Le Mènage ès Feuvres,
St. Ouën.
Lé 15 septembre, 1973.
Moussieu l'Rédacteu,
Lé temps s'pâsse si vite ches jours qué nou-s-a d'la peine à s'garder au couothant d's êvènements d'chaque jour, et l'vièr diton “Quand nou-s-est janne nou vit d'amour et d'belles chansons” m'veint souvent à l'idée. À ch't heu qu' la vieillèche en gangne, i' faut pûtôt qué j'pense au diton “I' faut vieilli ou janne mouothi”. Et pis v'la tchi mène à un autre : “Les mathiages et l's entèrrements dans les maiethons font des changements”.
J'n'ai pon 'te à bein des mathiages ches dreines années. Ch'est probabliément viyant qué j'sis tréjous à viagi d'bord en autre, mais d'viagi n'm'a pon empêchi d'êt' d'amain pour ouï la clioche dé l'églyise sonner au pas d'entèrrement. Trais fais dans l'couothant d'eune tchinzaine j'ai ieu à siéthe lé corps dé pathent et anmîns à lus dreines démeuthes sus chutte tèrre. V'la tchi s'arrive toutes les fais qué j'veins en Jèrri, et tant d'mes vièrs anmîns lus en vont au r'pos êtèrnel qué j'mé d'mande s'i' y'en étha d'restant la préchaine fais qu' j'érveindrai en Jèrri.
En pâlant d'changements, j'en vai tant qué la vie du temps pâssé n'èrsembl'ye pon à la cheinne d'à ch't heu. Ès entèrrements, par exempl'ye, nou s'trouve à l'églyise ou à la chapelle, généralement en moto, dévant l'arrivée du corps. Et y'a hommes et femmes et un tas d'femmes entrent dans l'églyise nueu-têtes, eune chose tch'i' n'éthaient pon pensé d'faithe dans les vièrs temps. Dans chu temps-là, l's entèrrements avaient un air solonnel. Nou siéthait l'corps à pid, tch'i' fûsse porté à bras ou dans la hèrse, et s'nou faîsait c'mîn par la Rue d'Grantez et la Rue du Couvent nou-s-arrivait au p'tit c'mîn appelé Lé C'mîn d'Corps tchi mène directément au chinm'tchiéthe. Là, nou ouiyait la clioche dé l'églyise sonner au pas d'entèrrement, et nou savait qué ch'tait l'drein c'mîn sus tèrre du défunt.
Arrivés dans l'églyise et l'corps pôsé sus des scabelles en vant d'l'Autel, Moussieu Pépîn continnuait l'sèrvice solonnel appelé “L'Ordre pour la Sépulture des Morts” qué l'églyise ordonne à la page 192 d'la Litourgie. Quand i' v'nait à la Leçon, tchi c'menche au vîngtième vèrset du tchînzième chapitre dé la Preunmiéthe Êpitre dé St. Paul ès Corintchiens, un mangnifique pâssage tch'explyique la transformâtion du corps sensuel en corps spirituel en prépathâtion pour la vie êtèrnelle, i' montait dans la Tchaîthe pour la liéthe à haute vouaix, et nou ouiyait châque mot, net et cliai, d'un but d'l'églyise à l'autre. Quand i' v'nait quâsi à la fîn, en liêsant les belles patholes : “C'est pourquoi, mes frères bienaimés, soyez fermes, inébranlables, abondants toujours en l'oeuvre du Seigneur”, la bieauté d'chu chapitre-là vouos avait quâsi fait oublier la tristesse dé la mort.
À ch't heu la bieauté d'chu sérvice solonnel la est oubliée, et, à sa pliaiche, ch'est l'êloge dé la pèrsonne tchi s'en va êt' mînse en tèrre - êloge tréjous méthitouaithe - et eune lectuthe dé mios dé Psaumes et d'divèrs pâssages prîns ichîn et là dans la Bibl'ye. Jé n'peux don sénon qu' penser qué l'églyise n'est pus consciente dé la bieauté d'san rite et d'sa Litourgie, et tch'i' faut changi tout, pour attither les jannes. Où'est tch'est l'temps qu' les pathents les faisaient aller à l'Êcole du Dînmanche, les jannes, et qué là, la Bibl'ye et d'la Litourgie dév'nait tout naturellement înscrite dans lus idée comme étant un langage à part, biblyique et spirituel - en aut' mots - lé langage d'hièr, d'aniet et d'l'av'nîn d'La Sainte Églyise Catholique dans tchi, d'après nouot' aveu, exprînmé touos les Dinmanches quand j'èrcitons l'Sŷmbole des Apôtres, j'avons crianche?
Quandi qué j'sommes acouo au sujet des changements, y'en a iun, lé ralentissement d'vitesse des motos dans les rues d'la campangne, dé tchi j'ai pâlé si souvent dans ches lettres ichîn qué j'm'attends d'ouï tchitch'uns dithe iun d'ches jours, “I' nouos embête, lé bouanhomme George, auve ses idées arriéthées!” Quarante milles à l'heuthe dans les p'tites êtraites routes des pâraisses est absolûment sans raison, et il est grand temps qu' les Connêtabl'yes prengent sus ieux d's'en d'menter.
Jé d'meuthe ichîn dans eune êtraite route, et ch'est au péthi d'la vie qué nou-s-y marche à pid. I' faut s'coincer dans l'fôssé pour les laîssi pâsser, et souvent i' veinnent si vite, prîncipalement si nou-s-est près d'eune courbe dans la rue, qué nou-s-a à peine lé temps dé l'faithe.
J'viyais dans la gâzette qué dgiex pèrsonnes ont trouvé la mort par accidents d'motos ch't' année. Ch'est tèrribl'ye pour un p'tit pays comme lé nouôtre.
George d'La Forge
Viyiz étout: