Les Pages Jèrriaises  

Cartes de Noué


 

Avous veu sus la Gazette de l'aut' Sam'di
L'annonce à Messieux Labey et Biampi
A lus boutique y'a i' pathait
Des Christmas Cards en vièr Jerriais.

Pour nos êfants et nos pathents au l'yain
Ya-t-i' rein qui piesse lus faithe pus d'bein
Qu'une Carté-d'Noué bein imprimé
Dans lus vieille langue des temps passés.

Y'a Ph'lip d'une brigantine qu'est l'contremaître
Dans les temps d'Noué en Hollande i dé être
V'la qui l'i f'tha ti du piaisi
Qui y'en ai yune là bas pour li.

Et y'a Laïesse qui n'faut qu'nou roublie
Il est pour Robin, Collas et Compagnie
Au p'tit Jerri i pense tréjous
Faut qu n'nait yune Messieux d'siez vous.

Et y'a not' belle seu', chest en Ecosse qu'oul est
Faut y'en envié, oul aime tant l'Jerriais
Et yune pour châtchun d'ses êfans
Qui l'pâlent ou dit comme dé vieilles gens.

Mais ch'n'est pas tou' car y'a oquo 'Douar
D'nos sept êfants ch'est l'seul qui s'sait soudar'
Sa prumié langue oquo i' pâle
Faut y en envié yune au Transvaal.

Yen a oquo d'autres, Alice, Ph'lip et John
Dès qui l'séthont, chèst là qu'yétha du "fun."
Car quand nou z'est à l'êtrangi
N'ya rein qui faiche pus d'piaisi.

Allons pour l'honneu d'vot langue Jerriaise
Dès qu'ou zithez en ville allez les vaie
A la "B'resford" pour y choiesi
Vos cartes siez Labey et Biampi.

 

Nouvelle Chronique de Jersey 23/12/1899
 

 

Viyiz étout:

 

 

Les Pages Jèrriaises