Savêt'-ous qué l'sept dé Janvyi est l'Vièr Noué? Et qu'des fanmil'yes Jèrriaises soulaient mèrtchi chu jour-là à la pliaiche du vîngt-chîn d'Dézembre?
Ch'est en tchi les Russes, ieux étout, gardent Noué au mais d'Janvyi. Lé vièr calendriyi qu'nou-s'appelle Julien tchi fut înventé par les Romains 'tait dév'nu d'mains en mains correcte, et don l'Pape Grégouaithe quémandit un nouvel almonnas en halant des jours et en créant d's années bissextiles pouor amender l'caltchul du temps.
Bein seu qu'les pays Catholiques, coumme la France et l'Portûnga, acceptîtent chu calendriyi Grégorien, mais l's êtats Protestants d'l'Ûrope gardaient l'vièr calendriyi pouor acouo bein d's années. La Grande Brétangne et ses colonies n'changîtent qu'en 1752 en halant onze jours d'l'almonnas – nou dit qu'i' y'avait des protêts contre la pèrte d'ches journées.
Y'avait bein des gens tchi n'acceptaient pon l'changement d'fêtes et tchi continnuaient d'garder Noué s'lon la vielle couôteunme. En Jèrri chenna duthit jusqu'à la Preunmié Dgèrre Mondiale à ch'qu'i' pathaît, mais en Galles et en Shetland jusqu'à ches drein.
La Russie et d'aut's pays Orthodoxes n'avaient rein à faithe auve les c'mandes des Papes et laîssîtent lé changement, coumme nou dit, à la dreine minnute, et la Russie l'fit seulement à la siette d'la Révolution d'Octobre (tch'eut lieu vraînment au mais d'Novembre). La Grêce gardait l'vièr calendriyi jusqu'en 1924 – mais l's églyises Orthodoxes continnuent d'garder Pâques coumme i' soulaient l'faithe. Les Russes mèrquent lé Vièr Noué, et il' ont même deux Nouvieaux Ans: l'Jour dé l'An lé preunmyi d'Janvyi et l'Vièr Jour dé l'An lé treize. Ah, ches Russes, lé trop surpâsse l'assez!
Bouan Vièr Noué à touos!
Viyiz étout: