Moussieu l'Rédacteu,
Ch'est auve grand pliaisi qué j'vouos envyie mes félicitations à l'occasion du septante-chintchième annivèrsaithe dé la naissance dé vouot' bouanne gâzette. Dans l'couothant d'ches années-là oulle a remplyi un bésouain d'grand' valeu dans la vie des Jèrriais. Ou' lus a fait à saver tch'est tch'i' s'passait dans les pâraisses dé lus p'tit pays, et dans tout l'monde souos l'touannement du soleit. Ou' lus a donné la chance dé faithe sèrvi ses colonnes pour affaithes dé conmèrce, et, dans ses articl'yes d'fond, ou' lus a donné d'bouans avis. Ch'est vrai qu'ses avis n'ont pon tréjous 'té suivis par les hommes d'êtat. J'pense bein qué ché s'sait trop à espéther des politiciens d'autcheun pays - p'tit ou grand - mais quand j'vai les membres d's Êtats gronner la gâzette dans lus discours, j'ai envie d'crier "Hourah pour la gâzette!" car v'la tchi montre qu'oulle aîgue à les mett' sus lus garde!
Ieune des preuves dé la supèrbe qualité d'vouot' gâzette est qu'oulle a vêtchu toute sa vie sans arrèt, et qu'oulle a veu d'aut' gâzettes naitre et pèrdre vie ou mouothi d'lus belle mort, sans aver fait grand' difféthence dans sa cirtchulation quôtidgienne. Nou peut dithe qu'oulle est un monument dingne à la mémouaithe dé san fondateu, Moussieu Walter Ernest Ingram Guiton, un moussieu qu'j'ai ieu l'honneu d'connaître dans man janne temps. Il 'tait un homme dé belle présence, atout eune néthe barbe et un r'gard franc et bénévole. Il 'tait tréjous prèt à faithe du bein à autchcune pèrsonne et un pliaisi à ses anmins. J'ai connu, étout ses lieutenants: Moussieu Harrison, vouot' p'pèe dé mémouaithe respectée, Moussieu l'Rédacteu - un charmant moussieu si janmais y'en a ieu iun - et l'Sieur Tchéthée. J'm'èrsouveins qué ch'tait ch'tichin tchi souangnait d'trouver l's artistes pour chanter ou r'citer dans l'sèrvice du dinmanche l'arlévée à la chapelle dé tchi Moussieu Dguiton 'tait l'pilyi d'appyié. Et j'ai connu les Sieurs 'Douard Le Bro (lé fanmeux Ph'lip dé "Ph'lip et Merriénne"!), E. C. Boiëlle, Walter L'Bro, et un Sieur Miché comme rapporteurs quand j'tais janne, et Walter Tynan tchi prannait les portraits pour mett' dans la gâzette,
"Les Chroniques"
Dans chu temps-là, y'avait deux gâzettes publyiyées en Français: "La Chronique", et "La Nouvelle Chronique". Edmond Delaquaine, qué j'avons touos connu, 'tait l'Rédacteu d"'La Chronique". Edwin John ("Jock") Luce 'tait l'Rédacteu d"'La Nouvelle Chronique" et l'Sieur Ouoyamme Bisson 'tait l'gérant. Il avait eune barbe pointue et 'tait drait comme un pitchet et présidait driéthe lé conteux atout san gros niér male cat Prétro, tchi dormait ou ronronnait sus l'conteux à côté d'li. "Les Chroniques" 'taient populaithes dans les campangnes dans chu temps-là viyant qu'les campangnards né savaient pon fort d'angliais et nou n'ouïyait pon d'angliaichin'nie sénon en ville. Nou peut méme dithe qué l"'Evening Post" a contribué à l'enseignement d'chutte langue-là dans les pâraisses!
Vouot' gâzette a fait du bein au Jérriais à l'étrangi étout. Tch'est tch'i' f'thait sans la gâzette hebdomadaithe qué l'porteux d'lettres lî apporte s'maine auprès s'maine, et tchi li fait à saver les naissances, mathiages et décès en Jérri, et tch'est tch'a 'té êlu Connêtabl'ye dans sa pâraisse, et tch'est tch'a voté "Pour" ou "Contre" dans l's Êtats?
En pâlant d'annivèrsaithes, Moussieu l'Rédacteu, v'la tchi m'ramémouaithe qué l"'Evening Post" n'est pon fort pus vielle qué mé. I' n'y a qué tchinze mais entre nouos jours dé naissance, ch'est en tchi nou peut dithe qué j'avons quâsi tréjous vêtchu ensembl'yes et qu'j'avons veu les mémes changements dans la vie Jérriaise. Dans nouos p'tits jours oulle 'tait bein pus trantchile qu'ou' n'l'est au jour d'aniet. Un tas des belles vielles maisons d'fèrme 'taient couvèrtes en glyi et lus belles muthâles en granit n'avaient pon 'couo 'té muchies par la couoche dé chînment tchi fut la mode pus tard. Les motos et l's avions n'avaient pon 'couo fait lus appathence, et nou pouvait marchi les c'mins trantchil'ment et en seuth'té d'sa vie, et sans aver à heunmer l's odeurs empouaisonneuses dé pétrole. Les gens n'avaient pon d'peux d'marchi d'longues distances. La machinne à pédales tch'avait eune grand' reue et eune toute pétite (appelée "Penny-Farthing" en Angliais) fit s'n appathence quand j'tais tout mousse, mais n'y avait pon fort dé jannes hommes tch'avaient l'mouoyen d'en acater ieune. Lé Jersey Railways & Tramways Limited et lé Jersey Eastern Railway 'taient là, mais un tas d'mousses ès Landes à St. Ouën n'avaient pon veu lé "train". Man papa l'appelait "Eune cârosse tchi va sans j'vaux" et m'emn'it l'vaie à Bieaumont viyant qu'j'avais 'té bouan garçon!
La vie du sé
Les fanmiles 'taient grandes et la vie du sé s'passait en fanmile dans les maisons d'campangne. Les gens brûlaient des couêpieaux et du vrai dans les grand' âtres et fouangnaient l'pain, des gâches à fouée, et des galettes à vrai dans l'fou à côté. I' caûffaient l'fou atout des fagots d'bouais tch'i' gardaient, pour l'occasion quand il' êpîlaient les bouais sus les fossés. Siez nous, lé tro à pêtri faisait sèrvi d'tabl'ye, et y'avait un râclyi au pliafond et l'crasset 'tait à sa pliaiche. La salle pathaissait hardi comme la Tchuîsinne Jèrriaise au musée d'La Société Jersiaise en ville. La fèrme d'chu temps-là 'tait faite valer pour les bésouains d'la fanmile pûtôt qué pour profit conmèrcial, et l'grand des garçons, viyant tch'i' s'en allait l'héthiter pus tard, restait à aîdgi au bouanhomme, et les puisnés allaient en mé dans les navithes à vailes (y'en avait tch'avaient 'té bâtis en Jèrri), ou à La Côte travailli pour les Robins, les Fruïngs ou les Boutilyèrs.
Les gens faithaient les mousses aller à l'êcole du Dînmanche à dgiex heuthes, et quand il' arrivaient - un an à la fais - à la preunmié classe, i' fallait apprendre la collecte et l'Êvangile du jour par tchoeu. Touos les mousses restaient à l'églyise pour tout l'sèrvice. I' lus sembliait si long tch'i' n'en r'sortithaient janmais, sustout quand i' fallait êt' trantchiles tout l'travèrs des prièthes, dé La Litanie et d'un sèrmon long comme lé bras!
I' n'y avait pon d'cinnémas ni grand' aut' choses à attriotchi les jannes hommes, et i' passaient l'dînmanche l'arlévée sus les pallions à bavarder et jouer à Saute Mouton, au Tireli et toutes sortes d'jeux.
La Milice
I' fallait sèrvi comme soudards dans la Milice Rouoyale jusqu'a l'âge dé 45 ans, deux ans - de 16 à 17 - comme r'crues. Nou 'tait accoutrés à 18 ans. Auprés dgiex ans d'sèrvice, au camp et à tither au blianc, nou 'tait mîns dans la résèrve. J'tais ordgilleux comme un poux sus du v'lous la preunmièthe année qué i'fus accoutré! En habit d'parade, nou passait la Grand R'veue chaque année d'vant l'Gouvèrneux dans la Baie d'St. Aubin. J'm'èrsouveins qu'eune fais i' nouos dit tch'il avait passé les troupes dé Sa Majesté en r'veue partout l'monde, et tch'i' n'avait janmais veu des soudards comme nous d'vant! Sans doute, j'pensînmes tch'il entendait tch'i' n'en avait pon veu d'si bieaux, mais tch'est tchi sait - entendait-i' tch'i' n'en avait pon janmais veu d'si drôles?
Par les c'mîns, ch'tait des hèrnais et des vainnes qué nou viyait. Des hèrnais d'toutes les sortes, à bannieaux, à bèr, à boeufs, à bouais, à bras, à cidre, à éclon et à êpu !
Il' 'taient hantés la niet, les c'mîns. Y'avait d'la fraude en allant l'tou des côtes, et des blianches femmes, encouothagies par les fraudeurs, pathait-i', faithaient peux ès piêtons. Cèrtaines rues avaient la réputation d'êt' hantées par des fantômes et des r'vénants. Lé passage par ches routes-là la niet 'tait craintif pour nous comme mousses. Des noms tragiques comme La Rue à la Pendue, qué nou ouïyait l's anciens mentionner en convèrsation, nouos faithaient penser - étant p'tits et d'âge înmaginatif - qué nou pouvait vaie des pendus quand nou passait souos les bouais dans la niet sombre et qu'nou n'viyait pon la main d'vant sé. L's anciens pâlaient d'avèrtis, étout. Quâsi touos les vièrs 'taient supèrstitieux, et à les ouï, il' avaient tréjous ieu un avèrti d'tchique sorte quand lus gens avaient passé l'pas !
L's entèrrements
L's entèrrements avaient un air solonnel. Les hèrses avaient des néthes plieunmes sus l'haut des deux côtés, et lé j'va en avait ieune sus l'haut d'la tête. La hèrse tch'avait des côtés d'vèrre qué nou pouvait vaie l'côffre à travèrs, couôtait pus qu'la cheinne tch'avait les côtés solides. Les femmes n'allaient pon ès entèrrements. L's hommes marchaient drièthe la hèrse, les porteurs en tête. I' m'ttaient des cipres sus lus chapieaux, et si les gens du défunt pouvaient y affaurder i' donnaient des gants étout. Y'avait d's anciens tchi n'voulaient pon êt' portés à la tombe par les j'vaux. Dans ches cas-là, i' fallait porter les côffres à bras tout l'long du c'mîn à la Grand' Églyise auve deux-s'trais lots d'porteurs. En c'mîn, i' m'ttaient l'côffre sus des scabelles dé temps en temps pour changi d'porteurs. Dévant sorti d'la maîson i' fallait prendre du renfort ! Y'avait du vin, et tchiquesfais d'la litcheu, sus eune pétite tabl'ye dans l'allée, et des galettes et d'la gàche d'entèrrement.
La fanmile allait prendre lé deu à l'églyise, lé préchain dînmanche au sé. Touos les cheins tchi prannaient l'deu restaient assis duthant tout l'sèrvice. La veuve s'habillait en nièr pour deux ans et portait l'crêpe la preunmiéthe année.
Y'avait des crianches entouor les morts et l's entèrrements. I' fallait d'valer touos les ridgieaux du moment d'la mort et jusqu'à la sortie du corps, et couvri les mitheurs pour qué l'âme né pûsse s'y vaie! Y'en avait bein d'autres. Vouos lecteurs peuvent en liéthe dans les bulletins d'L'Assembliée d'Jèrriais, car lé Sieur Frainque Le Maistre, nouot' fanmeux historien, en a publyiyé eune racachie.
Les grand'-tchéthues
La vie d'campangne n'était pon triste quand-méme. Y'avait du rèvillon au sé dans les temps d'Noué et d'cèrtaines aut' fêtes dé l'année, ès séthées d'nièr beurre, et dans l'temps des grand' tchéthues. Les fèrmièrs s'entr'aidgeaient atout lus j'vaux, et v'la tchi valait la peine dé vaie la tchéthue attelée à siex ou huit j'vaux. Lé grand r'pas du sé 'tait un vrai festin!
Les jannes fanmiles prannaient souain d'lus anciens. Ch'tait rare qué nou vivait un ménage tchi n'avait pon grand-péthes et grand' méthes au coin d'l'âtre ou au pid du feu atout eune potée d's'no à main, et la grand'méthe atout un grand rouoge mouoché sus ses g'nouors et la goutte dé s'no au but du nez!
Y'a ieu des changements en ville étout. La cauchie pathaissait bein. Nou viyait les mâts des navithes à vailes, grands et p'tits, tchi navidgeaient à La Côte et un mio partout l'monde - lé Patruüs, lé C.R.C., lé Bolina, lé Fanny Breslauer, lé Sea Flower, lé Dawn et bein d'autres. Quand les campangnards avaient l'temps ou la chance d'aller en ville lé sanmedi, il' allaient tréjous les vaie. Hardi d'ieux avaient 'té au grand large dans ches navithes-là dans tchique temps.
Y'avait du run à marchi dans les rues d'la ville et r'garder dans les f'nêt' dé boutiques. Dans Hill Street, qué les campangnards appelaient La Rue ès Voleurs, y'avait pus d'ècrivains qué d'avocats. J'm'èrsouveins d'aver connu Pierre Philippe Guiton, George Frederick Durell Le Gallais, Charles William Binet, Peter Falla, George Philippe Crill, Vivian John Bailhache, William John Ogier, John Francis Giffard, William Smythe Le Masurier Edward Voisin et san fis Francis Albert Edward (li et les Sieurs Crill et Giffard fûdrent êlus Juges), Philippe Mourant Richardson, Edward Binet Renouf, Max Alavoine, Alfred Le Rossignol, et un Sieur Brée tchi m'ttait tréjous un bieau veste de toutes les couleurs, Francis John Bois et san frèthe George Walter, Clément Lerrier Aubin, George Quesnel Larbalestier, George A. Piquet, Alfred John Philip Le Riche et Lyndon Rive.
La Cour
L's avocats 'taient des gens à part. A m'n idée, Maurice Alavoine (il 'tait Lieut'nant Coronel dans la Milice Rouoyale étout) et Philippe Baudains (Connêtabl'ye d'la Ville) 'taient mangnifiques orateurs, Messire Adolphus Hilgrove Turner, Henri Edouard Le Vavasseur dit Durell, et Moussieu d'Carteret, tchi fut Bailli pus tard, 'taient supèrbes étout, et i' fûdrent touos nommés Officièrs dé la Couronne, Messieux Edmund Toulmin Nicolle et Charles Sydney Le Gros 'taient mains inmposants comme orateurs, mais il' 'taient si solides et respectés qué les gens avaient hardi d'confiance dans lus capacité d'gangni des causes. Les Sieurs Philip Norman Richardson, Léonce l'Hermite Ogier, Philippe Le Maistre, John Edwin Pinel - j'en oublyie probabl'yement tchitchuns - 'taient d'bouans avocats. Iun des jannes dé chu temps-là, Moussieu Harold Walter Giffard, faisait eune mangnifique et inmpressionabl'ye oraison en Français et 'tait un advèrsaithe formidabl'ye à pliaidgi contre! En effet, nou n'ouïyait qu'du Français dans la Cour et dans l's Êtats. Messire William Henry Venables Vernon présidait les deux auve eune supérbe dingnité. Il 'tait sévèthe et avait eune mangnifique présence et eune forte vouaix. A sa drouaite, sus l'Banc d'Justice, Moussieu d'St. Ouën, lé Coronel Edouard Charles Malet de Carteret, siégeait solonellement, et Moussieu d'Rosé, Reginald Raöul Lemprière, Écuier, 'tait l'Vicomte dé Sa Majesté.
L'office dé Juré-Justicier 'tait la pus grande honneu à tchi l'Jèrriais ordinaithe aspithait, et les Jurés 'taient Juges pour la vie dans chu temps-là. Il' 'taient bein counus et respectés par toute l'Ile, ayant quâsi tous sèrvi lus pâraisses comme Connétabl'yes. Hélas! Les temps ont changi - comme tout change. Ch'est la vie! J'vouos souhaite, Moussieu l'Rédacteu, à vous et à vouot' fanmeuse gâzette, bein d's années et d'annivèrsaithes à l'av'nin tchi n'chang'geont pon quant à vouot' bouanne santé et la prospéthité d'la gâzette et d'sa mission d'prêsèrvation du bein-être d'Jèrri et d'l'êdification d'ses lecteurs!
(Êcrit pour l'septante-chîntchième annivèrsaithe d'la gâzette du sé en 1965)
Viyiz étout: