Fort Lauderdale,
Florida, USA.
Moussieu l'Rédacteu,
Dans la gâzette du quatre dé dézembre, 1980, lé bieau portrait d'la brigantinne Eye of the Wind mé ramémouaithit la brigantinne Dawn tchi transportit man p'pèe, ma m'mèe et mes fréthes Sydney George et John Giffard à La Côte dé Gaspé dans l'mais d'avri, 1901.
Sus un sens, nou peut dithe qué j'tions à nouos entr'èrgarder, man fréthe Sydney et mé, sans nouos entre vaie, à m'suthe qué l'Dawn pâssait par La Baie d'St Ouën en c'mîn pour La Côte. J'tais à lé r'garder par la f'nêtre dé ma chambre à La Forge, et Sydney m'a souvent dit tch'il' à r'garder les hauteurs de l'Êta et des Landes dans ma direction en même temps, et tch'i' gardit la côte dé Jèrri en veue jusqu'à la niet. Et la preunmié chose tch'i' fît en sé l'vant à bord du navithe lé lendemain matîn fut dé r'garder pour Jèrri. Mais i' fut surprîns d'vaie qué l'Île avait dispathu et qu'la seule chose en veue 'tait des montangnes dé mé l'tou du navithe!
En a-t-i' pâssé, d'l'ieau par La Corbiéthe, dépis chu temps-là! Lé pâssage du temps est presqu'încriyabl'ye - huiptante ans, deux grand' dgèrres, l'arrivée du moto et d'l'avion et l'abandon d'eune vie sîmpl'ye et naturelle pour lé tîntamârre et l'camas d'machinn'nie tch'a rempliaichi l'travas et l'îndustrie d'l'homme et d'san j'va. Et l'arrivée d'eune jannèche tchi sait à peine tch'est qu' ch'est qué d'marchi à l'êcole, et tch'a pus d'sou dans sa pouchette à dêpenser touos les jours pour acater d'la douochinn'nie à baithe et à mangi qué san grand-péthe né dêpensait mal à propos dans l'couothant d'l'année! Et mes fréthes Sydney et John, tch'étaient à bord du Dawn en 1901 né sont pus du rang des vivants.
Mais j'ai acouo Jèrri dans l'sang et mes pensées, en Jèrriais, y sont souvent. Heutheusement, lé “Jersey Weekly Post” (qué j'appelle “La Gâzette dé Jèrri”) mé garde en rapport auve les êvènements tchi s'pâssent dans l'Île, et l'contraste entre la vie du temps pâssé et d'à ch't heu mé veint à l'idée toutes les fais qu' j'en r'chai ieune. Par exempl'ye, j'viyais qué l'Député Filleul voulait bâti acouo pus d'garages à êtages pour stationner acouo pus d'motos ouaithe tch'i' y'en a déjà bein trop dans l'Île. Vouot' articl'ye d'fonds au sujet 'tait un mangnifique exposé d'bouan sens tchi dév'thait aver d'l'înfluence sus les membres d's Êtats tchi s'en vont aver l'privilége dé controller d'itelles ambitieuses activités.
J'tais bein content d'vaie dans la gâzette qué L's Êtats ont décidé d'prêter un gros montant ès P'tites Soeurs des Pauvres pour lus aîdgi à agrandi lus prémisses.
Jé l's ai connues toutes ma vie, Les P'tites Soeurs. I' méthitent d'êt' encouothagies et supportées. J'mé r'souveins qué quand j'tais mousse, les campangnards m'étaient pon enamouothachis des Catholiques Romains ni d'lus înstitutions. Il' en avaient pûtôt peux, et les méthes m'nichaient l's êfants dé l's envier siez l'Pape (comme si l'Pape 'tait un mauvais sujet!) quand il' 'taient mêchants. Et quand nou viyait les Jésuites dans les rues, habilyis en nièr comme des corbîns, les mousses criyaient “Quoac Quoac” souotre ieux.
Mais ch'est r'mèrquabl'ye qué Les P'tites Soeurs, dé l'Églyise Catholique Romaine étout, 'taient respectées et qu' les gens lus faîsaient la beinv'nue et lus donnaient chein tch'i' pouvaient affaûrder ouaithe tch'i' n'taient pon bein riches ieux-mêmes. Et mes visites à La Maîson St. Augustîn m'ont donné l'împression qué j'aimethais mus êt' là, en cas d'bésoin, qué dans autcheune aut' maîson pour les anciens. Il est bein r'connu qué les réligieuses (nou l's appellent pûtôt des nonnes) font les milleuthes nosses viyant tch'i' sont dêvouées à lus vocâtion sans aut' ambition dans la vie.
J'vai qué l'Bureau des Postes continnue à faithe împrînmer des tîmbres à tarre larigo. Mais eune chose tchi m'dêpliais est d'vaie la p'tite însingnifiante silhouette dé Sa Majesté dans la cârré des tîmbres. À m'n idée ch'n'est pon eune dîngne èrsembliance dé la Reine, nouot Duc. Dépis qu' les dessinnateurs né pathaîssent pon produithe un milyeu portrait d'Sa Majesté, j'aime mus vaie l's innîtiales “E II R” couronnées sus les tîmbres.
Av'-ous l'couothage d'entanmer la tchestchion d'mett' un bieau portrait d'la Reine sus les tîmbres, Moussieu l'Président du Conmité Postal?
George d'la Forge
1981
Viyiz étout: