Faut que j'vos dize que not maison
Est tout au pi d'la Croix au Lion,
J'lé faite bâti dans l'ptit béquet
Driethe la boutique Miss Mouquet.

Mais c'h'est d's'elvé, il est grand temps,
Et s'mettre a abilyi l'zéefants,
Emouque té vite ma poûrre Nenné.
J'en avons douze a prepathé.

Y'a, Nicolas, Flip et Francis,
Mathieu, Nicodème et Amice,
Nancy, Caroline et Mannon,
Betsy, Mary Ann et Jeanneton.

Déshale lus cauches et lus souliers,
Lus géllesse, lus cravattes et lus brais,
Les Palantines pour les hardelles,
Toutes les goffeches pour les met belle.

Biéquinne lus bottes, bringe lus casquettes,
Deshalle, calobres, mittainnes, bavezette,
Et pis qui désniches lus herpins,
Faut pus qu'il oublie lue pattins.

Dévalle pour mé man haut chappé,
Ma bounne câzaque (j'men vais m'râzé),
M'an boun chappé à une histoïeze,
Cha tait l'beaveur à man grand paize.

Et ma kâzaque de fin bleu dra
Etait est neuches de man papa,
Y la raptichidre pour mé
Le jour memes que j'em fis mathié.

Ma quitretine, man veste de soie,
Man bian mouchét et mes jaunes brées,
Ma perruque, et ma boite a sno,
Ma gorgerette pour l'tou d'man co.

Hallo! man topper est tro ptit,
Jen peux pas l'mettre sans un cauchepi,
J'e sait oblegi d'lamathé
Ove du paddon pour l'gardé dré.

Avains tres pains de d'sus l'râcli,
Et arrange les dans l'grand pangni,
Deus-très andoilles de oues bouillie,
Ov le restant d'not poddin drie.

Et pis étout achetéu j'is pense,
Sus l'ée du but dans la déspense,
(Nou ny ve pon) passe mé l'crâsset,
Du lard bouillie, pas trop sallét.

Que Nicolas nos lie l'trâinné,
Qui mette les hauches sus l'grand banné,
I nos en faut de toute les maithe,
Va cherchi l'fouet dans la caunièthe.

Et un bissa pour met le bran,
Ove deux brins d'fain pour la jumen,
I faut lie met sans neu sello,
Ques envlopet saous l'but du tro.

Ben attabiées à désjeunné,
Je sommes tous si préssis d'monté,
Que l'appetit n'os a manqui,
Et j'fillons tous sans rain mangi.

Nos vln tous grimpées d'ans l'guéziot,
Chaqun d'zaviers ov san ballot,
Fait nous tous main ma chiethe Nenné,
Chest à bétôt n'os vla allé.

Je rencontrons Monsieu l'Cornu
Qui nos fait un beau long salu,
J'men vais vos dize quéque y pensé,
De la mangnieze qui n'os r'gardé.

Vla une famille de Saint Pierrées,
Que f'thaies honneur a not mussée,
J'les mettrézions dans not caumine,
ben arrangés soues une vittrinne.

Wog, bidéway, s'est fait Betsi,
Nou ythé pus vite a marchi,
Cache don papa ch'est l'Samdi d'Noué,
La vielle Bérisse peu ben trotté.

Le préchain q'javons rencontret,
Eté ma fingre Monsieu d' Carteret,
Je yeu l'honneur de châqui d'main
Avec le Seigneur de St. Ouain.

Ou en dithaiz chen quo voudrais,
Me jdi q'yen a trop ptit ditais,
Si jamais je sommes en dangi,
J'pouvons tréjous nos fié sus li.

Un p'tit pus y'ain ju câssi peux,
Queque j'avise si s'hnest l'proquleux,
Le vla q'uim dit, tout gracieusemen,
Maite Dan comme est quest vot Manmen.

Jié dit douchement, mercie Monsieu,
J'viens d'la totté oprés du feu,
Je yié promins de v'nin ove mé
Quiquns d'chest jours dans vot chmin d'fé.

Bieaumont, ma fingre est tout couvert
De Paithe et Maithe et l'us aviers,
Nou peut les conté par chentainne,
Y yen à la d'toute les vingtainnes.

Dla tour du Sud, du Val au bé
Qui racachie qui deshallé
Des Monts d'la Mathe jusque Autgées,
Du Coin Vathin et des Quenvais.

Du pont du Brai, d'Saint Nicolas,
Jamais nj'navais oui tan d'cammas,
Ch'est chante et crie et fait de brêes,
Que gaingue de goulle d'esmachonées.

Achteu nos vla oprès l'neu qu'min
Craque quéque yme touaise l'Docteu Obin,
Jamais j'ne veu un homme pus fi,
J'criait qu'il allait nos mangi.

Y vien saccoutait sus l'banné
Et nos invite tous, a dinné,
Mangi de soupe de merquerolles
Du mullet, des piezs et des solles,

Des riennottes et d'escargots
Et un tas dant bouns fricots,
En m'ertounant javise Betsi
Faithe un effort l'coeu yia craqui.

Tout en criant nous sies l'docteu,
Papa stui vais vazi tout seu,
Ch'est pletre que j'eune mis r'connais pon,
J'naime pas liddée d'colimachon.

J'ne pon jamais goutait d'crapauds
Et l'queu m'levezait sus déesquerbots,
Veur tu bein t'taize maufaite Betsi
Quest qui dizait si tavait oui.

Docteu j'ai grand rgrait d'vos r'fusé,
Agnait y faut pas y pensé,
Javon apportait not mangi,
Car je diennons sus l'vier Marchi.

Un ptit a gauche de la statue
Sue la piateforme d'van la Cohue,
Ché sa puetots pour une aute fais,
Madame sée ben aise de nos vais.

J'cachons es estables tout dré
Met not jument et not traisné,
Les garçons hap le grand pangni,
Les riz bourdelots et l'bazi.

J'né pon voulu chergi les filles,
Car il sons v'nues pour vais la ville
Et galvaudé dans les boutiques
Depis Gruchy jusqua Landique.

Chest dont acâte vlicots, simné,
Des cauches de trêmmes faites en gris d'fé,
Du pain d'jeangivre, et un violon,
Dla m'lasse et un acordéon.

J'vions un negre en dans d'la faithe,
Quavait la mainqui d'la fache naithe,
Mais quand il ont gobbait nos sou.
Laute mainqui était naithe etou.

J'mé teurtais d'rage d'etre si volét.
Et tuos l'zaisfans qu'avait l'flâquét,
J'lus dis fillée sus l'vier Marchi,
Despaquis vite le grand pangni.

Betsy etend l'grands dra-ven-teux,
Et j'nos apathions deux à deux,
Ben arrangis en rouelle de c'hean,
Et me, j'massie dret dans l'mitean.

Les juges en roses ont tous d'valey,
Car je r'connu Mousieu Dorey,
Nicolle, Gallichan, Messervy,
Briard, Le Gros et Gruchy.

Quiqun a fait un clin est filles,
Je cré que chte Mousieu d'Belville,
Mais ma pazolle j'de m'est trompait,
Car y voudrait pas faize ditait.

Mousieu L'Bailli m'a r'gardai bain,
Mais n'a pas fait la mine de rain,
Chest l'a l'gallliard dans nos procais,
Qua bain slingi l'zergots anglais.

Jusquau Juge Falle qui nos a veus,
Et li qu'est trejous si serieus,
Quant il est v'nu a sertounné,
Je cré qui s'est mins a bouffé.

Eh pis opres Mousieu l'Greffi,
Q'uest vnu nos vais comme tout mârri,
Mais s'fait Mannon la p'tite pouivette,
Bon! il a d'pichi ses lunnette.

Si n'a pas besoin des restant,
Qui les mette siez nous en passant,
J'pourait p'tete ben les rabilli,
Pour not cousin qui n'a qun yie.

Q'ue qué ch't'inna l'a bas que j've,
Chest ben vot premier deputé,
Si ou n'l'aviez pas ecouté,
Vos Cauchies s'cest oquo a sé.

Et pis le Ministre de Grubville,
Ven embrachi toute ma famille,
Ch'est la un risible poupot,
Y m'a d'mandait un bourdelot.

Souvent y donne de l'embaras,
Y s'pies a faize angli l'êstas,
Les gourmanndé l'zéetiboqui,
Les digotté, les piquangni.

Mais le Conneetable d'la ville,
Q'uest si affable et si tranquille,
M'a dit bounnes gens etous finnis,
Depechous vite j'avon d'la plies.

La oué chtila est l'pus maâri,
C'hest quand nou dechize san Jerri,
J'amais n'a mis sa loyauté
Drieze sa popularité.

Y'en a un autre ratatinet;
Qui pazais trejous ave fret,
Il est a souffliet sus ses dais,
"Pourriez-thous lie donne vot voai" .

Y-en avait yuun a nos blinqui
Qui contait hardi à wiski
De la mangniethe qui nos gorné
Jlé rconnu pour un député.

Un haut Moussieu vètu en nait,
Qui met d'grands bordes a san chappait,
Et passe san temps a faithe du ben.
Nou m'a dit q'chest Mousieu l'doyen.

J'en vait v'nin yieu tout hors d'allenne,
C'hest vot l'ecteu Mousieu Amen,
N'en vl'a un gas q'uest désgourdi,
L'evla a sauté a quioche pi.

Qué que j'avise la c'hest l'inspecteu,
Q'uest dans une c'âre m'âtaï tout seu,
Je ben comprins par qui-que pazolle,
Qui chassait tout l'monde a lescolle.

Y vain m'pâllait (mais en anglais),
Mais j'yé montrai que jel savais,
"All dese my childs dey go to school,
Perhaps you tink i aint a fool."

Y vain la deux marchands d'sonnettes,
Qui vont niffié pour lus Gazettes,
Que nou est bête assais d'peyi,
Pour gazoili du boun papi.

Yia la une langue de vitupaithe,
Portée par yun que 'peu pon spaithe
Il est bourru et mal poli
Et par tout l'monde il est hayi.

Un jour il eut une diantre d'peux
Y n'en rpathi quove un dé'zangoueux
Sa charité fis êmouchette
Et lie resti dans la garguette.

Y'en a un autre tout êcringni
Frais (comme un piegne a mié netti)
Y scrainche y s'frippe y leve les bras
Chest not tout s'mêle chest du peltas.

Il en est vnu la deux ou trais
Les juéthets a travers lue brais
Lus hardres desloquis et en pieches
Ovo des dents en madelles de haiches.

Non s'aperchait quchest des villais
Avec de faches comme de casse bois
Y sont tous maigre comme de haitheque
Mais affrontaies comme des béllette.

Un policeman vain nos r'gardé
J'criais quil allait mavalé
L'êsfants s'cont mins a faithe des braies
Et s'codait comme d'eésratais.

Je fillons vite pour not quiziot
Avec les reste de not fricot
Fallait nos vais tous desquerpi
Tout chla s'est fait dans un clin dyi.

Quand 's'commes venues au haut du rué
Jetions tout trempées a la pé
Il en versait du bord du sut
Une achie d'plie a baize de d'but.

La jument happe le mor es dents
Me v la sus l'dos parmi l'esfants.
A jethoté les fours en hauts
Parmi d'la m'lasse et des vlicots.

Tout not baggage est culbutait,
Saquagi, bûchi et trempait
Jamais n'pouvée emoginait
Le Margalot que ch la faisait.

Quand j'arrivimes n'ou viyait d'gou
Les pouchettes vides, pas un seul sou
Ma femme qu'avait une bordais d'ners
S'mins a crié mes poures z'aviers.

Ou déshalli pour membrachi
Craque! Nos vla tous aupilauzi
Car qui que pendloque de peutuoz elle
Eté v'nu deshouqui nos melles.

Y faut une pêlle et un rabo
Une traie et la cueillie a po
Pour nos puchi de d'ans l'pité
J'ai l'nez bouchi j'ne d'estouffé.

Personne n'ont pensait a souppé
Chté d'nos gratté tous au couté
Et met nos hardes au fou a s'qui
Bonsouer! j'no allons n'os quochi.

Daniel Selous,
Surveillant de St. Pierre,