Le Ménage ès Feuvres,
St. Ouën.
Lé 18 d'octobre, 1975.
Moussieu l'Rédacteu,
Né v'chîn man drein sanm'di à vouos êcrithe en Jèrri, car j'm'en r'vais en Améthique mardi tchi veint. Comme en est tréjous l'cas, y'a un tas d'amnîns qu' j'éthais deu aller vaie d'vant m'en r'aller, mais y'a tant d'tchi faithe à la dreine minnute qué j'finnis tréjous par n'aver pon l'temps d'gângni à vaie tout l'monde, et j'espéthe qué l's anmîns qué j'n'ai pon veu pour lus dithe À la préchaine èrveue s'en vont m'pardonner.
J'veins d'èrgarder les dreines gâzettes qué j'avais mantchi à cause dé ma galvaûd'die hors l'île, et ch'est auve grand pliaIsi qué j'vai l'portrait d'mes bouans anmîns Stanley et Elsie Anmîn du Mont Mado tchi veinnent dé célébrer chînquante ans d'mathiage. Comme j'n'ai pon les féliciter à ch't heu, et j'lus souhaite acouo bein d's années à jouï d'la vie heutheuse tch'a tréjous 'té la leu viyant tch'il ont dêcouvèrt lé ségret d'trouver l'bonheu dans la vie mathiée.
Et pis j'éthais deu aller vaie ma couôsinne en ville et d's anmîns siez les P'tites Soeurs des Pauvres - et bein d'autres. J'ai r'gret qué j'n'ai pon ieu l'temps ches dreins jours, et j'espéthe tchi n's'en vont pon êt' mârries à mé et tch'i' s'en vont comprendre qué l'amiêtchi n'est pon eune affaithe dé visites mais pûtôt eune affaithe dé tchoeu, et qué si jé n'vais pon les vaie assez souvent j'pense quand-mème souvent en ieux.
Les nouvelles dans la gâzette mé disent qué y'étha p't-êt' des changements en Jèrri par lé temps qué j'èrveindrai, si l'Bouan Dgieu l'pèrmet, vèrs la fîn d'mai d'l'année tchi veint. I' pathaît qu' cèrtains membres d's Êtats veulent changi la constitution d'la Chambre et d'ses conmités. Ch'est drôle comment tch'i' peuvent amender l's affaithes. Pourtant, eune mâsse d'èrgots d'Cour et d's Êtats et autres, prannent sèrment d'garder la constitution. Mais ou s'en va tout d'mème un p'tit à la fais. Heutheusement, y'a acouo eune mâjorité des membres tchi vaient l'travèrs des êfforts dé cèrtains tchi veulent aboli tchiques priviléges dé la Police Honorifique tch'a dêjà fort à faithe à dêcouvri et présenter les malfaiteurs dévant Justice. Ch'est r'mèrquabl'ye comment qué d'nouos jours, y'a eune tendance dé vouler les pouloter, les malfaiteurs. V'là tchi dait nâvrer la police, et ch'est assez pour la d's'encouothagi.
Où'est tch'est l'temps pâssé quand un meurtriyi tait seux, en Jèrri comme en Angliétèrre, dé subithe les conséquenches? Dans chu temps-là ch'tait eune affaithe dé chînq ou siex meutres seulement par an. À ch't heu y'en a quâsi touos les jours, et un emprisonnement pour la vie veurt dithe eune tchînzaine d'années, pus ou mains. Et dans chu temps-là les mousses obéissaient lus pathents et respectaient l'autorité, et allaient à l'êcole du Dînmanche et à l'églyise et à la chapelle. À ch't heu, l's églyises et les chapelles sont quâsi viedes et l's aubèrges sont plieines, et les mousses sont à galvaûder les c'mîns en motocyclettes et à vandalîser pars et chînm'tchiéthes. Il est grand temps qu' nouos Juges faichent les pathents des cheins tchi sont happés payi pour les danmages tch'il' ont fait. I' n'y'a rein tchi f'thait les mousses lus comporter pus qué d'forchi lus pathents à dêbourser pour lus d'gâts.
J'ai r'gret qué j'né s'sai pon en Jèrri pour vaie l'rêsultat d's êlections du mais d'novembre. J'espéthe que l's êlecteurs s'en vont lus dênichi d'siez ieux pour aller voter. Ch'est vrai qu' les candidats font des promêsses tch'i' n'gardent pon eune fais êlus. Ch'est d'mème dans quâsi touos les pays libres, mais i' faut allouer pour chenna et voter pour les cheins tch'ont l'bein-être dé l'île entchiéthe dans l'idée pûtôt qué tchiques priviléges pour eune pétite minnorité.
Rein n'a pon 'couo 'tait fait pour molli la vitesse des motos dans les p'tites rues d'campangne. J'sai bein qu'un tas d'vouos lecteurs s'en vont dithe tch'i' sont enn'yés dé m'ouï en pâler dans ches lettres, mais j'sis acouo d'avis qu' un tas d'accidents (et la gâzette en est tréjous plieine, d'accidents d'motos) s'saient êvités si l'monde n'îthaient pon à quarante milles à l'heuthe dans les p'tites rues prîncipalement où'est qu' les dêhas sont dangereux. Et pis, ou viyiz, j'n'ai pon oublié l'vièr diton tchi nous dit qu' ch'est à la reue tchi crie l'pus qu' nou met la graisse!
Enfin, rein n'est parfait et ouaithe qu' un tas d'gens tchi n'sont pon Jèrriais mais tchi sont v'nus d'meuther en Jèrri, lus pliaignent dé nouot' gouvèrnément, jé n'les vai pon vouler tchitter l'île pour en trouver un miyeu. Quant à mé, j'espéthe y r'vénîn à la fîn du mais d'mai tchi veint, et dans l'entretemps j'vouos souhaite toutes les bouannes choses en vouos disant À la préchaine!
George d'La Forge
Viyiz étout: