A Fragment in the Patois
Greeting from our Happy Family
J'vos souhait' un Bouan Noué et tout plien d'frico! Man maître m'a dit coumme cheunna: "Maître Piteur! Ou' n'éthez qu'a nos êscrithe un articlye sus Noué! Vous, Madame Pain, et Miss Lonore; chatchun vot' bu, et chatchun s'lon vos moyens.
Eh don! ch'est mé qui c'menche. J'vos souhait' un raide Bouan Noué -
Tout plien d'frico, tout plien d'ji,
Tout plien d'plaisi, hardi ri!
Si y'a eunne chose qui m'pliait, quand vint chutte Saison, ch'est qu'nou s'forche a mangi pus qu'd'amor. Et du gras! Pâslez mé d'lard au fou, d'lard bouollyi, d'canards rôtis ov tout plien d'stoffinne, de poules êstuivées dans d'la mollegraisse, d'steak de boeu fricachis ov des crétons! Y'a de tout ch'la a gogo siez Le Riche et dans les marchiers. N'y'a rin qui m'pouslinne tant que d'allé faithe un tou 'up an down' endrét les boutiques ou-ès qu'y'a d'la vitalle, et en humé le r'lent.
Eh bin! J'vos en souhait' plien vot' pagas, et qu'il en reste pour mangi rêscauffé jusqu'a Samdi. Y'en a assez en vile pour tous! Et ne m'dites as qu'y'en a pon pour vous! Tout ch'qu'ous avez a faithe, ch'est d'dounné eunne bike a vot' Laizé, et d'dithe: La, ma Laizé, va t'en en ville, n'èspeigne rin, et prends té d'sorte que j'aions un raide bouan Noué - sus l'heuthe du dîné!
* * *
Que la paix soit avec vous, bouonnes gens! J'vos souhait' un bouan Noué, bin paisiblye, plien de r'pos; a seule fin qu'ous eyites le temps d'entré en vous mêmes, et d'médité séthieusement que je n'soummes tous que poudre et chendre. Pour de mé, je m'rêsjouis touos l'sans que pus j'vis, pus je m'prépathe pour mouthi. Ch'est-tan-tchi j'vos invite de vos rêsjoui avec mé que ne r'vela un autre Noué qu'passe sus nos têtes, et qu'bétot, le pustot possiblye, j'nos rencontréthons la ou-ès qu'les lermes s'ront essuyés d'os yeux. Amen.
J'soummes pour pâssé Noué bin tranchill'ment entre nous. M'n'houmme m'a dounné des sous pour accaté tout plien d'choses qui péthissent, coumme du pitho, d'la conotte, du gras lard, et je n'sais tchi ocquo qui n'a qu'un temps. Mais, chutte Laizé ichin sait pliechi ses sous a miyeu intéthèt qu'cheunna! J'ai tout dounné a not' pasteur pour qu'il mette a man compte la ou-ès que l'ver né ronge point; et si Piteur veur fricotté a Noué, sans mus s'a d'allé siez ses gens ès Hautes Crouex! Coumme dit l'proverbe: Un r'pas d'herbe est bon assez pour les gens qui sont tréjous a dithe que mangrons nous que bérons nous.
Mais j'vos souhait' tout d'même un Bouan Noué; j'sais bin qu'tous n'sont pas d'ma sorte, et y'a bi des temps dans la vie.
* * *
"Appy, Appy Clismus! Appy everywhere!
Joyful Merry Clismus! over dale and mere."
J'sis si content que vint Noué! Tout l'monde est d'bouonne humeu; tout l'monde rit, et les siens qui peuvent chanté, chantent du matin au sé.
Ch'est l'temps qu'les p'tites filles pendent lus cauches ès pids d'lus liet; mais mé, de crainte que Sanit Claws ne s'trompthait d'chambre, j'ai pendu toutes les mennes dans l'allée. Ch'fut l'aut' sé, tandi qu'pépée et memée 'taient hors en ville, que touos les clerques de l'office vintent m'aidji. Tchi fonne que j'eûmes! J'tais montée sus eunne tchaise; tchiq'un me t'nait a sa brachie pour m'empêchi de m'drotchi; y'un m'passait l'marté, l'autre un cliou, et les cauches 'taient atouôre de man co. Mess Samuel dèshalli un brin d'mistletoe d'sa pouchette et voulait dêja c'menchi. J'eus bieau crié que che n'tait pas fair, et qui fallait au mains attendre jusqu'au jour de Noué! i' s'mintes tous d'sen bord, et quoué'q j'me d'fendisse - pas trop, pour ne pas dèsrangi mes corles - j'cré qui m'en volites pas mal.
J'eumes hardi d'fonne! et quand n'y'eut pus d'cauches, i' s'en r'fûtes tous avaut les d'grés, imprimé lus gazette, en chantant:
Appy, Appy Clismus!
J'sis seuse que j'nos n'allons avé un bouan Noué! J'ai veu pépée dounné eunne bille a mother, et j'ai oui mother dithe qu'ou savait tchi en faithe.
Hourras! Pourvu qu'j'aie pendu assez d'cauches.
Touos les Pains
The Morning News 23/12/1913
Viyiz étout: