Les Pages Jèrriaises

En mémouaithe dé mes p'tits jours

Jé m'rappelle bein, quand j'tais tout p'tit,
Dé chu dgèrgon si fanmilyi,
Des preunmièrs sons qué nou-s-entend
D'la bouoche d'la méthe tchi vouos apprend.

Des touos p'tits mots, et si aisis,
Châtchun connait bein chu p'tit d'vis;
A peine hors du bèr nou les sait
Tous par tchoeu d'vant pouver pâler.

Les touos preunmièrs tchi m'veinnent à l'ouïe­
“Pé-pèe”, “Mé-mèe”, bein seux, et pis
“Pa-pa”, “Man-man”, un p'tit pus tard,
Pouor mé dêjà les deux vieillards.

Quand j'avais faim, quat' fais par jour,
Ch'tait du “naine-naine” qué j'piaillais pour,
Et nou m'donnait bein vite man lait,
Du papa caud ou du grué.

Respé vouot' honneu - tout poli,
Pouor ses bésoins ch'tait faithe “pi-pi”,
Véthe, étout, quand ch'tait pouor aller
Ch'tait faithe “ca-ca” qué nou dîthait.

Tchiquefais j'tais bèrchi par man p'pèe,
Mais j'ouïyais des lèvres d'ma m'mèe -
Là, fai “lô-lô, tu'as grand sommé,
Man chièr pétchiot, là, endors-té!”

Et quand par chance jé m'trébutchais,
Ch'tait du “ma-ma” qué jé m'faithais,
Quand j'avais tchée ou fait tchique dro
Fallait “plieuser”, “çu” pouôrre pétchiot.

Mais quand jé m'promenais auve nouos gens
Dans ma cârrosse par un bieau temps,
Lé mot dé tous qu' j'aimais bein ouï
Aller à “dè-dée” . . . tchi pliaîthi!

Aller à “jo-jo” (ou à j'va),
Ch'tait pus souvent sus l'genou d'man p'pa;
Combein d'chucrîns qu' j'ai ieu d'donnés
Ah, des “dou-doux” par la pap'sée!

Pis dans les livres dé bieaux “bi-bis”
J'tais tout à ièrs, mouôn Doue d'la vie!
J'faithais “cou-cou” - un bein bouôn ji -
A man tout seu pouor mé muchi.

Y'en a acouo, qu' ma mémouiathe tcheint,
Qué jé m'rappelle tout à fait bein -
Un oeu des glinnes 'tait un “co-co”,
Et nouot' nièr tchian lé gros “ouo-ouo”.

I' n'faut pon craithe qu' ch'est du bêtîn,
Qué chu dgèrgon est du niolîn;
Dans toutes les langues nou trouve chu d'vis
Tout prînmitif du temps jadis.

 

F.L.M

 

Vèrsion împrînmée pouor l'Eisteddfod:

En Memouaithe dé Mes P'tits Jours


Jé m'rappelle bein quand j'tais tout p'tit,
Dé chu jèrgon si familyi,
Des preumièrs sons qué nou-s-entend
D'la bouoche d'la méthe tchi vos apprend.

Dé simplyes p'tits mots et si aisis,
Nou les prononce tréjous en bis,
A peine hors du bèr et nou les sait
Tous par tchoeu d'vant qu'nou piêsse pâler.

Les touos preumièrs tchi m'saute ès yeux
“Pé-pèe” et “mé-mèe,” et pis, bein seux,
“Pa-pa” et “man-man” un p'tit pus tard,
Pour distindgi les deux vieillards.

Quand j'avais faim, quatre fais par jour,
Ch'tait du “naine-naine” qué j'criais pour,
Et nou m'donnait eune trempée d'lait,
Du papa caud et du gruai.

Eune autre expression tch'est familiéthe,
Qu'j'apprins bein vite des lèvres d'ma méthe,
Ch'tait faithe '”lô-lô” quand j'avais sommeit
Et quand j'dormais dans man p'tit iet.

Et si parchance j'tais trébutchi,
Ch'tait du “ma-ma” pour lé pouorre pétit,
Si j'avais tchée et fait tchique dro
Fallait “plieuser,” “çu” pouorre pétchiot.

Pour mé promener auve mes pathents,
Dans ma carrosse ch'tait bein pliaisant,
Et l'mot dé tous qu'j'aimais hardi -
Aller à “dée-dée” -un grand pliaisi.

Aller à “ jo-jo” ou bein à j'va
Ch'tait pus souvent sus l'genou d'man p'pa
Cornbein d'chucrins quj'ai ieu d'donnés,
Ch'tait des “doux-doux” par la papesée!

Les bieaux “bis-bis” dans les papièrs
En les r'gardant j'tais tout à yièrs,
J'faisais “cou-cou” - un bein bouon jeu
Quand j'voulais m'muchi - à man tout seu.

Acouo deux'trais qu'ma mémouaithe tcheint,
Qué jé m'rappelle tout à fait bein
Un oeu dans sa cruque s'appelait “co-co,”
Lé gros nièr tchian ch'tait not' “ouo-ouo.”

I' n'faut pas craithe qu'ch'est du bêtin,
Qué chu jèrgon est du niolin,
Dans toutes les langues nous trouve chu d'vis
Tout primitif, du temps jadis.

F. Le Maistre

 

Viyiz étout:

 

Les Pages Jèrriaises