'Et tchiquefais deux' je m'fit. 'J'me r'souvains d'une vieille fille, tch'appartenait d'la tempéthance, tch'en avalit tant eune bordée qu'ses gens eûtes à la mettre au liet. Mais achteu ch'est du tais et une galette. Hélas, ouêsque-y sont les bouons viers temps?'

'Y sont hors man Ph'lip, et y ne r'veindront pas. Te r'souvains-tu d'nos grandes t'chethues?'

'Ah, damme, oui' je l'y dit. 'Les gens n'taient pas si prèssis dans chu temps-là, et nous en avait pour siez s'maines. Si nous en touônait quatre vrégies dans un jour avec deux tchethues, ch'tait assez. Quand v'nait la séthée y'avait eune raide bouon diné, épis nou s'mettait à joué ès cartes, tandisqu'les femmes rabillyaient des cauches et racontaient tout l'scandale d'la pâraisse.'

'Ch'n'est pas vrai' s'fit la Merrienne. 'Les femmes restaient d'but pour être seuzes que lûs hommes pouorraient r'trouvé lûs chambres. Mais y'avait du pliaisi quandmême.'

'Ben seûx' je l'y dit. 'Et les séthées d'nier-beurre, t'en r'souvains-tu?'

'Je crai que je m'en vais r'souvains. Les femmes p'laient les pommes dans l'jour, épis quand v'nait le sé, tous les vaisins arrivaient. Nou chantait et nou dansait, car y'avait tréjous un accordéon ou deux et la niet passait comme rain du tout. Hélas! Les bouons viers temps.'

'Il est vrai' je l'y dit 'qu'y a chinquante ou souésante ans les fermiers ne faisaient pas grands sous. Ben des fais quand v'nait la fin d'l'annee, nous avait d'la peine à payi san louage et pûs d'un propriétathe tait forchi d'allé a la banque.'

'J'l'admets' ou s'fit 'mais quand v'nait Nouë nous oubliait tout chonna. La maison tait tréjous pliène chu jour-là et personne ne pouvait dithe que n'y'avait pas assez à mangi. Grand doux! Les r'pas qu'j'ai veu sus la tablye à Nouë. Un gros picot, un gros pithot, un gigot d'lard, d'la viande et pour fini tout, un podin d'Nouë.'

'Et n'oublie pas qu'y'avait tchiquechose à béthe étout' je l'y dit.

'Vèthe, y'en avait assez et tchiquefais même un mio trop' ou dit 'mais ch'tait Nouë et nou n'se gènait pon. Hélas! les bouons viers temps.'

Et sûs chonna j'nos en fumes nos couochi.