Les Pages Jèrriaises

Complyîments d'la saison!

San Antonio, Texas,
U.S.A.
Lé 18 dézembre, 1965

Moussieu l'Rédacteu,

Né v'la un aut' Noué tch'apprèche. L's années s'passent si vite quand nou d'veint mousse i' m'sembliait qué Noué n'veindrait janmais. Hélas! Comme lé temps s'passe! Et tant pus qu'nou vieillis, tant pus vite i' pathaît s'passer. Enfîn, ch'est la vie, et né v'la eune chose qué nou fait tous en même temps - vieilli! Qué nou s'sait en Jèrri, à La Côte ou en Améthique, ch'est la même boutique! Nou n'peut pon s'en êcapper.

En marchant les rues d'la ville ichîn j'vai tout l'monde, comme en Jèrri, s'apprêter pour la grand' fête. Les boutiques sont pliainnes dé monde à chouaisi des présents pour grands et p'tits, et ch'est à peine si nou peut appréchi des conteux. Les pouorres méthes tchi sont oblyigies d'am'ner lus êfants auve ieux boutitchi n'savent pon par ioù touanner, car les mousses veulent tout ch'tch'i' vaient. Et l'pus souvent, ch'est les jouets tchi coûotent trop pour les pathents dé p'tits mouoyens à acater tchi veulent! Et pis, étout, comme en Jèrri, et dé chein qu'j'en ai veu un mio partout l'monde, les gens arrêtent à la dreine minute pour boutitchi, et ch'est un vraie tîntamarre dans les boutiques.

Dans les rues, tout est flieuthi et dgèrni d'belles choses couleuthées et r'lîsantes, et d's ornéments dé toutes les sortes sont pendus partout. Eune vîngtaine dé pids en l'air, des chaînes couvèrtes dé p'tites lantèrnes dé toutes les couleurs sont suspendus d'un côté d'la rue à 'autre, et i' sont belle à vaie la niet. Sans doute, i' n'faut pon oublyîyer qu'ya tout pliein d'êlectricité à bouan marchi en Améthique. Ya des grands images, en carton, d'Papa Noué partout, et dans l's entrées des grand' boutiques ya un homme habilyi en Papa Noué à attither les mousses et lus faithe la fête. Dans les rues domiciliaithes, les gens mettent des lantèrnes et des veux êlectriques dans lus f'nêtres et dans les bouais dans l'gardîn en d'vant, et les rues valent la peine d'aller vaie auve toutes ches veues couleuthées. Dans les maîsons, ch'est a bein près comme en Jèrri - des ribans d'papi couleuthé, d'la vèrduthe, et des veues un mio partout.

J'voudrais bein êt' en Jèrri à ch't heu pour souhaiter les complyîments d'la saison à touos m's anmîns et fêter Noué auve ieux, mais nou n'peut pon êt' dans deux pays en même temps à mains qu'ché s'sait sus eune frontchiéthe, et dans l'cas d'Jèrri i' faudrait pouver engamber La Manche pour y être! Ch'est-en-tchi, d'ichîn en Améthique, j'souhaite un Bouan Noué à touos l's anmîns en Jèrri, et à vos lecteurs, et la millieuthe Nouvelle Année tch'il aient janmais vei. J'espéthe qué 1966 es'sa eune année prospèthe pour tout l'monde, qué la saison d'patates es'sa bouanne pour les fèrmièrs, et qu'les brécolis et les tonmates f'thont bein étout, et qué l's avions f'thont mains d'brit pour les St. Pièrrais, et qué l's Êtats consèrvéthont les sou des contribuabl'yes pûtôt qué d'les gaspilyi, qué l'nombre des malfaîteurs molitha assez pour n'aver pon à bâti eune neuve prîson, et qu'la santé des Jèrriais es'sa si bouanne tch'i' n'y étha pon bésouain d'ajouter d'aut' bâtisses à l'hôpita!

la son'nie d'la clioche dé la grande églyise à St. Ouën Pour lé moment mé v'la clioué ichîn à St. Antonio en attendant d'vouos r'vaie tous en 1966 si j'en vai l'heuthe. Ch'nest pou pour dithe tch'i' n'y fait pon bé, à San Antonio. Lé solé r'lis, et i' fait caud somme en êté. Nou-s a d'la peine à realiser qué j'sommes dans la saison d'Noué quand nou vait un temps d'êté à l'entou d'sé, et touos l's hommes à la c'mînse dans les rues, et les femmes décoltées et en ligièthes robes d'êté! Mais ché s'sait mangnifique si j'pouvais prendre part dans les fêtes en Jèrri comme nou l'faîsait quand j'tais janne. Y'avait des partis d'Noué un mio partout dans les pâraisses, et ch'tait des séthées mèrveilleuses - des chansons et des jeux dé toutes les sortes. L's amouotheurs avaient la chance dé faithe la cârre ches séthées-là, car nou jouait à "Postman's knock" et l'porteux d'lettres avait tréjous un tas d'lettres pour les cheins tchi s'entr'aimaient. Et pis, il 'tait pèrmins d'embraichi les filles souos l'toufée d'gyi, et y'en avait d'pendu ichîn et là! I' n'faut pon oublyiyer qué quand un janne homme aimait eune janne fille fans chu temps-là, i' n'avait pon fort dé chance dé l'aver à san tout seu bein souvent, car les pathents gardaient l'yi sus lus filles! Ché n'tait pon comme à ch't heu en Améthique, où-est qu'les jannes dé treize et quatorze ans ont autant d'liberté comme les grand' pèrsonnes. Mais p't êt' qué j'trouv'thais qu'Jèrri a changi étout, et tch'i' n'y a pus d'partis d'Noué. Ya si longtemps qué j'n'ai pon passé un Noué en Jèrri qué j'n'en sai rein. J'pense tout d'même qué cèrtaines couôteunmes ont survêtchu, comme la son'nie d'la clioche dé la grande églyise à St. Ouën la sèrvelle, et j'ôse espéther tch'i y'a acouo tchique sorte d'rêvillon en fanmile et parmi les vaîsîns d'ma vielle pâraisse natale!

George d'La Forge

 

Viyiz étout:

 

Les Pages Jèrriaises