La rêunion mensuelle eut lieu samedi, l'16 dé décembre, dans la Salle Parouaîssiale dé St. Brélade. La salle, qu'avait 'té bein décorée par les membres du Conmité Dramatique, 'tait bein caude, et ch'est seux qu'les siens qu'y vîntent, à bein près 130 membres, né lus en r'grétidrent pon.
D'vant c'menchi l's affaithes pour la séthée, lé Président fit la bein'vnue au Connêtablye Chevalier et sa danme, qui 'taient v'nus passé la séthée auve nous.
Lé rapport dé la rêunion à St. Pierre fut liu et accepté; et quatre nouvieaux membres fudrent êlus. Ch'est bouan singne !
Lé Sieur Gibaut annoncit qué l'Professeux Fernand Lechanteur s'en veint nos donner un discours lé 12 dé janvyi, à l'Hotel Savoy, et d'mandit ès membres dé tâchi dé v'nîn ouï chu fanmeux orateux. Lé dîner annuel est arrangi pour jeudi, l'25 dé janvyi, à la Belle Etoile, et i' y'etha eune annonce dans la gazette pus tard, mais les membres qui n'ont pas acouo payi lus souscription pour 1962 sont avertis dé l'faithe devant l'31 dé chu mais, ou bein i' s'sa trop tard pour v'ni au dîner !
Les membres du Conmité Dramatique avaient arrangi eune bein bouanne séthée. Y'avait des gammes qui fudrent bein risiblyes, pour les siens qui prennaient part, et p't-être acouo pus pour les siens qui les r'gardaient. La r'citation par lé Sieur W. du Tôt et la chanson par lé Sieur B. Amy fudrent hardi appréciées etout.
Ch'tait "Eune Séthêe d'Noué", mais les membres du conmité n'avaient pas oublié l'origine dé Noué, et ils avaient arrangi eune magnifique erpréthentation dé la scène dans l'Êtablye à Bethlehem lé preunmié Noué. A m'suthe qué les difféthents caractéthes v'naient sus la strade, le tchoeu au côté chantaient des cantiques dé Noué à y conv'nîn. Touos les siens qui prîndrent part dans chutte petite scène fidrent lus partie avec révérence, et nos montritent tchi jouaie qué nos avait à adorer et louangi nout' Sauveur. Touos les membres jouaignidrent ensemblye à chanter deux cantiques. Les siens qui prîndrent, part sont : Helen Perchard, Jean Le Maistre, Ruth Amy, Denize et Annette de la Haye et Ann Richard et les mêssieux D. de la Haye. H. Gough. H. Gibaut, A. C. Quérée. J. E. Quérée et P. Noël.
Auprès la scène finie les membres du Coumité Dramatique, et plusieurs autres à lus aîdgi, servitent un vrai souper d'Noué, et méthitaient les r'merçiements qué l'Président lus accordit pus tard.
La pus ancienne danme, Mme. Perchard, chouaisi lé numétho pour la belle gâche dé Noué qu'avait 'té donnée, et Mme. Allaire eut la chance dé gagni, et Mme. Baudains vînt deuxième.
Lé Président errnerçyit l'Connêtablye pour nos aver prêter la salle acouo eune fais, et sou'aitit "Un Bouan Noué" à touos les membres.
Tous dithaient en sortant qué ch'avait 'té eune raide bouanne séthée, et pathaissaient bein satisfés. Ch'fut certain'ment un bouan finiss'ment pour l'année, et faut espéther qué l'année tchi veint s'en va continnuer aussi bein !
EP 20/12/1961
Viyiz étout: