Le Ménage ès Feuvres,
St. Ouën.
Lé 3 d'juillet, 1976.
Moussieu l'Rédacteu,
Félicitâtions au Connêtabl'ye Winter Le Mèrquand à l'occâsion d'sa rê-êlection comme Connêtabl'ye dé sa pâraisse dé St. Pièrre. I' n'y avait pon d'doute dans m'n idée tch'est tchi s'en allait gângni ch't' êlection là, et touos les cheins à tchi qu' j'en pâlais 'taient dé m'n idée étout, tellement l'Sieur Le Mèrquand, un bouan vièr Jèrriais et un homme tch'est tréjous prêt à faithe un pliaîsi à touos ses parouaîssiens, nou peut mème dithe à tout l'monde, est populaithe. J'connaîssais san p'pèe tout à fait bein dans l'temps qué j'tais ségrétaithe au Connêtabl'ye (pus tard Juge) Francis Vibert Le Feuvre. Dans chu temps-là, 1907 à 1912, i' n'y avait pon bein des pâraisses tch'avaient des ségrétaithes, et l'Connêtabl'ye Le Feuvre mé payait un p'tit salaithe dé sa pouchette. I' n'éthait pon pensé à d'mander à la pâraisse dé l'rembourser, tellement tch'i' voulait couoyer et mênagi les sou d'la pâraisse.rê-
J'm'èrsouveins qué l'Bailli Vèrnon l'complyimentit hardi pour la manniéthe admithabl'ye tch'i' t'nait les comptes dé la pâraisse à l'occâsion d'la Visite Rouoyale tch'a lieu dans châtcheune dé deux pâraisses annuellement.
Eune chose tchi m'a frappé dreinement est les hauts gages payis ês hommes tchi travaillent sus les routes à ch't heu. I' m'veint à l'idée tch'i' s'en vont r'chéver un hauchissement dé vîngt pour chent par sémaine, et i' gângnent pus dans deux sémaines qué l'Trésoryi des împots gângnait en mil neu chent dgix par an, san salaithe n'étant qué chent louis annuellement!
Les hommes tchi travaillaient sus les routes 'taient appelés des “cantonniers” dans chu temps-là. D'habitude, il' 'taient d's anciens d'la pâraisse, dé bouanne condite, tch'étaient oblyigis d'continnuer à travailli dans lus vièrs jours pour gângni lus vie. Lé chef-cantonnyi, ou contrémaître, 'tait un homme d'întégrité r'connue. I' faîsait un rapport au Connêtabl'ye au sanm'di et présentait san compte des heuthes travaillies par châque cantonnyi. Il 'tait payi un mio pus qu' ieux, mais lus gages n'étaient pon hauts.
Jé n'm'èrsouveins pon du nom du chef-cantonnyi à St. Pièrre dans chu temps-là (1907-1912), mais j'm'èrsouveins du chein d'St. Brélade. Ch'tait un bouanhomme du nom d'Gavey. I' m'sembl'ye qué j'lé vai acouo assemblier ses hommes à St. Aubîn et lus donner lus înstructions pour lé jour. “Té Pièrre,” i' disait à iun. “Ph'lippe s'en va aller auve té. Prannez la chiviéthe et vouos ôtis, et allez gratter l'long des muthâles des deux bords dé la route tchi mène à La Haule.” “Té Jean, prend Amice auve té et allez à l'êcarceux dans l'neu mont et prannez ch'tchi vouos faut pour remplyi les creux dans l'mont en attendant dé l'prépather pour le rouôleux.” “Té, Fraînque, prend Élie et Charlot auve té et allez au Ouaisné clièrgi les d'gâts dans la route causés par la tempête dé vent dé hièr la niet.” “Et té, Françouais, t'en vas prendre ta pêlle et t'en v'nîn auve mé au rouôleux!” Lé bouanhomme Mess Gavey avait eune forte vouaix et i' pâlait lentement et p'sait hardi sus cèrtains mots. Quand i' disait rouôuleux, ch'tait “rouô-ô-leux” auve l'appié sus la dreine syllable!
Sans doute, les routes n'étaient pon tathées ni “macadamisées” dans chu temps-là. Dans l's êcarceux nou viyait tréjous chein tch'i' fallait pour les r'graie et les féther, des piles dé grès et d'pièrre câssée généralement. Y'en avait tch'étaient expèrts à câsser d'la pièrre. I' faîsaient sèrvi un p'tit marté exprès, et nou les viyait assis à câsser sus l'haut d'la pile dé pièrre en forme “rectangulaire” tchi continnuait à hauchi à m'suthe. Pour mé, ch'tait quâsi încriyabl'ye qu' un homme pouvait en câsser eune pile dé mème à san tout seu. Les hommes condamnés à peine dé prison au travas forchi en câssaient dans l'bel dé la prison. J'mé sis tchiquefais d'mandé combein longtemps tch'i' fallait pour faithe un expèrt d'un câsseux novice. Ch'tait sans doute eune bouanne et profitabl'ye manniéthe pour un prisonnyi dé s'pâsser l'temps, et v'la tchi f'thait du bein à un tas des jannes malfaiteurs d'au jour d'aniet d'aver à en câsser étout.
Les jannes d'à ch't heu ont des chances tch'i' n'savent pon apprécier. I' lus promènent partout et vont à l'êcole ou en travas en confort dans touos temps, fraid ou plyie comme au bieau solé, en moto ou en beusse. Quand j'tais mousse ch'tait à pid ou à la machinne à pédales. Et sus des routes tchi n'taient pon pavées. Si tchiyait d'la plyie fallait aller quand mème. Souvent, l'vent 'tait contraithe, et nou pensait: “Ché s'sa mangnifique d'aver l'vent driéthe en nouos en r'allant siez nous à ces sé!”
Et pis quand v'nait l'viage d'èrtou nou trouvait qué l'vent avait changi et fallait acouo pédaller contre en r'vénant! Mais comme nouos l'dit l'vièr diton: “L'advèrsité vouos fait prendre sus sé!”
George d'La Forge
Viyiz étout: