Les Pages Jèrriaises

Not' Noé.

Bouan Noué!

J'espèthe qué d'main qu'est l'jour de Noé,
Qui n'f'tha pas d'plie et qui f'tha bé,
Car comme je soummes tous pour allé
Passé not' jour siès Klèm Godfray
Oui je's'sai domage qu'il en qu'èrrait,
Car j'n'aim'thais pas a'l d'sapointé -
L'poor Klèm.

Je sommes d'j'aix'sept de not' côtai,
Sans conté la fille ni l'vallet,
Et il y s'ont tous siès Jean Pithouet
Avec la veuve à Tom Mallet,
Et si je'n me sis pas trompèt
Jé's'son justement quarante-sept -
Siès Klèm.

C'h'est un bouan nombre, mais Klèm m'a dit :
Ne 't'jaine pas Jean, y'a d'quai mangi -
J'avons du Rignon fricachi,
Du Jambon et du Boeu rôti,
D'la Caboche et du Brecoli,
Et du Podin d'Vermicelli -
S'fit Klèm.

Deux Pâtets d'Prune et du Raisin,
D'la Perche-pierre et du Cel'l'ri,
Des Figues de d'siès Flippe Le Tublin,
Et sièx Bouteilles de fust-class Vin,
Des Oranges et des Pommes de Pin -
Tu verras Jean que je n'sis pas fin -
S'fit Klèm.

C'h'est à'd'main dont man vier garçon,
Et j'espèthe bain qu'tu n'manqu'thas pon
D'ête de bouanne heuthe à la maison;
J'en éthons, vieux, d'chu rigodon -
Rachel chant'ta sa vieille chanson
Et Flip man n'veu tou'cha l'violon,
S'fit Klèm.

Et pis l'biau-fraithe à Tom Bathette
Jouetha sus sa clairinette,
Et l'Tom qui chante coumme une allouette
Amu's'sa toutes les p'tites fillettes,
Et té et mé man bouan vier Jack
Je jouothons à passe la chavette -
S'fit Klém.

Et pis sian cas, l'année qui vain -
Si en vie et qu'tout va bain -
Je's'sa siès té pour le préchain,
S'fit Klèm.

 

Viyiz étout:

 

Les Pages Jèrriaises