Les Pages Jèrriaises

Bouan Noué

San Antonio, Texas, USA

Moussieu l'Rédacteu,

À ch't heu qué Noué appréche, i' m'veint à l'idée qu'un tas des vielles crianches dé nouos anciens à s'n êgard daivent pathaître droles ès jannes dé nouos jours. J'mé r'souveins tch'i' m'sembliaient bein rêelles y'a huiptante-chînq ans. Par exempl'ye, j'n'éthais janmais pensé d'entrer dans eune êtabl'ye à vaques à mînniet la Sèrvelle dé Noué, car nou criyait fiabliément qu'à ch't' heuthe-là les bêtes s'agenouillaient en adorâtion du Sauveur. Ch'éthait 'té assez pour tchaie mort d'y mett' lé pid. Eune aut' crianche était tch'i' sortait du sang d'la pompe à ch't' heuthe-là, et acouo eune aut' était qué l'ieau d'la pompe touannait en vîn.

J'pense bein qu'les jannes d'aniet dithaient qué ch'tait riditchule dé craithe d'ité. P't-êt' bein, mais à m'n idée ch'tait un bouan sîngne dé la fouai réligieuse des anciens et qué v'là tchi lus ramémouaithait qué la fête dé Noué avait aut' sîngnificâtion qué la cheinne dé nouos jours qué ch'est eune occâsion pour sé régaler d'baithe et d'mangi et env'yer des cartes d'Noué.

Et i' faut sé rap'ler qué la vie d'ches anciens 'tait bein liain d'êt' tout roses, et qué Noué 'tait ieune des rares occâsions d'l'année tch'i' pouvaient affaûrder un mio d'festîn et d'rassemblier la fanmil'ye pour en mio d'rêvillon. Ieune des vielles couôteunmes 'tait la sonn'nie des clioches d'églyises dépis méjeu la Sèrvelle, et toute la niet, ofûche, et jusqu'à mînniet l'jour dé Noué. Dans l'Bulletîn d'Quart d'An d'L'Assembliée d'Jerriais d'La St Jean d'1974, lé Docteu Fraînque Le Maistre nouos dit qué chutte couôteunme dat'tait, pathaît-i', dépis la Sèrvelle dé Noué 1467, Les Français avaient otchupé Lé Vièr Châté et l'est dé l'Île pour eune affaithe dé siex ans, mais l'ouêst, auve Philippe de Carteret, Seigneu d'St Ouën, en tête, avait tréjous résisté. Et ch'avait 'té des batâles et d's escarmouches continnuelles. Quand, enfîn, qué l's ennemîns fûdrent battus et chassés hors I'Île, ch'la s'adonnait dans l's ambettes dé Noué, nou s'mînt dé jouaie à sonner les clioches d'églyises du ouêst tchi n'avait janmais 'té otchupé. Et chutte vielle couôteunme a continnué tréjous d'pis pour ilo chîn chents ans. Né v'la dêjà bein d's années, dgia, qué ch'la n'sé faîsait qué dans les pâraisses dé St Ouën, St Pièrre et Ste. Mathie. Y'a sans douté d'aut' raîsons données pour chutte sonn'nie, mais i' n'y'a pon d'doute qué ch'est eune bein vielle couôteunme.

Ch'est natuthel dé penser qué l'exèrcice dé sonner donnait eune bouanne appétit ès sonneurs. Bein des fanmil'yes 'taient r'présentées dans l'cliochi dans tchique temps du jour. V'la tchi né l's empêchait pon d'mangi lé r'pas d'Noué en fanmil'ye, et la mangeaille dé Noué 'tait fanmeuse. Lé grand r'pas s'faîsait pûtôt atout eune rouelle dé boeu ou du lard au fou. Ou bein, étout, des cotchets, un pithot ou du canard ou picot. Comme ledgeunmes y'avait des cârrottes et sustout des pânnais. Les pânnais Jèrriaises taient crues en grand's quantitées dans I'Île.

Et pis y'avait l'podîn d'flieu (podîn bouoilli) et du podîn d'riz. Lé podîn d'Noué qué nou connaît d'nouos jours né s'faîsait pon quand j'tais tout mousse. Il est d'originne Angliaiche. Et pis y'avait du pâté d'pommes et des bourdélots, et la fanmeuse gâche dé pâté. Et des figues et des raisins, des châtaines, des nouaix, des cordrettes et d's almandes. D'la bouaisson à gogo, mais sustout du cidre tout frais fait.

Mais i' faut qué j'm'arrête en pendant ma cauche à l'ais du foyi pour qué Papa Noué piêsse la vaie en d'scendant par la cheunm'née, ou j'n'éthais pon l'temps d'vouos souhaiter à tous un bouan Noué et eune bouanne Nouvelle Année, auve bouan pid, bouan' yi, bouanne dent et l'Paradis à la fîn d'vouos jours.

J'ai grand r'gret d'êt' si liain d'touos mes anmîns en Jèrri pour chutte grand' fête dé Noué tchi s'en va bein vite nouos tchaie sus l'co, mais j'vouos asseûthe qué jé s'sai auve vous dans la pensée et qué j'm'en vais dithe à Papa Noué dé n'mantchi pon d'mett' tout pliein d'jouettes pour les mousses dans lus cauches.

Et jé n'men vais pon vouos r'quémender d'craithe ès vielles crianches du temps jadis, mais dé donner eune pensée ès anciens nouos anchêtres tch'étaient bouans criyants chrêtchiens et tchi faîsaient honneu à la fête dé la naîssance dé Nouotre Seigneur Jésû Chri dé la miyeu manniéthe tchi lus sembliait méthitouaithe.

George d'La Forge
1981  

Bouan Noué!
 

Viyiz étout:

 

Les Pages Jèrriaises