La vie 'tait pus paisibl'ye qu'au jour d'aniet.
Y'avait bein p'tit dé motos sus les routes. Ch'tait pus ou mains des vannes à j'va et des quèrres - y'avait étout des bikes. Et, dans bein des cas, lé monde marchait même dé longues distances.
Y'avait pus d'fèrmes qu'au jour d'aniet; i' 'taient pus p'tites. Les vaques 'taient traites à la main. En hivé, y'avait l'usage dé lantèrnes pour la leunmiéthe pour la traithie et souongni les bestchiaux.
Au s'tembre, les fèrmièrs allaient coper la feûgiéthe sus la falaise. Ou sèrvait pour du liet pour les couochons et les bestchiaux. I' copaient du geon pour les j'vaux et i' 'tait pâssé dans eune machinne qui l'copait tout p'tit et ch'na lus était donné auve dé l'avaine.
Dans la maîson, ch'tait des lampes à paraffinne pour la veue, et pis lé grais à fou pour sé caûffer au sé.
À Noué, nou caûffait lé grand fou auve du geon et du bouais, et nou boulandgait du pain sus des fielles dé chour, d'la gâche à fou et des pais au fou.
Nou pâlait tréjous en Jèrriais, car touos les vaîsîns 'taient des Jèrriais. Ch'tait-là la langue des temps-là. Ch'tait-là la vie dé nos jannes jours.
I' faut espéther qué j'pouvons tâchi dé prêsèrver tout ch'na qui nos à 'té donné dans l'pâssé.
Viyiz étout: