Lé progrés
Trenton, Michigan, USA.
Lé 23 d'janvyi, 1982
Moussieu l'Rédacteu,
"Nou-s-a danme tchiquefais cause à aver peux dé chein qu' nou-s-appelle lé progrès," un fèrmyi disait à Papa dans la forge eune matinnée quand j'tais mousse
"Eh bein." Papa lî dit. "ch'est comme dans toutes choses y' a l'trop et l'trop p'tit et l'trop à pêtri. Par exempl'ye, j'sommes à faithe des tchéthues en fé, à ch't heu, à la pliaiche dé les faithe en bouais. Ch'est l'tchèrpentchi, don, tchi crait, dans chu cas lâ, tch'i' y'a trop d'progrès par les c'mîns. Mais, à m'n idée, nou n'peut pon l'arrêter.
"Ergarde tch'est tchi s'arrive dans nouos chantchièrs dépis tch'i' sont à bâti des navithes en fé à la pliaiche dé bouais. I' dispathaîssent à grands pas, les chantchièrs. Jé n'sai même pon si y'en a d'restant, à mains qu' j'en s'sait iun ou deux p'tits tchi bâtissent des p'tits batchieaux pour aller à la pêque lé tou d'nouos côtes.
"J'pense qué l'drein navithe pour aller à La Côte et à Tèrre Neuve d'valit d'ssus l'chantchi à Maît' Jean Picot à Gouôrray y'a eune tchînzaine d'années. Si ma mémouaithe né m'trompe pon, ch'tait en mil hui chent huiptante-six. Y'a si longtemps qu' j'ai 'té trop embarrassé dans la forge pour aller à Gouôrray que jé n'sai même pon si y'en a iun d'restant l'long d'la côte tch'y mêne, à Gouôrray."
"Mais où'est qu' les navithes en bouais sont r'graies quand il' ont bésoin d'èrpathâtions?", tchitchun d'mandit à Papa.
"Eh bein," i' s'fît, "i' peuvent aver des r'pathàtions ordinnaithes dans la cauchie en ville. Quand ch'est eune affaithe dé r'pather la bordaille du bord dé la côsse du navithe, et la tchèrlîngue et l'oursas, v'là tchi peut s'faithe par les tchèrpentchièrs â mé bâsse. I' peuvent travailli dans la câle et sus les ponts et les mâts et autcheune partie en bouais dans l'navithe. Et nou peut tréjous èrgraie l's agrès des mâts d'un navithe n'împorte ioù tch'i' s'trouve si l'matériel nécessaithe est d'amain. Mais quand i' faut travailli sus la tchelle, il est nécessaithe dé caréner l'navithe et v'là tchi prend trop d'run pour lé faithe dans des p'tites cauchies.
"Eune fais, quand j'tais naviguant et qu' man navithe 'tait dans la Mé des Caraïbes, j'allis vaie la grève où'est qué l'fanmeux Amitha Lord Nelson soulait caréner ses grand' frégates quand i' faîsait la dgèrre ès Français dans l's Îles Indgiennes Occidentales. I' fallait du run dans ches cas-là, car des grands navithes dé dgèrre 'taient formidabl'yes. Nou peut acouo en vaie iun, lé Victory à Nelson dans tchi tch'i' gangnit la Batâle dé Trafalgar en mil huit chent chînq. Comme lé temps s'pâsse! Y'a déjà nénante-chînq ans dépis tch'il y pèrdit la vie, lé fanmeux Nelson, à chutte batâle Lé Victory a 'té prêsèrvé comme monument national à Porchémue, et nou peut aller à bord en payant tchique pétite chose pour aîdgi à l'prêsèrver.
"A ch't heu, lé progrès nouos a apporté des navithes en fé tchi veinnent en Jèrri aussi souvent comme i' veulent dépis tch'i' vont à la machinne et n'ont pon à lus fier sus un bouân vent."
"A m'n idée," s'fît iun d's hommes dans la forge, "ch'est du progrès à l'arbours. Pourtchi bâti des navithes dé dgèrre en fé quand les grand' frégates en bouais gângnaient des batâles comme à Trafalgar?"
"Eh bein," Papa' lî dît, "comme j'vouos l'disais, nou n'peut pon l'arrêter, l'progrès. Et il apporte souvent d'l'amendement. Èrgardez les machinnes à pédaller qué l's Angliais appellent des "bicycles". All' ous m'dithe qu'à ch't heu, en l'année mil neu chents, les machinnes qué j'avons, auve deux reues d'la même grandeu, n'sont pon miyeuthes qué les cheinnes tch'avaient eune grand' rouelle et eune toute pétite en driéthe les "penny farthing" du temps pâssé tch'étaient si aîsies à s'rompre l'co d'ssus?"
"Et l's ardouaises tchi sont à faithe sèrvi pour couvri les maîsons; v'là tchi s'en va haler l'pain d'la bouoche des couvreurs. Est-ch' du progrès?", s'fît un autre homme.
"Quant à ch'là," Papa lî dît, "i' faut penser qué l's ardouaises s'en vont duther pus longtemps qué l'glyi, et les liefs éthont mains bésoin d'erpathâtions. Les couvreurs s'en vont aver à apprendre à les faithe sèrvi. Tout considéthé, j'créthais qué nou peut dithe qué ch'est du progrès. Par contre, j'crains qu' un tas d'chu progrès s'en va boulevèrser la trantchillité d'nouot' paîsibl'ye vie du temps jadis, mais la fîn du temps f'tha tout vaie!"
Viyiz étout: