Dans man jeann' temps nouz allait à la veille,
Et nou s'cauffait devant une bouann' fouaie d'vraic;
Nou faisait l'beurre ocouo dans une ronde seille,
Et nou brulait de ll'ièle dans un crasset.
Drinn, drinn, etc.

Dans la saison que les bouais sont sans fielles,
Nou s'amusait parfais à jouer cafou;
Vla qui pllaisait assez bein es hardelles,
Et les garçons s'en trouvaient bein ètou.
Drinn, drinn, etc.

Les uns s'cauffaient en contant quiqu' histouaire
Et en guettant les filles couotre et ouvrer;
Et pis opres, tous ensemblle sus l'aire,
Nouz y dansait, "Ah! mon beau laurier."
Drinn, drinn, etc.

I' fallait vée faire le pot à "deux anses,"
Tandis qu'en rond les autres dansaient tous;
Quand ch'est qu'opres deux ou trais révérences,
Touos ensemblle chantaient "Embrassez-vous."
Drinn, drinn, etc.

Dans les temps d'Noué nou se r'hauchait l'haleine
Atou du punch et de bouan cidre caud :
Opres chonna nou ne trouvait pas d'peine
A chanter cllai et l'ver les pids en haut.
Drinn, drinn, etc.

Dans chu temps la nouz avait une fouorie
Qui valait bein la grand' quérue d'ache-t-heu :
Opres souper la journèe 'tait finie
A se cauffer en chantant endrait l'feu.
Drinn, drinn, etc.

Dans le R'nouvé nou n'se servait pas d'houettes
Comme de nos jours pour serclli les pannais;
Mais nouz avait de bell's petites frouquettes,
Et nou hallait la serclle atou ses daigts.
Drinn, drinn, etc.

Les gens n' taient pas netou' si fins d'lus peine,
Ni si piercheux, ni si rempllis d'orgui;
I' pouvaient bein êcurer sans mitaine;
Et i' pouvaient bein porter lus pangni.
Drinn, drinn, etc.

Les mênagières faisaient pieigni la laine,
Et pis opres i' la filaient au rouet;
Ch'était atou chute êpaisse molle traime
Que nouz ouvrait bllanchet, cauche, ou bonnet.
Drinn, drinn, etc.

Le Lundi d'Pâques, à la chapelle St. George,
Au vier châté nouz allait l'pus et l'mux;
Ch'est la saison dans qui nou seme l'orge,
Et qu'l'ouaisé dit en chantant, "quitte-tes-cllus."
Drinn, drinn, etc.

Nouz allait faire le tou du chva Guillaume
Dans un baté le jour de la St. Jean;
Nou n'chantait pas tout l'long d'l'annèe l'même psiaume,
Mais ill y avait pus d'une fête par an.
Drinn, drinn, etc.

Il est bein vrai l'monde n'était pas si bête;
Dans chu temps là nouz allait au sonneux;
Nou savait bein quand il y érait une fête;
Le temps s'trouvait pour travas et pour jeux.
Drinn, drinn, etc.

J'ai oui etou que quiqu'fais dans des bolles
A des cufaire nou donnait du chaudé;
A la Toussaint nou faisait des nouorolles,
Et pis à Pâques nouz avait du simné.
Drinn, drinn, etc.

Ah! bouan vier temps!.. à ch't-heu i' n'y a pus d'fête;
Ah! mes bouann' gens, comme est qu'tout a changi;
Comme est que l'monde tout d'un coup est v'nu bête.
Jerri! Jerri!.. tu n'es pus l'vier Jerri.
Drinn, drinn, etc.
 

UN ST. LOUORENCHAIS.