'Dis-mé,' mé d'mandit l'Ph'lip Desclios Dîmanche passé en r'venant d'la chapelle, 'v'la tchi fait trais ans dépis qu't'és érvènu en Jèrri, tchesqu'est l'pus grand changement qu't'ais veu inchein dépis l'temps qu'tu t'en fus?'
'Quand J'm'en fus en trente deux,' j'lis dis, 'Jèrri appartenait acquo ès Jèrriais et ch'tait nous qui coundisaîmes nos affaithes. Dans l's'Etâts, par exemply, les membres 'taient buoans Jèrriais, et les gens qu'avaient drouait d'vouaix 'taient présqué tous Jèrriais. Y'avait tchiques Angliais, mais, bah, rein qu'eunne faillie p'tite djaingue, pas assez pour faithe dé différence. Et les êtrangièrs qui vivaient ichein ch'tait d'vrais messieus. I' savaient s'coumporter et n'tâchaient pas d'nos dithe tchi faithe. Tandi'qu'au jour d'aniet y'a jé n'sai pas coumbein d'êtrangiérs dans l'sEtâts, y'a bein pus d'êtrangièrs qué n'y'a d'vrais Jèrriais qu'ount drouait d'vouaix, et parmi ches êtrangièrs y'a d'la racaille coumme nou'n'en avait jamais veu. Ch'est là l'pus grand changement qu'y'ait ieu, mais y'en a bein d'autres qui poussent d'la même racheîne. Dans l'temps j'taîmes tous fèrmièrs ou dans eun mêtchi qu'avait à faithe au fèrmage. Et nou' s'entré counnaissait tous. Quand nou' sortait dans la vainne ou l'quèrre et qu'nou' rencountrait tchiqu'euns, nou' s'arrêtait lus pâler: achteu, dans des motos ou sus des tracteurs nou' passe les gens sus la route sans même les r'garder. Et si eun vaîsin 'tait malade ou en embarras nou'lis dounnait eun coup d'main. Jé m' rappelle qué quand not' êtablye à vaques en Egypte brûlit not' vaîsîn Charlé B'nest dêhallit touas ses ôtils dé s'n appentie et les pitchi d't'hors dans son bel pour faithe du reun pour nos bêtes, et j'les gardîmes là presqué trais mais tandi' qu'i' taient à r'bâti not' êtablye. Jé m'd'mande si les gens d'au jour d'aniet s'raient aussi av'nants envers lus vaîsîns qué l'boun'houmme Charlé B'nest.
Et pis, bordées d'tchéthue ou d'batt'ie, nou' s'entre aidgait; si ton vaisin avait vingt v'régies d'terre à touônner et qu't'en avais qu'tchinze tu n'lis disais pas qué tu n'y'aidrais à en touônner qué tchînze des siennes; s'il avait pus d'vainnées d'avaine à battre qué té, tu n'rouspétais pas qu't'avais fait pus pour li qu'i'n'avait fait pour té. N'y'a pas, mon Ph'lip j'taîmes bein pus pauvres dans chu temps-là què jé n'soummes achteu, mais j'm'êmes quandmême eunne bein miyeuthe vie.'
'Ah, t'as raisoun' s'fit l'Ph'lip,' au jour d'aniet les gens n'savent pas vivre, tout ch'qui veullent ch'est d'faithe des sou. P'têt' qu'i' pensent qu'i' s'en vount l's'emporter avec ieux au chimtchiéthe. Mé j'sis d'avis qué les gens qui n'pensent qu' à faithe des sou sount vraiment bein pauvres'.
Et d'même, ou' viyiz, buoannes gens, lé Ph'lip et mé j'vivouns dans l'passé et jé n'savouns pas nos y prendre. Mais, à ch'tchi paraît, y'a hardi d'messieus en ville qui n'savent pas s'y prendre nintout, car i' s'coumptent pus malins qu'i' n' sount et i' sount en dangi dé s'trouver en boête. Le vie d'fripoun est p'têt' pus excitante qu'la vie d'eun vièr fèrmi, mais quant à Ph'lip et mé, j'aimouns mus nos dépiautchi du mus que'j'pouvouns coumme buons Jèrriais qué d'vivre en style et en grande ténue coumme riches fripouns.
Viyiz étout: