Noué

San Antonio, Texas,
U.S.A.
Lé 11 dézembre, 1971.

Moussieu l'Rédacteu,

Né r'véchîn Noué tch'appréche, et dépis qué j'sis trop liain d'Jèrri pour pouver châtchi d'main auve mes anmîns en lus souhaitant un Bouan Noué quand l'jour veindre, et embraichi en mème temps les danmes et d'mouaîselles souos la touffe dé dgi pendue en d'ssous d'la porte en entrant, j'prends ch't occâsion d'vouos souhaiter, par êcrit, Moussieu l'Rédacteu, et à touos vouos lecteurs et à m's anmîns, un raide Bouan Noué et eune Nouvelle Année tchi vouos apportétha les choses qu'ou pouorriez d'sither pour vous-mèmes, et qune bouanne santé et tout pliein d'bonheur et d'prospéthité!

Ch't année n'est pus d'longue duthée. Pour nous, en Améthique, ou n'nouos a pon 'couo apporté la paix, mais j'avons un Président tch'est à êprouver raide à nouos l'apporter. I' n'y a pon d'doute qué si ch'tait nouos chefs d'armées d'tèrre, des airs et d'la mé tch'avaient l'autorité, y'a longtemps qu'chutte dgèrre dé Viet-Nam es'sait finnie, mais quand ch'est les politiciens tchi c'mandent i' n'y a pon d'accord, sustout quand l'Président n'est pon du mème parti politique comme lé Congrès quand i' fait tchiquechose, et il est crititchi s'i' n'fait pon au goût des Sénateurs du parti contraithe! À m'n idée, lé système parlémentaithe Angliais est bein pus logique. Au mains,l'Preunmié Minnistre Angliais a l'support dé san parti.

La dgèrre Arabe-Israëlite n'est pon 'couo finnie ni n'tout, et y'étha p't êt' acouo du feu d'satchi d'vant qué l's Arabes rêalîsent qu'Israël n'est pon aîsi à dêtruithe!

La tchestchion d'explôsion d'populâtions est acouo sus l'tapis par ichîn, et il est à noter qué l'drein récensement nouos donne eune addition tchi met l'total d'habitants à pus d'deux chents millions. Ch'est seux qué L's Êtats-Unis et La Russie s'en vont continnuer l'explorâtion d'l'espace et des plianètes. La Russie pour objet pûtôt militaithe et l'Améthique en veue d'les colonîser dans un av'nîn qué jé n'vèrrons pon nouos-mèmes, mais tch'est eune possibilité pour les généthâtions à v'nîn. I' s'pouôrrait, étout, qué l'affaithe dé trop d'populâtion dans l'monde es'sa résolue par la destruction des peupy'yes s'il arrive eune dgèrre "nucléaire". Espéthons qué telle catastrophe n'arrivetha pon - y'éthait pus d'aventuthe à viagi ès aut' plianètes qué d'êt' fricachis en vie sus chutte tèrre!

L'Assembliée des Nâtions Unies n'a pon 'couo rêussi à uni les nâtions et êtablyi la paix sus la tèrre. Y'a tant d'jannes nâtions tchi s'disent îndépendantes mais tchi sont en véthité des dictatuthes et tchi votent dé chu côté-lâ, qué j'sommes tréjous appelés "Împérialistes" ouaithe qué ch'est l'pus souvent les sou et l'souôtchein d'l'Améthique et d'l'Angliétèrre tchi les gardent en vie! Quandtchi qu'j'allons vaie la Justice couronnée? Enfîn, i' pathaît qu'L'Assembliée des Nâtions Unies vaut la peine dé continnuer pour l'amour dé donner eune chance ès nâtions dé s'entre-chicangni là, à la pliaiche dé s'entre-capuchi sus un camp d'batâle!

Comme Noué est la fête dé la naîssance du Prînce dé la Paix, né v'chîn l'temps d'êprouver à l'êtablyi. La preunmié chose à faithe dé chu côté-là est d'l'êtablyi entre les travailleurs et l's îndustries pour empêchi les grèves tchi n'finnissent pon par résoudre autcheune chose. À m'n idée, un bouan c'menchement es'sait d'pâsser eune louai pour les aboli, et êtablyi un sustème arbitral. Un sustème dé mème dév'thait valer la peine d'êprouver pour asseûther l'bein-être des travailleurs. L'arbitrâtion pouorrait s'faithe sans la pèrte des jours dé travas tch'i' n'ratrappent janmais du point d'veue finnancyi viyant qu'les pus hauts gages tchi gangent sont engaûmés patr la renchiéthe dé la vie tch'est l'rêsultat d'ches pus hauts gages-là!

Tch'est tchi vouos pend sus la tête en Jèrri dans la Nouvelle Année tch'est sus l'pas d'porte? Lé Bouan Dgieu est l'arbitre d'nouos destinnées, et i' n'y a qu'Li tchi l'sait. Ch'est seux tch'I' n's'en va pon nouos l'dithe car I' nouos a donné l'pouver d'dêterminner nouot' mode dé vie et, si pôssibl'ye, amender l'êtat d'nouos vièrs jours et nouos m'ner à eune heutheuse destinnée auve lé pâssage du temps, et au Paradis auprès l'trépas!

Ch'est seux qué l'tîntamarre du tourisme s'en va continnuer l'êté tchi veint, mais j'trouvethai la paix au Ménage ès Feuvres à St. Ouën si l'Bouan Dgieu m'prêsèrve pour m'y r'trouver, et quand j'vai l'tîntamarre à l'entou d'mé ichîn, et la violence et les meurtres et la tueûthie dans les routes par lé nombre excessif dé motos par les c'mîns, v'la tch'i' m'fait penser tch'i' y'a des choses acouo piéthes qué l'tourisme! Y'a quand-mème eune chose qué j'voudrais vaie en Jèrri en 1972. Ché s'sait d'tchitter à couvri la belle campangne dé maîsons ou aboli les conditions tchi pèrmettent ès travailleurs d'hors-pays dé l's otchuper ieux-mèmes au dêpit des vrais Jèrriais, vièrs ou jannes, tch'en ont bésoin?

Piêsse la Nouvelle Année vouos apporter l'bonheur à tous, et la paix sus toute la tèrre!

George d'La Forge