Les Pages Jèrriaises

Les Îles d'la Manche

Les Îles d'la Manche

Jèrri est la pus grande des Îles d'la Manche. Il est dîvisé en douze pâraîsses - l's Êcréhos sont partie d'la Pâraîsse dé St. Martîn, et les Mîntchiers sont partie d'la Pâraîsse dé Grouville.

Jèrri est un bailliage et san gouvèrnément est l's Êtats d'Jèrri. Les gens d'Jèrri sont les Jèrriais, et la langue dé Jèrri est l'Jèrriais.

 

Les douze pâraîsses dé Jèrri
 

Lé Bailliage dé Dgèrnésy est un mio pus complyitchi - l's aut's îles sont partie du bailliage. L'île dé Dgèrnésy est dîvisée en dgiêx pâraîsses.

 

Les dgiêx pâraîsses dé Dgèrnésy

 

L's Êtats dé Dgèrnésy est l'gouvèrnément du Bailliage, mais Aur'gny a ses Êtats (auve un Président) et Sèr est gouvèrné par l'Seigneu et les Chefs Pliaids. Hèrme, Brecqho, Jétho et Liho sont partie du Bailliage dé Dgèrnésy étout.

Les gens dé Dgèrnésy sont les Dgèrnésiais et lus vielle langue est l'Dgèrnésiais.

Les Sèrtchais d'meuthent en Sèr. Sèr fut colonisé par des Jèrriais d'St. Ouën au seizième siècl'ye, et ach'teu l'île est p't-êt' lé dèrnié êtat féodal en Ûrope. La vielle langue dé Sèr est acouo pâlé - lé Sèrtchais.

Mais la vielle langue d'Aur'gny n'est pus pâlée. L'Aur'gnais est mort. Les gens d'Aur'gny sont les Aur'gnais.

Les Îles d'la Manche d'vîntent partie du Duché dé Nouormandie en 933 et, auve lus Duc Dgilliaume lé Contchéthant, contchéthîtent l'Angliétèrre en 1066 à la Batâle dé Hastings. Mais en 1204, lé Rouai Jean pèrdit la Nouormandie continentale et l's Îles restîtent fidèles à la Couronne, ayant la garantie d'lus louais et privilèges.

Duthant la Dgèrre Civile Angliaîche, Dgèrnésy 'tait Parlementaithe, mais Jèrri 'tait Rouoyaliste, et y'a d'la rivalité traditionnelle entré les deux Îles. Pouor les Jèrriais, les Dgèrnésiais sont des ânes, et pouor les Dgèrnésiais, les Jèrriais sont des crapauds. Les deux annimaux sont ach'teu des symbôles des Îles. Jèrri a des tchileuvres et des crapauds mais Dgèrnésy n'en a pon. Nou dit qué l'êvangéliste dé Dgèrnésy, Saint Samson, n'tait pon bein atchilyi en Jèrri et don i' viagit en Dgèrnésy où'est qu'les gens lé fîtent lé beinv'nu. Èrconnaîssant, lé saint renvyit les tchilieuvres en Jèrri.

Nou dit qu'au temps pâssé, la capitale dé Dgèrnésy, St. Pièrre Port 'tait tout pliein d'ânes pouor porter les choses d'la caûchie à haut. À Saint Hélyi, la capitale dé Jèrri, nou n'faisait pon sèrvi les ânes coumme chenna viyant qu'la Ville est pliate coumme eune crêpe car ou fut bâtie sus les mielles.

Les Sèrtchais sont des corbîns, et l's Aur'gnais sont app'lés traditionnellement des lapîns ou des vaques.

 

Lé Dgèrnésiais dit au Jèrriais:

"J'crai qu'j'éthons d'la plyie,
car j'vai qu'les crapauds sont sortis!"

Lé Jèrriais rêpond au Dgèrnésiais:

"J'n'ai pon d'peine à l'craithe,
car j'entends les ânes braithe!"

 

 

Lé Muratti - lé grand match dé football entré Jèrri et Dgèrnésy - est tréjous eune grande affaithe. Lé rouoge (et l'blianc) sont les couleurs des Jèrriais, et l'vèrt (et l'blianc) pouor les Dgèrnésiais. L's Aur'gnais ont lé bliu et l'blianc.

 

 

Les couleurs d's Îles sont coumme chennechîn:

Jèrri:

la couleu Jèrriaise

eune rouoge crouaix diagonale sus un blianc fond auve l'êtchusson d'l'île et eune couronne à haut.

 

 

Dgèrnésy:

la couleu d'Dgèrnésy

eune vielle crouaix en or sus eune rouoge crouaix d'St. George sus un blianc fond.

 

 

Aur'gny:

la couleu d'Aur'gny

eune rouoge crouaix d'St. George auve l'êtchusson d'l'île d'ssus, sus un blianc fond.

 

 

Sèr:

la couleu d'Sèr

eune rouoge crouaix d'St. George sus un blianc fond auve deux léopards en or sus un rouoge fond dans l'preunmié quartchi.

 

 

 

Jèrriais

Français

Angliais

 

 

 

Jèrri clyiquez pouor ouï les mots

Jersey

Jersey

Dgèrnésy

Guernesey

Guernsey

Sèr

Sercq

Sark

Aur'gny

Aurigny

Alderney

Hèrme

Herme

Herm

Brecqho

Brecqhou

Brecqhou

Jétho

Jéthou

Jethou

Liho

Lihou

Lihou

Burho

Burhou

Burhou

Les Castchets

Les Casquets

Les Casquets

L's Êcréhos

Les Ecréhou

The Ecrehous

Les Mîntchiers

Les Minquiers

The Minquiers

Les Pièrres Dé Lé

Les Pierres de Lecq

The Paternosters

Les Îles d'la Manche

Les Îles Anglo-Normandes

The Channel Islands

Lé Ch'na

La Manche

the Channel, the English Channel

Chausé, Chausi

Chausey

Chausey

Les Rocques dg'Hieaux

Les Roches Douvres

Les Roches Douvres

 

 

L'Assembliée d'Jèrriais

1976

L'Assembliée d'Jèrriais

1966

L'Assembliée d'Jèrriais

1961

L'Assembliée d'Jèrriais

1956

L'Assembliée d'Jèrriais

2003

 

Viyiz étout:  

Les Pages Jèrriaises