Les Pages Jèrriaises

La Séthée d'Nièr Beurre

 

L'Assembliée d'Jèrriais

 

Eune séthée d'nièr beurre (deux jours et eune niet!) fut arrangie par lé Conmité Exétchutif dé L'Assembliée d'Jèrriais pouor lé mais d'novembre 1959, et ch'fut un grand succès. Tchil' arrangements et prépathâtis tch'i' fallit! Nou-s-eut à trouver eune vingtaine dé bathillies d'pommes, du cidre et touos l's ingrédgiens, et pis sans doute eune pliaiche grande assez pouor acc'moder l'fliotchet d'gens qu' nou 'tait seux d'y vaie.

Séthée d'Nièr Beurre

Ch'tait eune telle grande entréprînse qué nou décidit d'en faithe faithe un film, pouor record au temps à v'nîn d'eune occasion toute spéciale dans l's annales dé L'Assembliée. Ch'tait l'Sieur P. Luce, St. Ouonnais d'originne, tchi s'otchupait d'chenna, et il en fit eune mangnifique affaithe. Et don, les preunmièrs portraits ayant 'té prins à c'manchi auve la tchil'lie d'pommes à la fin d'octobre siez l'Chent'nyi Henri L'Feuvre à St. Louothains, l'êtamp'sie (ou faîs'sie d'cidre) siez l'Sieur S. Lé Cornu à St. Louothains, et d'la grand' bordée siez Mess et Missis W. Robert à St. Pièrre quand l'grand fou fut caûffé, pouor fouôngner du pain et tchuithe des bourdélots, du pâté d'pommes, d'la galette à vrai, etc. - tout pouor la bordée d'nièr beurre - vînt les jours dé la fais'sie d'nièr beurre même à "Springfield".

Là étout y'avait ieu un tas d'prépathâtis, les hommes ayant mîns tout prêt pouor lé mêcrédi l'arlévée à deux heuthes et d'mie quand la pèl'lie d'pommes quémenchit pouor dé bouon. Eune chinquantaine dé femmes s'assiévîdrent à des longues tabl'yes à p'ler et à êquarteler à, tigue dé corps et, faut l'dithe, à caqu'ter à en aver lus tchoeu content! Plusieurs mêssieux aîdgaient là étout, à laver les pommes et les mettre prêtes sus tabl'ye. Madanme Gibaut, femme du Président, 'tait en chèrge des raffraîchissements pouor lé jour et sèrvit du thée et eune bouochie dans les quatre heuthes. Et pis à sept heuthes lé sé fut sèrvi un fricot d'pais au fou et du piot !

D'vant huit heuthes un fliotchet d'gens s'trouvit là pouor vaie l'feu alleunmer souos la pêle au trépid, les Sieurs D. d'la Haye et G. L'Mâsuthi étant en chèrge. Lé cidre fut mîns à caûffer et nou l'fît bouoilli jusqu'à tch'i' mollisse d'en par la maintchi, pis les pommes y fûdrent ajouôtés, eune cèrtaine quantité à la fais, et les limons, lé ricolisse et l'chucre. Duthant la niet plusieurs des hommes prîndrent châtchun lus tou à mouer (rêmuer l'mêlange dans la pêle), et deux des femmes restîdrent à lus faithe du thée et lus donner à mangi. Chu procès continnuit toute la matinnée du jeudi et l'arlévée et jusqu'à huit heuthes lé sé. Madanme L. Richard fut en clièrge des raffraichissements.

Dans l'couothant d'l'arlévée L'Assembliée fut honorée d'aver l'Gouvèrneux et sa danme en visite. I' fûdrent èrchus par Moussieu et Madanme Gibaut et l'Conmité Exétchutif, et prîndrent part un p'tit brîn entouor lé nièr beurre en convèrsant auve tout l'monde à l'entou, et pus tard sé mîndrent à tabl'ye pouor gouôter des mèrvelles, des bourdélots et d'la gâche dé pâte. En lus en r'allant lé Général Erskine et sa danme nouos dîdrent comme tchi qu'i' lus y'étaient hardi plieus.

 l'Nièr Beurre Disons qué l'sé du Jeudi, la pêle fut d'scendue d' sus l'feu, les êpices étant mînses dans la pêlée d'nièr beurre la dreine chose, justément d'vant huit heuthes. Lé nièr beurre 'tait fait! I' fut mîns dans des grands bros et des tèrrinnes, et pis un co r'fraidgi nou l'dréchit dans des pots d'eune livre - et y'en avait quâsiment 300 livres! Tout fut vendu dans rein d'temps, châque membre ayant drouait à eune potée.

L'restant d'la séthée s'pâssit en rêvillon - en vielles danses, chansons et amusement arrangi par lé Conmité Dramatique souos la direction du Sieur G. Perchard et sa danme. Y'eut étout des compétitions, et un prix pouor l'habit l'pus originnal du temps pâssé. Car i' faut dithe qué la grand' partie des gens 'taient dans d'bieaux vièrs habits Jèrriais d'aut'fais, les femmes en bannètes ou capotes, ou coêffes dé dentelle et toutes les couleurs et faichons d'belles anciennes robes et châles, et l's hommes en tappeurs et choutinnes, c'minsoles dé molleton, etc. Tchi fouoill'lie d'fréminnes tch'i' d'vait y'aver ieu! À la fin d'la séthée touos les cheins tch'avaient aîdgi fûdrent èrmèrciés, les cheins tch'avaient donné des pommes, etc., du mangi d'eune sorte ou d'l'autre ou tch'avaient aîdgi sus autchun sens à faithe la grand' bordée un patheil succès.

 

 

Viyiz étout:

 

 

Les Pages Jèrriaises