Les Pages Jèrriaises

Y'a septante ans...

Fort Lauderdale, Florida,
U.S.A.

Lé 6 d'avri, 1968.

Moussieu l'Rédacteu,

Quand j'viyais l'portrait d'L'Êtacq'sé dans la gâzette l'aut' sémaine, v'la tchi m'ramémouaithait l'temps qué j'tais mousse à La Forge siez Papa, et qu'j'allions sus les monts en d'ssus d'L'Êta au dînmanche l'arlévée. Y'avait un c'mîn tchi m'nait du haut du Mont du Vallet (à gauche dévant d'valer l'mont) jusqu'à eune manniéthe dé grand'tchaise formée par des grosses pièrres. Ou' donnait justément en d'ssus et endrait l'Hôtel dé L'Êta d'chu temps-là.

Papa s'pliaîsait bein là à r'garder l'êtendue d'La Baie d'St. Ouën, et vaie les cârosses arrêter à l'hôtel. Dans un bieau jour d'êté y'avait un mangnifique air dé r'pos là-haut. Jé n'sai pon si ch'n'est qu'eune idée, mais i' m'sembl'ye tréjous qué l's êtés 'taient pus bieaux et cauds quand j'tais mousse tch'i' n'lé sont à ch't heu. I' n'y avait pon l'brit d'motos à disteurber la trantchilité d'la natuthe. Nou ouïyait l'chant d's ouaîthieaux et l'lappais d'la mé dans l'port quand oulle 'tait haute. Et nou ouïyait l'trot des j'vaux dans la route comme les vouaituthes appréchaient d'l'hôtel.

Il en arrivait d'toutes les sortes, dé vouaituthes. Les mêssieux d'aut'fais en gardaient plusieurs. Y'avait des quèrres, des ouaguinnettes et des char-à-bancs à quatre et siex j'vaux. L's att'lages 'taient polis, l'jaune tchuivre êtchuthé, et quand les j'vaux sécouaient la tête lé solé r'lîsait sus les martîngales, et ch'tait commes des p'tits êparts dé feu!

La maison tch'était l'hôtel dans chu temps-là est acouo d'but. L'côté tchi fache la mé a changi, mais l'côté tchi donne sus la route n'avait pon 'couo changi l'année passée. I' m'sembl'ye qué j'la vai acouo comme oulle 'tait y'a septante ans atout ses rangies dé p'tites fênêtrés!

Y'a tchiques années j'êprouvis à r'trouver lé c'mîn tchi mène à la pliaiche où'est qué j'soulions nouos assiéthe, Papa et mé, mais il avait tout-à-fait dispathu. I' n'y avait qu'des ronches et du geon, et ch'tait à peine si nou pouvait y marchi sans avrôner ses habits. Arrivé à bein près là où'est qué j'soulions nouos assiéthe, je n'pus pon trouver les pièrres tch'étaient quâsi en forme dé grand'tchaise. V'la tchi m'fait penser qué p't êt' viyant qué j'n'avais qu'chînq ou siex ans dans l'temps, j'm'étais înmaginné chutte grand'tchaise-là!

La chose tchi m'frappe lé pus quand j'pense à ches bieaux jours-là d'ma jannèche est lé p'tit d'choses tch'i' fallait pour jouï d'la vie dans ches temps-là. Papa travaillait d'longues heuthes dans la forge à londgieu d's'maines, et pathaîssait tout-à-fait content d'san sort. Il 'taient heutheux siez nous, li et Manman, et passaient les séthées au pid du feu dans la tchuîsinne. Papa m'contait ders scènes dé La Côte et d'sa vie en mé, et Manman faîthait sa couôtuthe ou ouvrait. Dans des temps ou hoûtait, et ses leunettes tchiyaient sus l'but d'san nez. Quand ou' s'rêvilyait, Papa m'faîsait un clyîn et lî dîsait qu'oulle avait dormi au mains eune démi-heuthe! Oulle ajustait ses leunettes et r'gardait l'hôlouoge et lî dîsait: Ah! Ch'n'est danme pon vrai! J'n'ai fait qu'pèrdre l'avis du monde pour tchiques munnutes; j'sai bein, car jé v'nais d'èrgarder l'heuthe!

Manman allait en ville chînq ou siex fais par un par la beusse au Sieur Harry L'Boutilyi. J'n'ai janmais veu Papa y'aller sénon eune fais par an pour acater un p'tit couochon à La Faithe. Manman, fille dé Pièrre Le Feuvre dé La Ville la Bas, avait un fréthe Ph'lippe tch'était contrémaître dans les grands navithes à vailes tch'allaient au large. Il avait mathié Amélie Le Ruez d'Ste. Mathie, et lus domicile 'tait dans Great Union Road en ville.

Quand san navithe èrvénait en Jèrri auprès un long viage, j'allions touos les trais baithe du thée un dînmanche siez M'n oncl'ye Ph'lippe et ma tante Mélie en ville. Ch'tait eune grand' fête pour mé car v'la tch'i' m'donnait la chance d'aller dans l' Train dé Bieaumont en ville, aller et r'vénîn! I' n'y avait pon d'beusse tch'allait en ville au dînmanche, ch'est-en-tchi i' fallait marchi des Landes à Bieaumont. Si ché n'tait pon dans la saison et qu'les fèrmièrs n'étaient pon trop embarrassés, Papa pouvait d'mander à iun dé v'nîn nouos qu'si à Bieaumont l'sé atout sa vainne ou san quèrre. I' lus donnait crédit pour lé paiement du viage sus lus compte dé forge. Comme à bein près touos les fèrmièrs lî d'vaient des sou pour lé travas d'forge et l'féthage dé j'vaux (i' n'payaient qu'eune fais par an, dans la saison d'patates), v'la tchi lus donnait la chance dé réduithe lus rédévanche.

Dépis tch'il avait fallu sorti des Landes dé bouanne heuthe lé matîn pour marchi à Bieaumont et être en ville en temps pour passer un mio d'l'arlévée et baithe du thée en fanmile, j'tais prêt à m'endormi dans la vainne en r'vénant d'Bieaumont l'sé, mais j'tais êmèrvilyi d'aver 'té deux fais dans l' Train - la cârrosse tch'allait sans j'vaux!

George d'La Forge
 

Viyiz étout:

 

Les Pages Jèrriaises