Recemement, j'érchu de Mdme Linda Dallain, la veuve du Sieur Herbert Dallain, eune affiche d'eune êcole dé St Louothains, Harleston House, tchi n'existe pus. Fondée en mille huit chents quatre-vingt, ou tait mus connue comme l'êcole à Skelton tch'en tait le fondateu, et ou tait bein populaithe parmi les pathents du Ouêst.
Bert Dallain, tchi v'nait d'eune ancienne famille Jèrriaise hardi respectée, avait passé ses jannes jours au Coin Varin, et il'avait fait ses êtudes siez Skelton. L'année scolaithe tait divisée en quatre termes et pas trais comme aujour d'anniet; i'avait chin s'maines dé vacances dans l'étè et trais à Noë.
Ch'tait eune êcole privée et seulement pour les garçons. Les siens dé neuf ans payaient tchinze ch'lîns par quartchi, l'êtchipollent dé septantechin pence anniet, tandi qu'pour les siens dé treize et en d'sus, le prix monter graduellement jusqu'à trente ch'lîns.
Pour apprendre lé piano ou la harmonium couôter un'extra tchinze ch'lîns.
L'affiche continue par donner eune liste du nombre dé garçons, sans noms, tch'avaient réussi dans l'examen du jour, le 'College of Preceptors'. Pour vingt-siez ans d'siettes, l'école ètablyi un r'cord auve des rêsultats dé chent pour chent d'succès.
J'pense bein qu'n'ou pouorrai aîsiement penser qu'les pathents d'ch'est temps là, payaient bein p'tit pour l'êcolage dé lus efants, mais d'vant passer eune opinnion, i'faut avait eune idée des gages et du prix d'la marchandise du jour.
I's'adonne que j'ai dans ma possession, eune copie d'l'Evening Post du trente dé Juillet, mille neuf chents trais. Ou couôter un sou par jour et les gages variées entre tchinze ch'lins et un louis la s'maine; es RM Stores, eune livre dé beurre tait un ch'lîn et siex sou. I'fallait un ch'lîn et douze sou pour eune livre dé jambon dé preunmié qualité et la j'lée tait un ch'lîn pour un pot d'eune livre.
Un chipé d'fausses dents, haut et bas, couôter deux louis; chin ch'lins pour avait eune dent d'êrachie souos l'gas et pour les siens tchi n'avaient pon peux du ma, un chelin sans gas. Siez l'Sieur Le Monnier de Bath Street, douze boutelles de rouoge vin, du St Emilion, taient treize ch'lîns. Les cigarettes 'Wild Woodbine' s'vendaient à deux sou pour dgix tandi qu'les 'Pirate' taient trais sou pour dgix ou chin sou pour vingt.
A la Co-Op dans Waterloo Street, les hommes pouvaient acater un neu fa pour en d'sous dé deux louis, et les femmes eune bloose pour alentou dé chin ch'lins.
Dans l'Rouoge Bouillon, Clarendon Lodge auve neuf apartements, eune salle dé bain et un iit à louer pour chinquante louis par an. Ailleurs dans la ville, l's'agents d'mandaient envithon seize louis annuel pour dé pus ordinaithe maisons.
A Springfield, à l'ouvert, les gens écoutaient septante musiciens dé Rennes en payant un ch'lin (5p) d'entrée pour être debut, et un aute douze sou (2½p) pour être assis. Eune extchursion à Dinard pour le jour couôter chin ch'lins (5p).
Quand n'ou fait des compathaîsons auve la vie d'à ch't heu et i'a chent ans, i l'est bein êvident qué hardi dêpens sus les gages vis-a-vis la nouorrituthe et l'louoyi. Enfin, j'm'en vais vos laissi faithe vos caltchuls, mais j'pense qu'autfais, le louoyi tait raisonabl'ye et ch'tait la nouorrituthe tchi faithait un grand creux dans les gages, surtout iou tchi i'avait dé grandes familles. I'n i'avait pon d'aide sociale comme anniet.
Percy l'Masuthi
Viyiz étout: