Nos r'vélà à Noué acouo eune fais. Comme lé temps s'pâsse!
Pouor bein du monde ch'est eune saison bein triste; y 'en a qu'ont pèrdu dé lus près membres dé fanmillye duthant l'année et pouor d'autres ch'est un temps qui rappelle du malheu qui s'est arrivé dans tchique autre année. Mais, étout, ch'est eune saison dé célébrâtions. Nou vait des belle choses partout. Y'a du mangi spécial, des réunions d'fanmil 'yes et anmîns, des présents, des cartes, et des vacances.
Pouortant dans tout chenna il n'faut pas oublier à célébrer la naîssance dé Jésû-Christ. Sans Sa naissance il n'y'éthait pas d'Noué.
Pouor nous quand j'taîmes mousses ch'tait eune grande affaithe d'aller en ville la Sèrvelle dé Noue. Les boutiques nos pathaîssaient si bein décorées dé toutes sortes dé belles choses et y'avait tréjous un vrai peupl'ye en ville chu jour-là. Chein qué j'aimais hardi était l's hommes à rôti des châtaines sus des tchéthiots qu'avaient un feu en d'ssous. Nou pouvait en acater eune poutchie pouor douze sou ou p't-être un ch'lîn - jé n'mé rappelle pas trop bein. S'i' faîsait fraid nou s'mettait à côté tout près du tchéthiot en mangeant les châtaines.
Nou-s-entendait des cantiques dé Noué ichîn et là. Ch'tait eune hardi belle saison pour les mousses sustout. Y'avait des célébrâtions à l'êcole touos les jours, avec p't-être un p'tit concèrt, et y'avait des chaînes en papi, qué nou-s-avait fait, suspendues dans les clâsses. Man Doue, tchille excitâtion! Et pis à l'êcole du Dînmanche nou-s-avait un parti étout.
Ch'tait vraiment bein excitant pour nous. La Sèrvelle dé Noué quand nou-s-allait s'couochi nou-s-avait d'la peine à s'endormi pa'ce qué nou-s-attendait Papa Noué à v'nîn nos apporter des présents!
Noué, lé temps pâssé, 'tait bein pus apprécié parmi les mousses que par les siens d'au jour d'aniet. Tout est dév'nu bein trop chi! Et pis les jannes d'à ch't heu ont tout qu'i' veulent. I' n'sont pas dêrangis s'i' peuvent y'affaûrder ou pas; il' acatent et paient pus tard. Ch'est un drôle dé système mais, enfîn, ch'est là la vie d'à ch't' heu! Donnez-mé la vie du temps pâssé!
Iris Le Ruez
1993
Viyiz étout: