St. Servan-sur-Mer,
France.
Lé 2 d'août, 1969.
Moussieu l'Rédacteu,
Ch'est vrai qu'ch'est l'change partout et qu'tout est sens d'ssus d'ssous! J'viyais dans la gâzette qué La Danme dé Sèr veurt s'en dêfaithe et donner d'ile à Dgèrnésy! Ch'tait întérêssant d'liéthe les commentaithes des gens au sujet, et j'sis du mème avis qu'l'Avocat Lemprièthe qué La Couronne étha p't êt' tchiquechose à y dithe. I' faut l'espéther, car ch'est tréjous danmage dé vaie un térritouaithe pèrdre sén îndépendance. J'créthais qu'les Sèrtchais ieux-mèmes daivent aver tchiquechose à y dithe, mais jé n'sai pon - comme jé l'disais pus haut, tout est sens d'ssus d'ssous d'nouos jours. J'sis étout du mème avis qu'Moussieu l'Sénateu Rom'thi, Président d'L'Assembliée d'Jèrriais, quand i' nouos dit tch'i' sont probabliément pus attachis à Jèrri qu'à Dgèrnésy et qu'lus langage est pus Jèrriais qu'Dgèrnésais, mais i' sont pus près des Ânes qué des Crapauds, et j'pense bein que l's Ânes en gagn'nont. I' peuvent couôrre pus vite qué les Crapauds!
I' nouos est dit dans La Chronologie d'Jèrri qué ch'tait l'six d'août, 1565, qué La Reine Élizabeth d'chu temps-là donnit eune Charte à Moussieu Hélier d'Carteret, Seigneu d'St. Ouën, l'autorisant d'coloniser Sèr. J'avais tréjous ouï tch'i' prînt 40 fanmiles - 35 dé Jèrri et chînq dé Dgèrnésy - et s'y êtablyit, mais j'ai un livre appelé Chroniques de Jersey dont l'auteur est inconnu, publié par Philippe Falle, Libraire, Place Rouoyale, en 1868, tchi donne toute eune longue histouaithe dé l'ile, et ché n'tait pon dans un jour qué ch'la s'fit.
En 1549 les Français, souos lé c'mandement d'un Cap'taine Bruel, dé Brétangne, vîndrent habiter l'ile. Dans chu temps-là ou n'avait pon 'té habitée pour pus qu'deux chents ans. Il' 'taient 400, les Français et i' bâtîdrent deux p'tits forts sus l'ile, mais au but d'chînq ou siex ans il' 'taient enn'yés d'êt' là viyant tch'i' n'avaient pon rêussi à y faithe craître du blié ou autcheune récolte, et i' tchittîdrent l'île iun à la fais à m'suthe qué l'opporteunité s'présentait, tellement qué Cap'taine Bruel sé trouvit quâsi tout seu.
Deux-s'trais navithes Hollandais vîndrent en Dgèrnésy dans chu temps-là pour sé prépather à faithe la dgèrre ès Français. I' d's'embèrtchîdrent à P'tit Sèr dans la niet et prîndrent possession des deux forts et d'l'île sans opposition et l'ouffrîdrent à la reine Marie, tch'avait mathié lé rouai Ph'lippe d'Espangne, mais comme ou n'en fit pon d'compte i' lus en r'allidrent en Hollande dêgouôtés et l'île fut abandonnée. Quand les Français vîdrent qué y'avait eune chance dé la r'prendre, lé Seigneur dé Glateny, en Nouormandie, allit vait lé rouai et lî d'mandit d'lî donner l'île et tch'i' la f'thait habitabl'ye à ses propres dêpens. Lé rouai s'y accordit et l'Seigneu y'env'yit un nombre d'gens, mais la dgèrre sé dêcliathit entre La Reine d'Angliétèrre et L'Rouai d'France, et n'èrvéla Sèr sans habitants acouothe eune fais!
Lé Seigneur dé St. Ouën, viyant l'dangi ès îles dé Jèrri et d'Dgèrnésy si les Français mènageaient à s'y êtablyi, en Sèr, allit vaie lé Captaine de Guernésey en compangnie des Commissaires (probabliément d'La Couronne et en Jèrri dans l'temps), et auve l'approbation du Captaine, prînt L'Île dé Sèr désdits Commissaires par vertu et autorité de leur Commission à pèrpétuité d'héritage pour li et ses hers Seigneurs dé St. Ouën, en payant 50 sols tournois par an à la R'chette du Rouai en Dgèrnésy. Ch'tait en l'année 1563.
L'Seigneu d'St. Ou, auve l'aigue dé sa Danme, fît labouother un clios la preunmièthe année (1564) pour vaie si la tèrre s'adonnait à craître du fronment et du blié. Il eut eune bouanne récolte de laquelle chose ledit Seigneur se réjouit et en rendit louange et grâce à Dieu de tout son coeur nouos dit l'histouaithe. L'année en r'vénant (1565) lé Seigneu et sa Danme allîdrent y d'meuther mais i' fallut tch'i' portîssent pour ch'tch'était nécessaithe pour le vie auve ieux, pain, brévage, comment, etc. Et fallait crouaîsi la mé auve tout chen'na et lus gens. Ch'tait-i' dans chu temps-là qué l'naufrage dé iun d'lus navithes eut lieu ès Pièrres dé Lé? L'histouaithe n'en dit rein.
I' n'y avait pon d'maison ni d'louogement dans l'ile sénon eune pétite chapelle faite à votte et ch'tait d'dans tchi lus r'nardîdrent jusqu'à tchi'i' trouvîssent lé mouoyen d'èrléver tchiques muthâles dé pièrre tch'étaient auprès d'la chapelle et d'couvri l'haut atout d'la feûgiéthe. Il eûdrent à transporter bouais et glyi d'Jèrri et toutes aut' choses nécessaithes pour bâti des maîsons, et j'vaux et boeufs pour tchultiver la tèrre, et des vaques pour aîdgi à les nourri d'lait est d'beurre, et l'bouais pour faithe les tchéthues, hernais, bêques, frouques et tout ch'tch'i' fallait pour tchultiver la tèrre.
L'histouaithe nouos dit que ch'tait en 1572, auprès la rêussite dé tout san travas pour faithe l'île habitabl'ye qué l'Seigneu d'St. Ou allit en Angliétèrre se présenter d'vant La Reine Élis'beth et lî montrer l'portrait et l'plian dé toute l'Île dé Sèr. Oulle en fut êrmèrvilyie et r'nouv'lit la Baille au Seigneu et êrigea Ladite Île de Sercq et toutes des appartenances en Fieu Hauteur et en fit don, pour elle et ses hers et successeurs, audit Hélier de Carteret et à ses hers Seigneurs de St. Ouën.
George d'La Forge
Viyiz étout: