Moussieu l'Editeu,
J'n'ai qu'des bouonnes nouvelles pour vous agniet.
Ch'est vendredi, et la Merrienne est à se r'pôsé sûs l'sofa dans l'grand parleux. J'n'ai pas voulu l'y dithe mais je crai qu'ou mangit trop hier et qu'ch'nest pas tant qu'oulle est lâssée comme ch'est qu'san pouôre vier estomac l'y fait des r'proches.
Sans doute chonna vos êton'na, car la s'maine passée j'vos avais dit que j'n'avions rain pour le jour de Nouë mais êcoutez que j'vos raconte tchêsque-y s'arrivit.
Mardi matin ne v'la une dame à la porte, avec un patchet. Ou me d'mandit si j'tais Moussieu Ph'lip du Portinfé, et quand j'l'ydit oui, ou m'pâssit l'patchet, avec un charmant souôrit, m'disant que ch'tait tchiquechose pour mé et la Merrienne, et qu'oulle espéthait qu'j'éthâimes un bouon Nouë.
Et la v'la horte. J'n'eut pas même le temps d'la r'mercié, et au jour d'agniet je n'sait pas tchêsque oulle tait. Mais chen qu'ou nos avait apporté ch'tait un pithot tch'y p'sait pus d'quatorze livres. La Merrienne en n'tait en extâse.
Un quart-d'heuthe après ne v'la un p'tit mousse à la porte.
"Si vos pliaît," y s'fit, "ne v'chin chiquechose que man pépée et ma mémée m'ont dit d'vos aporté, avec lûs compliements." Y m'donne un autre gros patchet, et ch'tait un picot, gros et gras et tout prêt pour le fou. Je n'savons pas ocquo tchêsque-y nos l'enviyit, car le mousse tait hors quédainne d'vant même que j'est l'temps de l'tchéstchonné.
La Merrienne ne pouvait pas en r'vénin, mais y'avait ocquo des surprînses, Mêcredi matin, quand j'vinmes à r'gardé, j'avons assez d'volaille, sans pâslé d'lard, pour une chinquantaine, et j'n'avions autchune idée d'ouêsque tout chonna tait v'nu. Le présent tchi nos fit p't'être le pûs d'pliâsi ch'tait un gros poulet envié par un moussieu et sa dame d'la ville, tch'y n'donnaient pas lû nom, mais tch'y dîsaient dans une lettre que touos les sam'dis, quand ils ouvraient la gâzette, la preumié chose tch'y liêsaient, ch'tait l's'aventuthes de Ph'lip et sa Merrienne. Y n'en comprenaient pas un mot, mais ils espéthaient apprendre le Jêrriais pûs tard. Dans l'entretemps y nos souhaitaient tout ch'que y'avait d'miyeu.
Comme dit la Merrienne, y'a ocquo d'bouonnes gens en Jêrri.
Ph'lip
Morning News 27/12/1947
Viyiz étout: