La vie en Jèrri au jour d'anniet est tout à fait difféthente qu'ou n'tait i' y'a eune trentaine d'années.
J'm'en vais c'menchi par les êfants et toutes les chances tch'il' ont, comme autant dé jouettes et jeux tch'i' n'savent pon tchi en faithe. I' sont amuthés auve la télévîsion et, dans bein des cas, auve dé tchi tch'i' n'dévthaient pon vaie.
I' y'a des groupes 'chîn et là pour l's avièrs en d'ssous d'chînq ans et où'est tch'i' vont jouer et peindre, etc., pour lus accouôteunmer ensembl'ye. Sans doute, il' y sont portés et ramassés en moto. À chînq ans la mâjorité c'menchent l'êcole, transportée la même chose, et pis à m'suthe tch'i' craîssent l's uns vont en Ville par bus ou même sont portés jusqu'à l'êcole!
Il' ont toutes sortes dé sujets à apprendre et d's opporteunités încriyabl'yes pour être prêt à gângni lus vie. Et pour les siens tchi veulent aller ès unnivèrsités i' y'a d'l'assistance pour lus dêpens. Mais i' n'faut pon oublier qué duthant lus êcolage un ênorme temps est pâssé à jouer bein des jeux - toutes sortes dé gammes dé balle, à nagi, enfin, tout pôssibl'ye.
Les siens tchi chouaîsissent dé tchitter l'êcole quand i' peuvent, lus mettent à gângni lus vie et bein vite à ramasser dé bouons gages - pas d'apprentis, comme au temps pâssé! Un coup tch'il' ont dgiex-huit ans i' veulent presqué tous acater eune "motor-bike" ou un moto, la mâjorité en payant tant la s'maine, i' n'y a pas d'doute. Pas d'argent comptant à ch't heu! Est-che étonnant qué les routes sont remplyies d'traffi?
Auprès tchiques années l's uns pensent à lus mathier. Sans doute ch'n'est pon aîsi à trouver eune maiethon, mais les siens tchi veulent lus déhaller tâchent d'en aver ieune à ieux-mémes. Et pour lus aîdgi l's Ètats lus prétent des sou à bas întéthét à condition, sans doute, tch'il' en aient un bouon montant à mett' bas d'avanche. I' y'a tchiques complyicâtions, bein seux , mais l'résultat lus en vaut bein la peine.
Quant ès pus vièrs, faut dithe dé quarante à chînquante ans, i' sont pus établyis, auve touos lus conforts et c'modités, et probabliément eune pus grand' maiethon et moto, car i' les changent souvent. I' prannent des vacances eune fais ou deux par an, et ch'est l'Améthique, lé Cannada ou l' Australie tch'i' vîsitent, pas la France ou les pays pas bein liain d'Jèrri.
Les gens dîthent qué les sou n'ont pon grand' valeu, et un coup tch'i' les gângnent i' les dépensent. Si ch'n'est pon à viagi, un grand nombre ont des batchieaux pour aller lus prom'ner quand i' n'sont pas en travas. I' y'en a tellement dé nos jours qu' l's Êtats ont 'té forchis d'fourni hardi pus d'amathages dans La Cauchie d'la Ville et à La Collette.
J'ai dêjà mentionné l'êducation, l's opporteunités pour la jannesse et pour les pus vièrs, et la belle vie tch'i' sont tous à joui, mais i' y'a bein d'aut's choses qué j'éthais peu mentionner. Èrgardez la gâzette au sé et comptez l'nombre d's annonces pour restaurants, hôtels et lieux d'amûthement tchi sont si bein patronisés, ou bein i' n'pouôrraient pon continnuer!
La chose en est à ch't heu qué touos les travailleurs, qué s'sait les siens auve des empliais ordinnaithes ou d'bein hautes postes, ont au mains dé deux à quatre s'maines dé vacances, temps payi, par an. Lé temps pâssé les jours dé vacances 'taient les jours dé fête dé l'Églyîse, comme Noué et Pâques, mais auve les unions ch'est eune affaithe d'autchunne extchûthe pour un jour d'extra sans travas, ou bein doubl'yes gages! Eune belle vie - véthe dgia!
Un aut' bénéfice qué tous ont, ch'est les pensions. pèrsonne n'ont béthoin d'travailli pour sauver pour lus vièrs jours, comme au temps pâssé - "garder eune pomme pour la sé" comme i' dîthaient. Malgré tch'i' y' a tant d'fait pour les jannes, jé crai qué i' y'en a acouo pus d'fait pour les malades. Èrgardez la belle grand' Hôpita et tout l'appatheil là d'dans et l'soin donné ès siens tch'en ont béthoin. Pour eune p'tite île comme la nôtre ch'est absolument mèrveilleux.
Les anciens sont souongnis sus touos sens; i' y'a tant d'fait pour lus aîdgi et lus soulagi sus lus vièrs jours. Comme jé savons tous, i' y'a eune êcarcité d'louages, et d'même des paraîsses ont fait bâti des d'meuthes pour les siens tch'en avaient béthoin. Ches vielles gens sont louogies sans gêne, pas sans payi s'i' peuvent, bein seux. Les siens capabl'yes dé lus souongni l'font, et pis autrément i' y'a des înstitutions dé difféthentes catégories pour les malades à y'aver les soins nécessaithes auve touos lus conforts.
I' n'y a pas eune êcarcité d'maiethons pour les gens tch'ont tout pliein d'sou et tchi sont v'nus d'meuther ichîn dans d'belles propriêtés. Nou les vait dans la campangne, auve dé bieaux gardîns, longues caches à y'aller et tout ch'qu'en dépend. Mais, où'est qu'les jannes fèrmièrs Jèrriais s'en vont lus trouver à l'av'nîn? I' n'y a pon hardi d'ménages à louer à ch't heu, et bein d'la tèrre a 'té gavachie par les grand's péthantes machinnes et la bâtithie partout. Dites mé! Iou qu'les siens tch'i' faut tâchi d'encouothagi à maînt'nîn l'fèrmage s'en vont trouver, ou affaûrder, les hauts prix d'mandés pour la tèrre pour continnuer à craître la fanmeuthe patate, la Rouoyale, si bein connue pour san bouon goût, et garder nos vaques Jèrriaises, nouot' vielle race, èrconnue partout l'monde pour sa bieauté et san lait si riche?
Lé tourisme a fait hardi pour am'ner des sou, mais combein d'nâtionalités tchi lus sont établyies ichîn à cause du tourisme? I' veinnent pour travailli dans l's hôtels et restaurants et finissent par d'meuther ichîn, lus y mathyissent et ont d's éfants tchi sont comptés Jèrriais.
Mais i' y'a un but à toutes choses et l'couôtage est ênorme pour touos ches bénéfices. N'est-t'i' pon temps d'mettre arrêt à tout chenn'chîn et d'n'oublier pon nout' héthitage? Sus toutes choses, garder les Jèrriais en poste et, bein împortant, lé système honorifique, eune manniéthe dé gouvèrner unique dans l'monde, en allant à janmais!
Vive la vielle chanson "Man bieau p'tit Jèrri." Piêsse-t'alle étre chantée pour tréjous!
E. L. Le Mottée
Viyiz étout: