|
Je l'dîs, car je n'en mentitheai pon, J'aime le pain qu'est tchuit au geon; Hélas! Ouest qu'est not' jeune temps, Quand nou s'en r'venait tous quotheant, D'l'êcole, pour se mettre à aîdghi, (Les jours qu'nou zavait boulanghi). Dans la boulang'thie, nou s'mettait, A la gheule du fou, pour d's'enfouanné. J'aimais bein, unne tôte de pain, Et pis nou quotheait vite tcheurre, A l'armoièthe, du tout frais beurre; Et nou r'venait vite au tro Pour cherchi un caud bourdelot, Achteu les bourdelots, chest des “baked dumplings,” Pour le podein de fieu, nou dit “baked pudding.” Mais nou n'gangne rein de voulait r'vais Nos jeune annaies, les temps d'aut' faies, Quand meumaie criait tout haut: Garçons Venais, yia de la “gâche à crétons,” Et qu'nou quotheait, “à tchi s'sait” le prumi, Car le prumi v'nu, 'tait l'prumi servit. Dans d'autres temps, chétait: Venaïes, Y yia de la gâche à fouaie, (Oul' 'tait tchique faies amendaie), Mais chétait dans les temps de Noé, La bouanne gâche que meumaie faisait, Y'avait d'la coreinte, et du raîzain, Et oulle avait le goût d'y r'venein, Et pis oquo, y n'y'avait rein coumme, D'la bouanne fraîche gâche à pommes; Et y yiavait la gâche pour allé, Au vraicq d'hivé, et qu'nou mangeait, Damme, avec biaucoup d'piaîzi, En r'venant trempaies de sus l'rotchi; Mais achteu nou n'fait pon ditai, Car les gens n'vont pus au vraicq. Quand j'taîmes p'tits, chetait que l'Sam'di, Que nou viait, “l'cart” du boulanghi, Mais achteu, chest tuous les jours qui vont, Offrî à vendre le pain qui font Le temps passai, châque famille faisait, Tout le pain tchi l'y fallait; De nos jours, n'ou n'pourait pon manghi ch'la, Sans s'piaiendre, d'avè mà à l'estoumà, Et si hou voulaies patheaitre “s'mart,” Y faut manghi des bouans “tarts.” Ou d'autre sortes de ramâs'scies, D'la toute nouvelle pâtich'ie, Que nou va en ville acaté, A la pièche d'en faithe siez sé. Les poules en Egypte, ont perdu l'art de coué, Les femmes en Jerri, le sien de fouanné. Et chest le piano, qu'a rempiaichi, Le tro, tchi servait pour pêtri. Chétait à la femme à soiengni, D'avé du pain tréjous sus l'râcli, Et au boun' houmme d'avait le soin. De faithe craître du bouan grain, De l'battre, et de le netti, Et d'avé tout prêt pour le mougni, Quand y venait, tout exprès, Avec san gheva et san harnais. Le bran (respect d'vous) était donnait, Es p'tits animaux, avec du lait, Mais à tchi bon grondre? N'en v'là asscaies, Criyious bein, et hou verraies, qu'ou s'y s'caies. |
Viyiz étout: