Lé Caouain et Father Christmas

Papa Noué Touos l's ans à chute saison ichin les uns et l's autres me d'mandent “Eh bain, Caouain, comment qu'tu as passé tan Noué?”

J'ai r'mertchi que la pus grand' partie des gens s'entre demandent chute même tchestion-là, pas que v'là qui les interêsse la moindre des choses si ch'est qu'nous a passé un bouan Noué ou pas, mais ch'est simplyement pour faithe de la conversation, la même chose comme quand nou dit, “V'là l'temps oquo sus les plyies.”

Un fait que nou sait tous dêjà trop bain!

J'aimethais bain mus que nou me d'mand'dait tchiques jours devant Noué, “Eh bain Caouain, ouest qu'tu as idée d'passer tan Noué ch'tte année?”

Et quand je raîpondrais, “Je n'sais pon trop bain, personne ne m'a oquo invité,” i' comprendraient peut-être tch'est que j'voulais dithe et lus conscienche, s'ils en avaient iune, les pos'rait à m'inviter à aller siez ieux pour les fêtes de Noué et d'la Nouvelle Année.

Ch'est une chose aussi vraie comme oulle est tchuthieuse, mais dans toutes les années qui sont passées, pas iun d'mes lecteurs ou lectrices n'y a jamais pensé.

Le Chef, li, dit qu'i' n'y a pas à s'en êtonner, car i' n'peut pas imaginer autchuns de nos clients qui voudraient aver un ouaisé comme le Caouain à dêhonter lesassembliées d'famille à une saison comme chenna, à mangi la pus grande partie d'lus picot et s'régaler comme i' faut à lus frais, et pis opprès se fichi d'ieux en rcontant dans ses articlyes des sornettes sus tout ch'qui s'était passé.

Mais, ch'est les d'vis du Chef, tout chenna. J'espèthe que mes lecteurs ont une miyeu opinion d'mé que d'penser que je f'thais patheille chose.

Enfin tréjous, j'ai passé man Noué siez-nous comme d'habitude, avec Marie Hibou et touos les p'tits Caouains.

Papa Noué Jusqu'acheteu, pour des raisons d'êconomie, je m'étais baingardé d'embêterla tête à mes mousses avec tout chu niollin-là entouor “Father Christmas” et ses descentes avau la chimenée avec toutes sortes d'présents pour mettre dans les cauches à touos les bouans petits êfants qui les pendaient au pid d'lus lièt.

Mais ch'tte année ch'a 'té bain difféthent. Les autres mousses à l'êcole ouest qu'i' vont lus ont fait part de toutes ches sottises-là, et l'aut'e jour i' d'mandithent à lus mèthe pourtchi que “Father Christmas” ne lus avait jamais apporté rain. La Marie inventi tchique sorte d'extchuse pour les apaisie et lus dit que si pendaient lus cauches chute feis qu'il 'ait tout-à-fait probablye que Santa Claus ne les oubliethait pas.

I' fallait son y subvenin et vaie qu'i' n'fussent pas désappointés.

Mais comment s'y prendre?

Comme i' y a une demié-douzaine, che n'tait pas une petite affaithe!

Et je n'en avais pas les moyens, mé!

Le Chef m'avait donné trente-siaix sous pour ma Christmas Box, le jeune Moussieu Simon y avait ajouôté douze sous et la collecte que Mess Pain, notre foremaine, avait fait pour mé dans l'imprimethie n'avait recolté que djaix-sept sous.

Nos gens sont bain liain d'être aussi généreux comme les Membres d's Etats!

Avec une patheille fortune, opprès que j'avais mins d'côté chein qu'i' m'fallait pour mes besoins personnels, ou pouvez bain craithe qu'i' n'me restait pon grand' chose. Mais opprès avé 'té tcheûter d'une carre et d'l'autre dans la ville je réussi à rapporter un couplye d'douzaines d'oranges pus ou mains endommagies et une poignie d'bananes de tchi qu'la vente n'était pus praticablye.

Marie Hibou, lyi, de san côté, fut faithe une ronde dans un grand bâzar de la localité, mais à cause de la foule, ne pu pas être servi à san goût, ch'est pourtchi ou chouaîsi tout ch'q'i' li fallait et opprès avé emplyi ses pouchettes et san pagas, se r'trouvi je n'sais comment dans la rue, sans avé ieu l'opportunité de réglier sans p'titcompte.

Arrivés dans not'e mansarde les lots furent faits aussi êgaux qu'possiblye afin de n'cause pas d'jalousie et à un moment donné, Father Christmas s'atchitti d's tâche de la manièthe usuelle.

Mais le malheur en vouli qu'en sortant d'la chambre i' heurti san gros orté contre tchique obstaclye que Marie Hibou avait laissi bêtement à la vaie et les souffrances qu'il enduthi firent êcliater des patholes malsonnantes qui n'taient pas dignes du vénérablye vier moussieu qu'il est supposé d'être.

Il 'tait à peine jour le lendemain au matin que v'là touos les p'tits Caouains qui s'en vinrent nos montrer les belles choses qu'ils avaient trouvé dans lus cauches.

“Là!” s'fit Marie Hibou, “ou viyiez bain que Father Christmas ne vos a pas oubliés! Le vîtes-vous?”

“Nennin, mais je l'ouîmes bain s'en r'aller! I' s'capuchi contre tchiquechose en sortant et i' s'mins à juther justement comme pepée fait quand il est mârri.”

J'nos régalîmes comme i' faut le jour de Noué.

J'eûmes un pithot pour not'e dîner sapresti! Je n'sais pas trop bain de ouest qu'il 'tait provenu ch'tis-là.

La Marie souôtchaint qu'oulle l'avait gâgni dans une lot'tie, mais j'en ai mes doutes. I' n'est pas tréjous sage de d'mander trop d'tchestions ch'est pourtchi je n'ai pas voulu la prêssi pour des détails. A tch'est qu'chenna servithai?

Tout ch'que j'sais est que j'eûmes un bouan fricot et ch'est oquo là le principal.