Les Pages Jèrriaises

En Jèrri y'a 25 ans

Y'a tchiques années j'êcrivais dans les Bulletîns entouôrre Jèrri y'a 50 et 60 ans. Eh bein, ch'est r'mèrquabl'ye dé vaie les changements tch'i' y'a ieu dépis qu' j'èrvîns dans l'Île y'a 25 ans. Ch'tait en 1946, et j'm'êrsouveins du grand pliaîsi qué v'là tch'i' m'fit quand j 'èrvîns à St. Ouén auprès eune absence d'eune vîngtaine d'années au Nouvieau Monde. Y'avait acouo tchiques crapauds - bouans vièrs Jèrriais - par les c 'mîns dans chu temps-là, mais pas hardi. J'n'en vai janmais à ch't heu, et j 'mé sis souvent d'mandé tch'est tch'en est dévenu. Ch'est à bein près seux qu'un tas d'mousses nés en Jèrri dépis eune dgiexaine d'années n'en ont janmais veu iun, et pour mé ch'est drôle dé penser qu'un Jèrriais n'a pon connu san couôsîn l'crapaud!

J'm'èrsouveins, étout, qu' j'attendais fète dé r'vaie la "Vinchelez Lane dé ma jannèche, atout sa belle votte faite par les branques dé haut des bouais des deux côtés d'la route tchi s'entre-rencontraient dans l'mitan comme i' l'font à ch't heu et qué quand j'arrivis à Portinfer sus l'haut d'la beusse j'rêalisis qué j'l'avais passée sans la vaie ! Ch'tait, sans doute, viyant qu' les bouais avaient dispathu duthant l'temps d'l'Otchupâtion d'l'Île par les Allemands. Quand j'tais mousse, ch'tait iun des lieux où'est qu'les coupl'yes aimaient à m'promenaûder bras d'ssus, bras d'ssous, dans l'êté. I' n'y'avait pon d'motos dans chu temps-là, ou viyiz!

Assis sus L'Huthé à Portînfer un dînmanche l'arlévée parmi jannes et anciens, j'ouiyais du vrai vièr Jèrriais d'St. Ouën. Ch'tait comme d'la belle musique à l'ouïe auprès aver ouï l'angliaîchinn'nie du Nouvieau Monde pour bein d's années. Ch'tait fascinnant d'êcouter l'bouanhomme Mait' Douard Le Feuvre d'Gros Nez pâler d'la pêque d'andgulle dans les houles et au large d'Gros Nez et d'Pliémont. Et pis, ch'tait întérêssant d'ouï Fraînque Lé Maistre, tch'est Membre d's Académies d'Upsala et d'Caën à ch't heu, nouos dithe où'est tch'est l'Pèrquage et comment tch'i' l'avait tracé tout l'long du c'mîn d'la Grand' Églyise au pliein dans les Grèves dé St. Ouën, et comment tch'il en avait dêcouvèrt un autre tchi mène à La Grève dé Lé.

Douard Hamon pouvait vouos explyitchi comment garder boutique et n'y faithe pan d'profit, et v'là tchi m'ramémouaithait ma jannèche à La Forge dans l'temps qu'les fèrmièrs né payaient Papa et les boutitchièrs qu'eune fais par an - à la fin d'la saîson d'patates - et qué quand la saîson 'tait mauvaise i' n'pouvaient pon payi viyant tch'i' n'avaient fait rein sus lus patates! Jean Pèrrée, tch'était à la fèrme d'Portînfer dans l'temps, pouvait vouos dithe dans tchi mathées qu' nou pouvait trouver l'pus d'lanchon dans La Grève au Lanchon, et nouos racontait comment qu' Jean Burlot aimait aller auve li pour chanter la s'gonde quand il allait chanter la bâsse dans l'chant d'la Chapelle Wesleyenne pour les examens.

Lé sé, dans l'Assembliée siez la Tante Vine, lé bouanhomme Maît' Fred dé Caën nouos disait pour tch'est qu' les lînmons d'hèrnais du temps pâssé valaient mus qu' les cheins d'à ch't heu, mais quand nou li d'mandait pourtchi qu' les maîtres tchèrpentchièrs né payaient pon lus apprentis mais tch'i' chèrgeaient tout pliein pour lus temps au pouôrre fèrmyi quand i' fallait peindre siez li, l'bouanhomme Fred vouos r'gardait d'travèrs et rêponnait "Mêl'-ous d'vouos affaithes, vous! Et l'bouanhomme Fraînque Hubèrt pouvait s'èrsouv'nîn d'combein d'vouaix qu' les Louothièrs avaient gângni l'êlection pour Connêtabl'ye en 1880, et combein d'louis qu' les Rôsièrs avaient payi à un "vieau pour voter pour ieux, mais tch'il avait quand même voté pour les Louothièrs viyant qu' lus candidat 'tait 'p'tit couôsin à sa janne fille prétendue, dé tchi qu' les Rôsièrs né savaient pon !

Et la couôthinne Mêrrienne Lé Feuvre nouos racontait qu' Madanme dé Rôzé v'nait souvent mangi des mèrvelles siez lyi à Gros Nez dans l'temps qu'ou donnait des thés, et qu' les danmes des grôsses têtes dé l'Île li d'mandaient tréjous pour la r'chette dé ses bouannes mèrvelles. Et comment qu' ou r'fusait tréjous d'sèrvi les filles et femmes tchi m'ttaient des braies comme un homme, et comment qu'ou les chassait hors dé san bel!

Beintôt, la Tante Vine apportait eune tâssée d'thée, et des mèrvelles faites par Madanme Fraînque Lé Maistre. Il' 'taient si bouannes tch'i' vouos fondaient dans la bouoche, et la séthée s'était pâssée si vite qué nou n'avait pon r'mèrtchi l'heuthe avanchi.

Dans chu temps-là Douard et Mary Hamon allaient mangi l'dînmanche au sé siez Francis et Eunice Lé Boutilyi à "Highfield (Francis, Connêtabl'ye d'St. Ouën dans l'temps, fut Juré-Justicier pus tard), et l'dînmanche en r'vénant lé r'pas 'tait siez Douard et Mary. J'fus honoré en étant invité ès deux bords, et l'Avocat John Fleury L'Cornu et l'Sieur Reuben Thatcher, deux bouans vivants, y'étaient souvent étout, et j'm'èrsouveindrai tréjous des bouans r'pas et d'la pliaîsante convèrsâtion tchi faisaient l'rêvillon doux et trantchile dé ches séthées-là. Et d'temps en temps nou s'rêunissait tous siez Alfred et Madeleine Maûgi à L'Êta pour eune bouanne séthée et un bouan r'pas, et Moussieu et Madanme Frainque Hâcou 'taient învités étout.

Hélas! I' n'y'a qu' Madeleine, Jean Pèrrée et l'Sieur Fraînque Lé Maistre et sa danme et mé dé tout chu bouan monde-là en vie au jour d'aniet, et jé c'menche à châtchi mé-même! Au dînmanche, à l'Églyise dé St. George, Moussieu et Madanme Fraînque Hâcou et Madanme Francis Lé Boutilyi s'assiévaient tréjous dans l'même banc et lé m'y'assiévais souvent auve ieux. Lé banc est viède à ch't heu. L's anciens sont au r'pos êtèrnel - des mios d'Jèrri pèrdus à janmais - mais lus mémouaithe est "gravée dans mon coeur comme disent les Français, et pour mé ou s'sa précieuse jusqu'à la fîn d'mes jours!

A ch't heu, i' faut s'otchuper du présent, et j'sis r'connaîssant d'pouver acouo gabather et v'nîn m'èrnarder dans l'vièr Mênage dé m's anchêtres pour deux-s'trais mais touos l's ans, et j'vouos asseûthe qué si m's êfants et fréthes et soeurs n'étaient pon tous en Améthique et qué jé n'veurs pon m'êcarter d'ieux tout à fait, j'y restéthais pour bouan, dans l'vièr Mênage, et qué, quand même tch'il ait subi tant d'changements, nouot' pétit Jèrri, j'y laîss'sais ma vielle poutchie d'os quand veindra la fîn et qu'la trompette sonn'na. Mais jé n'sis pon 'couo prêt à pousser d's ailes sus m's êpaules (ou bein ché s'sait-i' des cornes à la tête?), et j'sis heûtheux d'pouver èrvénîn touos l's ans châtchi d'main auve les anmîns tchi sont acouo du rang des vivants et bailli d'ma becque auve les cheins tchi n'ont pon 'couo oublié la pus belle langue au monde - la Langue Jèrriaise !

G. F. Le Feuvre
Lé Mênage ès Feuvres, St. Ouën.
Lé 24 juilet, 1971


 

Viyiz étout:

 

Les Pages Jèrriaises