Le bouon vier temps hélas n'est pus,
Et ouest-tch'est don not vier Jerry,
Tch'estqu' les bouons viers sont touos dev'nus
Tchi n'saveint pon chein qu'ch'tait qu'l'orgui;
Ou-est tch'est Jean Nöét et Betsy Nöét,
Et chu bouon corps le doux Thomas,
Jean Venn'ment tchi tchit dans sen tchuet,
Et Jean d'Nivelle et touos ses cats.

Ah! que nou-s-a dêgénéraï
De chein qu'nou-s-était dans men temps,
Le monde ach'teu est si êl'vaï
Que nou ne r'connait pus les gens:
La terre n'peut pus les porter,
I faudrait mettre un tapis d'sus,
Et quand siez vous i veul'nt entrer
Nou prendrait bein ragrandir l'hus.

Nou n'veirra pon chein qu'nou-s-a veu;
Jacques D'aubert avec sa catte,
Et Tom Hérault, Dénonciateu,
Du cat minsère pas mêm' la patte,
Les ch'vaux Tourgis et Jean Cliément,
Et Jean Gouraï et touos ses tcheans,
La vielle Rabot, la jument:
Hélàs! Hèlàs! le bouon vier temps.

Où sont don Pernelle et Collette,
Girette, Julianne et Pauline,
Mad'lon, Mergot, Douce, et Pirette,
Judith, Genette, et Philippine,
Touos les Ranlins, touos les Ph'lippots,
Touos les Benests, Guille, et Collas',
Touos les Drouets, et les Pierrots:
Où-est qu'i sont tous, hélàs! hélàs!

Allaiz de la Roque à St.-Où,
Du fond d'la Mouée jusqu' à Gouoraï,
Cherchiz dans les racoins partout,
Ous n'trouv'raïz pon chein tch'est passaï,
J'en veins tout êmue quand j'y pense,
J'en rouogis vraîment quasi d'honte,
A chut orgui i n'y-a pon d'fense,
Enfin! chatch'un fait pour sen compte.

Mais pour de mei j'ai ma k'minsolle,
Car je n'sis pon de chez gogu'lues
Coum' vous tchi trainaïz vos patouolles
Pour êpousser d'vant mei les rues;
Et vous, mêssieux, tchi vos r'dréchiz
Coum' des cos d'gamme ou des troux d'chours,
Ous vos oubliaïz, m'est avis;
Le monde est touonaï à l'arbours!

Je sis Jerriaise au fond du tchoeu,
J'y ai 'taï naïe, j'y resterai;
Ah! s'ous saviettes chein qu'j'ai veu,
Et chein tch'a passaï parsus mei.
Voulouz saver tch'estque je sis?
Mei creirous bein si j'vos le dit?
Est-ous enniaïs de tout men d'vis?
Je sis vot très humblle ESTHÉ P'SI.

A. A. L. G.