Si par chance y'a d'vos lecteurs, Moussieu l'Rédacteur des Chroniques, tch'y voudraient dithe autrement, j'm'en vais lûs prouvé tch'ils ont grand tort. J'ai vêtchu ichin en Jêrri toute ma vie, et dans l'couothant d'bétôt huiptante ans j'ai veu bein des changements. J'm'en vais en mentionné tchitchuns tchi n'peuvent sinon convaicre les incrédules :-
A qu'menchi, quand j'tais mousse, nou trouvait l'pèthe, la mèthe et l's'êfants tous reunis siez-yeux quand v'nait l'sé. Ach'teu l'bouonhomme et la bouonnefemme sont assis yun d'chaque bord du feu touoseurs. N'y'a pûs d'vie d'famillye. - Une signe de progrès!
Man pèthe avait une ferme du quarante vrégies. Ou tait louée à quatre louis, et en travaillant bein du le bouonhomme péyait san qu'min, mais pûs d'une fais ch'tait par la grâce des marchands et la bonté d'la Providence. Ach'teu la ferme appartcheint à un Angliais, et l'heutheux locataithe paie douze louis, et sa tête qu'menche à grîsi. Sans autchune doute, ch'est du progrès!
J'tiomes un fliantchet d'mousses, mais presque tout chein qu'nou mangeait tait produit sûs la ferme. Y'avait tréjous du lard, et quand nou voulait tué nou n'se gènait pas des abattoirs. Ach'teu nous ordonne les provisions par telephone. Il est vrai qu' chonna couôte pûs, mais ch'est mains d'peine: Ocquo du Progrès!
Y'a huiptante ans les lieux d'tchulte tait remplyis' partitchuliéthement les chapelles. J'fut à un sérvice y'a tchique temps, et y'avait douze personnes dans la congrégâtion. Ch'tait en Angliais, et l'prédicateur fut bein près d's'engouë deustrais fais en tâchant d' prononcé les longs mots. A l'eglyise le préchain dimanche, le Récteur prêchit un raide bouon sérmon a huit auditeurs. Du Progrès!
Pâslant d'Récteurs, quand nous en rencontrait yun dans chais temps-là, nou hallait san chapé. Ach'teu, les gens ont d'la peine à dithe bonjour ou bonsouair, sinon quand y veur des r'pathàtions au réctorat, quand nou s'touone de bord. Et pour dêmontré l'réspect qu'j'avons pour nos Récteurs, je l's'avons congédiés d's'Etats, à l'excéption du Doyen, tch'est là pour faithe la prièthe. Oh, tchi Progrès!
Si n'y'a pas d'Recteurs dans l's'Etats au jour d'agniet, y'a des Sénateurs. Au qu'mench'ment nous avait creu tch'y vaudraient bein mûs, et j'comprends qu'y'a ocquo tchiques individus dans la pâraisse de Saint-Sauveux tch'y sont oquo de ch't'opinion-là. Y représentent le Progrès!
Un Juré-Justicier aut'fais tait un grand homme et un bouon Jêrriais réspecté par tout l'monde. Ach'teu nou n'en connais pas la maintchi, car quand y'a une vacance le publyic n'est pas permint d'voté. Mais nou n'se gène pas d'chonna, car, drôlement assez, les bouons Jêrriais n'veulent rain d'la djobbe. Enfin, ch'est ocquo du Progrès!
Dans man temps les fermiers s'entre-aidgaient dans l'temps d'la grande tchéthue, et, pour dithe vrai, dans toutes les saisons d'l'annéé. Ach'teu, n'y'a pas d'grandes tchéthues, et n y'a pas d'séthées d'nier-beurre. Ch'est châtchun pour sé et l'djiablye pour le réstant. Du Progrès!
Nous allait en ville dans l'quêrre ou dans la van au Sam'di. Ach'teu ch'est par môteur, et les piêtons sont en dangi d'lûs vie. Mais tchèsque chonna fait? - ch'est du Progrès.
A Saint-Ou, à la Trin'té, à Saint-Cliément y'avait d's'êléctions, et la vouaix valait la peine d'avé. Ach'teu qu'les fémmes s'en mêlent, et qu'un candidat n'peut pas savé tchèsqu'y fait, ch'est tant d'fichu, et l's'aubérges ne font pas l'profit tchi méthitent. L's'êlécteurs tch'y' sont forchis de s'gardé sobres dithont sans autchune doute que ch'est du Progrès!
Le p'tun tait à bouon marchi, et la litcheu étout. Les fumeurs et les mêssieux tch'aiment un p'tit lérmin crient hourra pour le Progrès!
Y'avait tchiques vîsiteurs quand j'tais mousse, mais pas l'quart assez, J'avons amendé sûs chu compte-là, mais ch'ne s'sa que quand, en êté, les Jêrriais éthont à couochi d'hors et grimpé dans l's'arbres pour être hors de la vaie qu'nou pouôrra dithe que dans chutte diréction-là Jêrri a véthitablyement fait du Progrès!
Y'avait dans chu temps-là une demié-douzaine de gâzettes. Ach'teu, y'en a deux. Ch'est une monopole, mais pour un certain papi ch'est, nous en est seux, le pûs biau signe de Progrès!
Et pour en fini, si nou veur ocquo des signes de Progrès, nou n'a qu'a réfliéchi sûs le nombre de divorces accordées par la Cour Royale, le Taxe sûs le Rév'nu, le Social Assurance, et plusieurs autres bénéfices de tchi qu'notre glorieuse île jouit !
Ocquo une fais m's'amins - Hourra pour le Progrès!
L'Onclye Ph'lip
1953
Viyiz étout: