Ev'la Noué tch'appraiche acouo eune fais et, maûgré mé, j'me trouve oblyigi dé prépather pouor lé grand jour bein d'avanche. Les cartes et les lettres sont êcrites, les présents acatés, lé parleux a un aithe dé fête auve toutes les décorâtions, l'arbre dé Noué est dans la grande allée éyou qu'les êfants vont êpier et tâter les patchets pouor dêcouvri si j'avons acaté chenna tch'i'nos ont suggéthé. Dans les êcoles l'histouaithe dé la naîssance dé not' Sauveur a 'té présentée et les cantiques dé Noué ont 'té chantés, et sans doute lé 25 dé dézembre veindra et s'en îtha comme d'habitude, apportant jouaie, excitement et espéthance pouor bein des gens, mais pouor d'autres seulement tristesse et m'sespé.
Les êfants éthont un bouon temps comme tréjous. Pouor ieux, ch'est l'temps dé présents et d'partis; ch'est la période dé l'année quand i' sont gâtés et quand i' peuvent aver tout tch i' veulent quand i' promettent d'être bouôns. Et pis, i' y a chu moment si précieux quand i' lus trouvent fâche à fâche auve ch't êtrange moussieu habilyi en rouoge, étout eune ênorme barbe blianche, tchi veint touos l's ans d'un pays hardi fraid éyou qu'i' y'a tréjous d'la né. Et quand nou pense qué chu même moussieu d'scend toutes les cheunm'nées la Sèrvelle dé Noué, nou-s-a d'la peine à l'craithe, mais nou n'ose pon en pâler. J'm'rapelle qu'eune année les êfants laîssîtent eune vèrrée d'whisky pouor li, car i' faisait grand fraid chutte séthée-la. Malheutheusement, i' n'en but pas eune seule goutte, et j'dûmes explyitchi à la fanmil'ye qué ch'n'est pas parce qué nou-s-a lé nez rouoge qué nou-s-est ivrouongne! Pouor les grand' personnes Noué apporte un amalgamot d'mémouaithes. Combein qu'i' y'en a tchi vos disent que Noué n'est pus lé Noué du temps passé? Mais, avau l's années, tout change et i' n'faut pon compather ch'na qué j'faîthons en 2001 auve les couôteunmes dé nos grand-pathents. Pouortant, nou s'rapelle qu'eune poutchie d'chucrîns éthaît apporté grand pliaisi ès mousses i y'a chînquante ans, mais aniet i'y'en a plusieurs tchi s'en motch'thaient. Tchi damage qu'i'y'en a parmi les jannes tchi n'apprêcyient pas tréjous la pensée. I s'peut que ch'est dé not' faute car, privés dé tant dans les dgèrres et après, j'lus avons donné en abondance chenna tchi nos mantchait.
I' y'a d'autres mémouaithes tchi nos veinnent à l'idée. Noué est spécialement pouor la fanmil'ye et nou-s-attend fête dé s'réuni auve les pathents qué nou n'rencontre pas toutes les s'maines.
Quand nou-s-appartcheint d'eune grande fanmil'ye i' y'a souvent eune tchaise tchi reste viède et tchi nos ramémouaithe tristement qu'i' y en a tch'ont passé l'pas. Mais la pièche qu'il'ont laîssie peut être remplyie, et tchi belle opporteunité qué j'avons d'înviter les cheins tchi sont seuls et tchi peuvent enrichi nos célébrâtions par lus présence. Tâchiz dé vaie s'i' y'a tchitch'un tchi poûorrait partagi vot' festîn, car en asseuthant lé bonheu d'autrui j'gangnons pouor nos-mêmes la pus grande satisfaction.
Nou ouait dithe souvent qué Noué n'est qué pouor les êfants. Né v'là du niolîn!
Malheutheusement les cheins tchi pensent dé même n'ont autcheune connaîssance du vrai message dé l'Evangile. J'avons tous bouonne raîson dé nos rêjoui, comme lé fîtent les bèrgers quand l'ange lus dit 'J'vos annonce eune grande jouaie, tchi s'sa pouor tout l'peupl'ye; aniet, dans la ville dé David, lé Sauveur, tch'est lé Christ, lé Seigneur, vos est né'. Et ches bèrgers s'en fûtent à Bethléhem pouor vaie chenna tchi 'tait arrivé. I' decouvrîtent pouor ieux-mêmes la bouonté dé Dgieu envèrs san peupl'ye en env'yiant un Sauveur pouor les libéther dé lus péchés. Noué n'est pas seulement pouor les êfants - mouon Doue d'la vie! Noué est pouor tous tch'ont péché, et i' n'y a pèrsonne tchi n'a pas bésoin d'la grâce dé Dgieu. St Paul, dans s'n êpitre ès Romains, nos laîsse en autchun doute quand i'nos dit qué tous ont péché, même lé pus saint homme.
Et bein, ch'est auve grand' confianche qué j'vos souhaite tous un Bouon Noué. Sachiz qué les clioches sonnent pouor procliâmer la miyeu nouvelle dé tout temps, et èrchévez pouor vos-mêmes lé cadeau qu Dgieu vos offre. Ch'est un cadeau tch'a 'té acaté à grand prix et sa valeu agrandit à m'suthe qué nou découvre qué ch'est Jésû-Christ seul tchi nos donne dé l'espéthance pouor l'av'nîn et pouor l'éternité.
Brian Vibert
Viyiz étout: