Fort Lauderdale, Florida,
U.S.A.
Lé 17 dé janvyi, 1976.
Moussieu l'Rédacteu,
Eune lettre èrchue dreinement d'Jèrri mé donne la triste nouvelle du décès d'eune anmie d'St. Brélade, Madanme Margaret (“Maggie”) Benest, née L'Boutilyi, d'La Sergenté à La Mouaie. Eune charmante danme si janmais y'en a ieu ieune, et j'profite dé ch't' opporteunité pour présenter mes condoléances à ses deux filles et lus fanmil'yes, et à sa soeu, Mdlle. Kathleen Marté L'Boutilyi.
I' s'en vont à grands pas, les vièrs anmîns. Quand jé d'meuthais à La Mouaie siez mes parrain et marraine d'Aubert, j'prannais lé “train” dé là touos les jours pour aller en ville où'est qué j'tais dans l'office à Moussieu Charles William Binet, Êcrivain. Madanme Walter Benest et san p'pèe, lé Juge John Edward Le Boutilyi, 'taient mes compangnons dé viage dans l'train, Madanme Benest (Mdlle. Le Boutilyi dans chu temps-là) en c'mîn pour lé “Jersey Ladies' College”, et l'Juge en c'mîn pour la Cour Rouoyale, L's Êtats et ses conmités. Si ma mémouaithe né m'trompe pon, i' m'sembl'ye qué touos les conmités d'La Chambre Législative 'taient présidés par les Juges dans l'temps.
L'engîn du train, comme nou-s-appelait lé “locomotive”, n'am'nait qu' eune longue carosse, preunmié clâsse d'un but et s'gonde dé l'autre, à La Corbièthe, et j'allions en preunmièthe jusqu'à St. Aubîn. Arrivés là, nou changeait en s'gonde, et l'Sieur Harold Dart, tchi travaillait pour lé jouailli Pearce dans La Rue d'Drièthe en ville, lé Sieur George de la Haye, tch'avait eune boutique à p'tun là, et l'Sieur Falle, d' “Opporto House” à St. Aubin, tchi travaillait pour la boutique Le Riche dans La Rue Beresford, v'naient lus assiéthe auve nous. L'engîn houtchait d'aut' carrosses à la cheinne tch'avait 'té à La Corbièthe, et nouos v'la en c'mîn pour la ville.
À Bieaumont, lé Sieur Hedley Le Riche Edwards, pus tard Avocat et Juge, nouos jouaingnait dans nouot' carrosse. En preunmié clâsse j'm'èrsouveins d'vaie, entr'autres, s'înstaller touos les jours, lé janne Dickson, fis du gérant Dickson dé “Jersey Railways & Tramways Limited”, et l'janne Moussieu Robert Le Feuvre, des Nièmes (san mênom 'tait “Beau-Beau”), tch'allaient à l'êcole au Collège Victoria. Messire William Henry Venables Vernon, Bailli d'l'Île, montait dans l'train à Bieaumont étout, ayant marchi là d'siez-li, “St. Peter's House” - eune bouanne distance. Et d'tchique bord entre Bieaumont et l'Mont Patibulaithe (j'ai oublié justément ioù), Moussieu William Smythe Le Masuthi, Êcrivain et Député, dé mémouaithe respectée, lé p'pèe à Messire Robert Hugh L'Masuthi, dreinement Bailli d'l'Île, montait à bord du train étout.
Dans chu temps-là, Mêssieux Walter et Snowdon Benest, pus tard Connêtabl'yes dé St. Brélade et d'La Trinn'té en mème temps, et Sydney George Crill (lé p'pèe a nouot' respecté Député Bailli actuel), pus tard Connêtabl'ye dé St. Cliément et Êcrivain 'taient clèrcots dans La Rue ès Trais Pigeons, Sydney George Crill et Snowdon Benest dans l'office dé Moussieu (pus tard Juge) George Philip Crill, et Walter Benest dans l'office dé Thomas Dorey, Écuier, Dénonciateu.
Les deux fréthes Benest et Sydney George Crill avaient d'mangnifiques vouaix et chantaient souvent ès concèrts et - j'n'en sis pon trop seux, y'a si longtemps d'chenna - i' m'sembl'ye, tch'i' gângnaient des prix à l'Eisteddfod. Hedley Le Riche Edwards 'tait dans l'office à Le Masuthi et Giffard. M'n anmîn l'Êcrivain Philip Poch 'tait dans ch't' office-là étout, et san nom y fut ajoûté quand i' pâssit s'n examen pour Êcrivain.
Un autre anmîn dans la fanmeuse Rue ès Trais Pigeons, qué j'vîsitis plusieurs fais à La Côte, 'tait Stanley Hotton. Il est entèrré dans l'chînm'tchiéthe dé l'Églyise Anglyicane dé St. Pièrre, à Grande Grève, à La Côte. Hélas! De touos ches'-là, i' n'y a qu'mé et Philip Poch du rang des vivants. Et i' n'y a qu' mé d'la dgaîngue tchi n'a pon 'té titre. Les Sieurs Benest et Crill fûdrent Connêtabl'yes, Hedley Edwards Avocat et Juge, Snowdon Benest, Sydney Crill et Philip Poch Êcrivains, et Stanley Hotton gérant des runs “Hyman” à La Côte. V'la tchi montre qué nou-s-apprannait un p'tit pus qu' à conter les pigeons dans lus fanmeuse rue!
Ch'tait r'mèrquabl'ye qué des deux fréthes Benest fûdrent Connêtabl'yes en mème temps, mais i' y'a ieu un aut' patheil cas. Lé Sieur Francis Vibert Le Feuvre (pus tard Juge) 'tait Connêtabl'ye d'St. Pièrre en mème temps qu' san fréthe, Philip John Le Feuvre, 'tait Connêtabl'ye d'St. Ouën.
Autrément qu' la triste nouvelle du décès d'Madanme Benest, j'n'ai pon d'nouvelles dé Jèrri dreinement, et j'mé d'mande tch'est tch'a gângni l's êlections du mais pâssé pour Députés et Juge. La dreine gâzette èrchue est l' “Jersey Weekly Post” du 20 d'novembre. Heutheusement qu' j'ai héthité un mio d'la pacienche dé nouos anchêtres et qué j'peux pâsser man temps à reunminner!
George d'La Forge
Viyiz étout: