Les Pages Jèrriaises  

Lé vrai message de Noué

La Nativité (Saint Brélade)

Touos l's ans j'c'menchons nos prépathâtions pour Noué pus d'bouonne heuthe qué l's aut'es années et acouo j'nos trouvons en hâte et en prêsse, à but d'haleine, quand lé jour même arrive. Tchi damage qué les présents et l'mangi et tout l'commèrce dé Noué sont dév'nus si împortants qu'il' ont rempliaichi pour bein des gens la vraie raîthon pour nos célébrations.

Dans l'couothant des dgiex jours d'vant Noué la pliûpart dé nous j'prannons part dans plusieurs sèrvices dé neuf léçons et d'cantiques. J'êcoutons tous la véthité éternèlle des léçons d'la Bibl'ye et j'chantons auve enthousiasme les mots tchi sont la foundation dé not' fouai chrêtchienne.

Quand Jésû-Christ fut né i' y'a bétôt deux milles ans i' n'y avait pus d'run pour li dans la ville de Bethléem. Pèrsonne né voulait li'offrit eune pliaiche; i' fut poussé d'côté et fouôrré dans la cârre d'eune êtabl'ye auve l's annimaux. Et anniet i' y'a eune mâsse dé gens tchi traitent lé Rouai des Rouais d'la mème manniéthe.

J'en ouai dithe 'mais j'sis si embarrassé'. I' y'a des lédgeunmes à prépather, lé picot à tchuithe, des présents à patchi et la fanmil'ye à r'chéver - hélas, oh qué Noué s'sait pâssé! Oh, tchi mêprînse quand j' donnons priorité au picot pûtôt qu'à Jésû li-même!

I' y'en a étout tchi n'ont janmais pensé - séthieusement ès èrcliâmes dé Jésû. Dans l'Êvangile dé St Jean, j'liêthons qué 'Dgieu aimait san monde tant qu'i donnit san Fis eunique à fin qué tous tchi craient en li n'meuthent pas mais jouissent d'la vie êtèrnelle'. Car Dgieu n'env'yit pas san Fis dans l'monde pour êt'e san Juge, mais pour êt'e san Sauveur ou la mort étèrnelle quand j'réj'tons s'n offre.

Et i' y'en a tchi s'vantent d'êt'e un fout-d'tou tchi disent 'A, j'm'en fiche dé tout chu niolîn-là!' J'ai grand r'gret pour ieux et j'les supplie dé trouver l'temps dé r'garder à l'entou d'ieux pour vaie oû'est tchi peuvent trouver la paix, la seûtheté, la jouaie, lé pardon dans un monde dé dgèrres, dé doutes, dé haine et dé r'venge.

Quand j'réalisons lé vrai message dé Noué j'avons bouonne raîthon d'fêter pas seulement lé jour même mais chaque jour dé l'année. Dgieu nos offre un présent, lé miyeu présent qué nou piêsse aver: il offre Jésû-Christ pour prendre not' pliaiche pour payi pour touos nos péchés. Ch'est un cadeau adréchi individuellement à tous, et j'pouvons l'accepter ou l'èrfuser.

Après Noué les boutiques èrprannent ou êchangent des présents qu'ont 'té donnés. I' y'en a tchi n'marchent pas, d'aut'es tchi 'taient bûchis et d'aut tchi n'sont pas conv'nablyes. I' y'a des présents tchi couôtent eune forteune mais il'us'thont avaû l's années. Mais Jésû-Christ n'change pas - lé même hièr, aniet et à tout janmais. Et la garantie qué Dgieu nos donne atout l'présent a des promêsses qu'il a gardé pour deux milles ans et tchi surviv'thont l'êtèrnité. J'espéthe qué tous tchi liêthont ch't' articl'ye prendront l'temps dé dêpatchi Noué ch't année.

 

Brian Vibert

 

 

 

 

Les Pages Jèrriaises