La rêunion mensuelle eut lieu vendrédi, lé 24 dé janvyi, dans la Salle Pârouaîssiale dé La Trinn'té, et dans les 130 membres lus y rêunîtent pour un dêbat, "Jèrri s'en va ès tchians".
D'vant c'menchi, les affaithe eûtent lieu. Lé Président, lé Connêtabl'ye W.J. Tomes, d'mandit à la Sécrétaithe dé liéthe lé rapport du sèrvice dé Noué et auprès la correspondance. Y'esut chînq nouvieaux membres d'êlus.
I' n'y'avait pas d'autres affaithes et lé Président mînt lé restant d'la séthée dans les mains du Vice-Président, lé Connêtabl'ye R.H. Le Cornu, qui prînt la tchaise pour lé dêbat et întroduisit les dêbateurs - Lé Sénateur J.J. Le Marquand and [sic] lé Sieur E.W. Vautier pour lé sujet et les Députés S.P. Le Ruez et P.M. de Veulle contre la proposition.
Lé Vice-Président les r'mèrcyit pour être v'nus et dit qu'i' 'tait bein seux qué les membres s'en allaient aver eune bouanne séthée.
Ch'est împossibl'ye dé donner un rapport pour les membres tchi n'vîntent pas, à apprécier la bouanne séthée qu'eut lieu. N'împorte: n'en v'chîn tchiques détailes:-
Lé Sénateur Le Marquand mînt lé sujet divèrsément bein et amusit les membres et pâlit séthieusement étout. tch'est qué lé sujet veurt dithe vraiement - "Jèrri s'en va ès tchians"? Lé sénateur Le Marquand dit qué quand nou disait dans san jeune temps qué tchiqu'uns s'n allaient ès tchians ch'tait un signe dé décadence, qué lé monde 'taient à vivre à pus qu'lus moyens.
La vie Jèrriaise 'tait pus sîmpl'ye, la capacité dé l'houmme dé travailli dû, et la femme avait à sauver et coyi. Lé monde avaient pus d'întelligence et mains d'êducation qu'au jour d'aniet. I' faîsaient sèrvi lus întelligence commune. les fèrmes 'taient gardés bein mais pas sans mînséthe; la tèrre 'tait bein travaillie et engraissie. Y'a pas un j'va au jour d'aniet qui pouôrrait m'ner eune tchéthute. L'înfluence qu'est v'nue ichîn a changi l'Île, et la manniéthe dé vivre nos a întroduit à eune autre vie; j'nos soummes laîssis m'ner par du monde qui n'savent pas seulement coumment vivre siez ieux. La ville a changi; y'a pas d'autre dé Louothains (Laurens) ni dé vielle boutique où'est qu'nou pouvait acater dé tchi ordinnaithe, par exempl'ye des c'mînses et braies pour lé travas d'fèrme. Nou peut pas seulement bâti coumme nou veurt, et y'a des pouôrres malheûtheux couochons à couôrre partout! Lé Sénateur dit qu'il 'tait convaîntchu qué Jèrri était hors du mauvais bord, et dit qu'un Jèrriais n'accepte janmais les veues dé l'opposition; ch'est un signe dé faibliesse!
Lé Sénateur Le Marquand ayant mîns san point, lé Député S.P. Le Ruez c'menchit à sé d'fendre en pâlant des pigeons qu'ont envahi la Cour, et dé si bieaux ouaîsieaux si întelligents. Lé Député amusit les membres étout et êprouvit à les convaincre qué Jèrri s'n allait pas ès tchians, et dit coumment qu'i' y'avait des femmes coumme docteurs, et quand les femmes ont d's êfants i' n'sont pas oblyigies dé rester à la maîson car y'a du monde prêts à les souogni. Nout' marchi ch'est iun des pus bieaux au monde. Nou peut y faithe toutes ses commissions. Y'a des stâles à lédgeunmes, flieurs, la poste, eune pliaiche à aver du thée et tout qu'i' faut. Les maîsons ont eune salle dé bain. les vielles gens sont hardi bein souognies et y'a tant d'tchi d'fait pour l'êducation; y'a pas autcheun êfant privé et les Êtats ont acaté "Highlands". Lé monde sont hardi charitabl'yes; quand nou vait tout qu'est fait pour les pouôrres malheutheux. Lé Député Le Ruez dit qu'i' faut être optimiste et i' 'tait bein seux qu'i' faudra qué l'monde touônnent à l'Êglyise pour qué tous s'saient heûtheux. Lé Député èrmèrcyit L'Assembliée pour aver 'té d'mandé et tous pour aver êcouté chein qu'il avait à dithe, et dé n'faithe pas lus opinion dévant aver ouï lé Député P.M. de Veulle.
Lé Sieur Vautier s'gondit la proposition et tâchit d'aîdgi à convaincre les membres qu'Jèrri s'n allait ès tchians, s'i' n'tait pas compliètement hors dêjà. I' pâlit dé l'Agritchultuthe et coumment qu'i' y'a pas moyen d'arriver sus la caûchie. Lé monde 'taient bein mus d'travailli; pas auvec touos les bénéfices qu'il' avaient à être malade.
Lé Député de Veulle 'tait bein seux qué Jèrri n'tait pas hors ès tchians et s'n allait pas y'aller. Quand nou r'garde et vait toutes les magnifiques banques qu'y'a, est-che là un sîgne qué Jèrri s'en va ès tchians? Y'a pus d'monde qui veinnent ichîn rester, et lé monde né veulent pas lus en aller car i' savent bein iou qu'i' y'a d'la stabilité. les gens sont bein souognis; y'a dé bouannes pensions pour aîdgi à tous. Si ch'est qu'l'Île s'en allait ch'est eune réflection sus les Jèrriais car ch'est ieux qui votent pour lé monde dans les postes d'împortance. Lé système honoraithe est magnifique; lé r'vénu a quadruplé dans dgiex ans. Y'a des mille louis dêpensées pour aîdgi à l'agritchultuthe. À l'idée au Député de Veulle Jèrri 'tait bein liain d'aller ès tchians pour bein d's années.
Lé Vice-Président d'mandit ès membres s'i' y'avait autcheune tchestchion qu'il' aim'thaient d'mander ès dêbateurs. Y'en aut plusieurs et pis i' d'mandit ès membres dé montrer si ch'est qu'i' 'taient pour ou contre lé sujet. La proposition en remportit par eune bouanne majorité. Lé Président èrmèrcyit les dêbateurs pour la bouanne séthée qu'il avaient donné et 'tait bein seux qué touos les membres lus 'taient rêjouis, et y'eut d'grands applaudiss'ments. Lé Connêtabl'ye fut r'mèrcié pour la salle et les annonces fûtent faites. Lé jeu d'cartes étha lieu vendrédi, l'21 dé mars, dans la Salle Pârouaîssiale dé St. Pièrre à huit heuthes lé sé. Lé souper fut sèrvi par les membres du Conmité Exétchutif et chenn'chîn am'nit eune bouanne séthée à sa fîn.
Viyiz étout: