À Halloween 2002, lé Conmité Social dé L'Assembliée d'Jèrriais organnîsit eune séthée d'nièr beurre siez l'Sieur Le Gresley ès Potithons à Ste. Mathie.
Un grand nombre dé gens prînt part - à p'ler les pommes, à rêmuer lé nièr beurre et à mett' lé nièr beurre dans les pots.
Et y'avait un tas d'spectateurs étout - des vielles gens, des vîsiteurs, des jannes gens et des mousses (dans lus costumes dé dgiâbliotîns ou d'chorchiéthes ou d'aut' caractéthes) - tchi 'taient întérêssis dans chutte vielle couôteunme dé Jèrri.
Et pouor les mousses étout, ch'tait eune opporteunnité d'ouï deux'trais patholes dé Jèrriais - acouo eune richêsse dé nos traditions. Ch'est à espéther qu'il' éthont apprîns deux'trais mots étout: nièr beurre, p't-êt' ou rabot ou peîle ou mêfie-té! (quand i' lus appréchaient trop d'la peîle….)
L's affaithes c'menchîtent dé bouonne heuthe lé matîn car i' fallait alleunmer l'feu et mettre lé cidre à bouoilli. D'vant longtemps eune foule dé gens arrivit pouor p'ler les pommes - en tout chînquante ou souaixante pèrsonnes lus mîntent en travas duthant la journée.
Y'avait des temps quand la vielle lav'thie d'la fèrme où'est qu'nou-s'avait mîns la peîle sus l'feu 'tait patchie comme des sardinnes auve la racachie d'gens auve lus caméras et caméras d'vidgo. Nou-s'éthait dit qu'i' n'y'a janmais ieu eune séthée d'nièr beurre si filmée et photographiée!
La pel'lie des pommes fut faite dans l'hangar à côté. Toute la machinn'nie d'fèrme avait 'té sortie et un tapis et des tabl'yes et tchaîses avaient 'té rangies l'long d'eune muthâle. Sus les muthâles y'avait d's êcritchieaux: “Né feunmée pas!”. Ch'est bouôn d'saver qu'les règl'yes d'la santé et d'la seûth'té sont respectés tout en ravigotant les villes couôteunmes.
L'aut' côté d'l'appartément 'tait la tchuîsinne. et tchi tchuîsinne! J'vos garantis qué l'mangi tchi fut offèrt dé chutte tchuîsinne-là avait l'goût d'èrva-s-y. Les gens tchi 'taient à travailli là n'avaient paon à lus pliaindre d'la soupe. des pais au fou, d'la viande fraide et d'la salade, du pâté d'pommes, d'la gâche et tout pliein d'thée et d'café. Nou n'pouvait pon d'mander pus. Tout l'temps quand les gens 'taient à travailli l'Sieur Ron Maûgi 'tait là auve s'n accordéon à garder touos les gens rêvilyis auve des chansons du temps pâssé.
Y'avait des gammes: eune exhibition d'portraits d'membres du conmité en êfanche où'est qu'nou 'tait învité d'les èrconnaître. Et i' fallait d'viner lé paids d'eune gâche.
 |
 |
 |
 |
 |
 |
 |
 |
 |
 |
Par sept heuthes du sé toutes les pommes douoches avaient 'té p'lées et les pommes suthes fûtent laîssies pouor lé lendémain.
Toute la niet y'avaient des hoummes et des femmes à rêmuer l'nièr beurre - au jour d'aniet i' sembl'ye qu'i' y'a pus d'êgalité d'opporteunité siez les deux sexes qu'au temps pâssé! Viyant qué ch'tait Halloween l'atmosphéthe 'tait bein spécial auve les mousses et lus fanmil'yes dans lus dêdgîsements. Et y'avait des moments quand nou-s'éthait dit qué ch'tait les trais chorchiéthes dé d'dans la pièche Êcossaise dé Shakespeare a rêmuer lus chaudgiéthe en faîthant lus chorchéthons.
Y'avait vraînment d'l'excitement dans l'air, mais tout allait pus douochement d'vièrs mînniet et bein seu qu'duthant les p'tites heuthes d'la niet y'avait mains d'monde à donner un co d'main auve la rêmueûthie.
Nou dithait qu'i' y'a d'tchi hypnotique dans l'mouvement rhythmique d'la rêmueûthie - et j'peux l'èrquémander. Ch'est mus qu'la thérapie et chenna renforche les pouongnets! Mais eune bollée d'pais au fou auprès mînniet aîgue lé travas.
 |
 |
 |
 |
 |
 |
 |
 |
 |
 |
 |
 |
 |
 |
 |
Vendrédi au matîn les membres èrvîntent pouor finni la pel'lie et mett' les pots à Nièr Beurre, tchi r'lithaient par êt' si propre, sus les tabl'yes prêts pouor êt' remplyis d'Nièr Beurre.
La tchuithie du Nièr Beurre continnuait dans la lav'thie - et lé travas d'rêmueûthie dév'nait dé pus en pus dû coumme lé Nièr Beurre dév'nait pus êpais.
Lé preunmyi d'Novembre coumme l'heuthe s'appréchait d'sept heuthes la tchestchion 'tait d'mandée d'pus en pus: lé nièr beurre, est-i' acouo prêt?
En attendant, Moussieu Lé Huray et s'n accordéon auve sa fil'ye et san violon gardaient les membres amusés.
Ch'est en tchi i' faut êprouver la mêlange pouor vaie si l'nièr beurre est prêt. I' faut prendre eune tchullée d'nièr beurre dé d'dans la peîle et la mett' sus eune assiette. Pis nou prêsse eune tchulyi en bouais sus l'nièr beurre - s'ou cliutte assez pouor pouver l'ver l'assiette, lé nièr beurre est prêt et il est temps d'haler la peîle dé sus l'feu.
Et nou-s'êprouvit l'nièr beurre, et l'èrêprouvit, et pis l'èrêprouvit acouo eune fais, mais les pus sages dé nos expèrts né sembliaient pon satisfaits. Nou-s'êprouvait, nou considéthait, nou grattait la tête, nou m'ttait eune assiettée d'nièr beurre en d'houors sus la muthâle des cottes à couochons pouor l'èrfraidgi - et enfîn l'vèrdi fut prononcé: l'Nièr Beurre 'tait prêt!
 |
 |
 |
 |
 |
 |
 |
 |
 |
 |
 |
 |
 |
 |
 |
Mêfi'ous! Car ch'est bein dangéreux - la peîle est b'sante et brûlante. I' faut copé du cannevas et l'trempé dans dé l'ieau pouor tcheindre la peîle en la l'vant. Du sablion fut fliantchi sus l'plianchais à seule fîn d'empêchi d's accidents - car lé plianchais avait 'té couvèrt dé mêlange duthant la rêmueûthie. Et un grand tyeur fut pliaichi d'vant l'feu pouor èrposer la peîle sus.
Lé chucre et les limons fûtent ajouôtés et l's êpices étout et l'nièr beurre fut rêmué acouo tchiques minnutes, pis nou c'menchit à dréchi l'nièr beurre dans des bachîns prêts pouor lé porter dans l'aut' appartément pouor les gens à mett' dans les pots.
Tchi brit quand les pots 'taient tapés sus les tabl'yes pouor sé faithe seux qu'i' n'y'a pon d'creux entré les tchullées d'nièr beurre dans l'pot!
D'aut's gens 'taient là pouor laver les pots quand i' taient plieins et acouo d'aut's 'taient à les couvri. Tout fut fait à grande vitesse tandis qu'lé nièr beurre 'tait acouo caud. Lé total dé pots fut comme sied: trais chents huiptante trais pots!
Achteu i' n'y'avait qu'à les vendre. Et tout chennechîn valait bein deux jours dé travas bein pliaîsant auve tout pliein à mangi, du fanne et d'bouanne compangnie. I' faut r'mèrcier l'Conmité Social pouor l'organnîsâtion d'la séthée - ou pustôt des séthées.
Vive lé Nièr Beurre!
 |
 |
 |
 |
 |
 |
 |
 |
 |
 |
Viyiz étout: