Les Pages Jèrriaises  

Quand tchi qu'Noué c'menche?

 

Quand tchi qu'Noué c'menche? I' sembl'ye au mais d'Septembre
Quand les podîns appathaîssent sus les ais.
Et arrivant au vîngt-chîn dé Dézembre,
J'en soummes touos dêjà vîngt-chîn fais enn'yés.

Quand tchi qu'Noué c'menche? Dévièrs la fîn d'l'Êté
Quand les dêcorâtions sont haûlîndgies
Dans les c'mîns d'la Ville. J'ai-t-i' ieu assez
D'chu train et ches quat' mais d'prépathâtis!

Et combein qu'j'avons veu dé Papas Noué!
Quand tchi qu'Noué c'menche? Il a dêjà c'menchi!
N'y'a même pon d'jouaie lé mais d'Dézembre pâssé,
Car tout va r'quémenchi au mais d'Janvyi!

 

Geraint Jennings

24/12/2001

 

 

Viyiz étout:

 

 

Les Pages Jèrriaises