Trenton,
Michigan, U.S.A.
Lé 25 d'avri, 1981.
Moussieu l'Rédacteu,
Èrvénu ichîn dans l'Michigan, j'trouve trais gâzettes dé Jèrri à m'attendre. Eune vraie fête pour me, prîncipalement quand j'vai, dans la cheinne du seize dé févri, qué l'Connêtabl'ye L'Maistre et l'Député Carter d'Grouville, et l'Député Madanme Baker d'St. Martîn, s'en vont d'mander ès Êtats dé renvèrser la tragique décision d'inonder la belle vallée mênommée Queen's Valley - eune décision tch' était l'rêsultat dé seulement deux vouaix d'mâjorité. Et j'espéthe qué quand l'affaithe veindra d'vant L's Êtats i' la don'nont san vrai nom Jèrriais - n'est-ch'-t-i' pon La Vallée des Moulîns?
La trantchilité d'Jèrri, paradis d'ma jannèche, en a-t-alle attrapé, man bouanhomme, dans l'pâssage du temps par les ravages du tourisme et l'învâsion d's êtrangièrs! Quand j'pense au charme et bieauté des vallées d'l'Île y'a huiptante-chînq ans, auve eune veille maîson en granit et couvèrte d'glyi en veue dans la distance auve sa cheunm'née couronnée par la feunmée tchi pathaît s'envoler vèrs les Cieux tout trantchil'yement comme l'enchens d'l'autel dé l'églyise, et qué j'pense ès baraques, rêsultat d'l'architectuthe modèrne et fonctionnelle dé nouos jours, et qué j'vai tch'i' faut l's inonder, ches belles vallées, viyant tch'i' faut un tas dg'ieau pour abréver les lieux d'aîsances, bains et bangnérêsses dans l's hôtels et maîsons d'pension, la grand' partie dans les mains et au profit d'êtrangièrs, j'pouôrrais en plieuther!
Et la gâzette du 26 d'févri nouos dit qué des troupieaux rivaux d'jannes malfaiteurs tchi s'appellent Mods et Rockers 'taient à lus entr' quétilyi dans La Rue d'Drièthe et La Rue ès Français en pliein jour lé sanm'di l'arlévée, et tch'il' ôsent même les r'bînfrer contre la Police. Comme j'l'ai dit si souvent, i' lus faudrait la baïette pour lus mettre un mio d'avis et d'disciplinne dans la couënne, mais il est probabl'ye qué la Cour en mettra iun ou deux à l'amende. Et ches amendes-là sont-i' payées? Hélas, chu pouôrre Jèrri! Ch'est assez pour faithe un homme sé mett' à baithe quand nou vait à tchi qué j'sommes arrivés!
J'sis d'avis qué l'nouvieau Heritage Trust est eune raide bouanne idée et qué v'là tchi s'en va êt' eune grande aîgue pour La Sociéte Jèrsiaise tch'en a grand bésoin, d'aîgue, prîncipalement du point d'veue finnancyi. En liêsant l'articl'ye au sujet dans la gâzette du 26 d'févri, j'ai 'té êtonné d'vaie tch'i' n'y'a qu' ieune sus quarante pèrsonnes en Jèrri tch'en est membre, dé La Société Jersiaise. J'criyais qu'la grand' partie des Jèrriais en appartenaient. J'ai pèrsonnellement ieu l'honneu d'en êt' membre dépis 1923, et j'ai tréjous consèrvé m'n întéthêt d'dans ouaithe qué j'ai pâssé la grand' partie d'ma vie à l'êtrangi. I' m'sembl'ye qué ch'est l'Docteu A. E. Mouothant, F.R.S., etc., et mé tchi sont les pus vièrs membres, point d'veue d'séniorité d'appartenance, et j'sis ordgilleux d'êt' en si bouanne et illustre compangnie.
Nou sait bein, sans doute, qué nouot' vielle langue Jèrriaise s'en va dispathaître dévant longtemps. Mais ch'est triste dé penser qué l'vrai Jèrriais s'en va dispathaître étout dans l'Île auve lé pâssage dé tchiques généthâtions, et Jèrri étha pèrdu san caractéthe et héthitage Nouormand, et sa langue es'sa entchiéthement Angliaîche. Sus vîngt-siex naîssances èrcordées dans les deux gâzettes des 19 et 26 d'févri respectivement, i' n'y'a qu' siex vrais noms Jèrriais. Et sus les six, trais sont des filles.
La seule satisfaction qué j'peux aver dans chutte tragédie à v'nîn est qué ché s'sa dans ma pâraisse natale dé St. Ouën qué la langue trouvetha sa mort. Et i' faut s'consoler auve nouot' vièr poëte Wace quand i' nouos dit qué Tute rein se turne en declin. Tut chiet, tut muert, tut vait a fin. Ché s'sa eune aut' sorte d'race dans l'Vièr Marchi, et d'aut' moeurs, et les jannes n'éthont pon connu la vie duthe, mais heutheuse, sîmpl'ye et méthitouaithe des anciens tchi n'avaient autcheune ambition dans la vie qué l'travas et la nécessité d'gângni lus pain à la sueu d'lus fronts.
I' s'en vont continnuer à prospéther dans l'Cannada et an Améthique, les Jèrriais, mais là i' s'en vont pèrdre lus identité à la longue, car i' pâlent eune aut' langue, lus mathyissent auve des femmes dé races êtrangiéthes, meuthent en plieine prospéthité, et lus êfants, dêjà mêlés d'sang, d'veinnent partie du Melting Pot du Nouvieau Monde. Hélas! Tchi pataflias, mes frères!
George d'La Forge
Viyiz étout: